1 Huetsa neten sca cahen Capernaum janin hahquirihbi Jesus nocoti cahi. Jahuen xobon jaa nocoscai cahen nincacanquin janohahbaan. 2 Hicha joni tsamajaquetaiya cahen xobo senenyamascai, xehqui pataxbi jahuenbi nihcahuantimahi. Jaan ca Papan joi jato yohiquin. 3 Jahuen yora honanyamajaquetai joni sca hihuehi becani, chosco joni. 4 Joni tsamajaquetaiboya Jesus pataxti hahtipahyamaxon Jesus mahchi xobo pemacanya tsecaquin. Quinijaxon jahuen cacajatiyabi jaa joni botonpaquecanquin. Yora honanyamajaquetai joni hahan racatai bi botonpaquecanquin. 5 Rohajatihi shinancoinaibo jisxon yora honanyamajaquetai joni sca Jesusen yohiquin:

—Miin hohcha ta sohuá scah qui, baquen —hahquin.

6 Jano rihbi cahen jaton jointinin shinani tsahocani huishani joi honanbo.

7 —¿Jahua jenquetsahin nea jonin jascajaquin yohihiquin? Tiromahi ta yohuanihqui. Papa huestichin ta hohcha sohuati hahtipahiqui —hihcani jaton jointinin.

8 Jaton jointinin jascajaquin shinanaiboya jahuen shinaman honanscaxon Jesusen jato yohiquin:

—¿Jahua jenquetsahin man jascajaquin shinanain maton jointinin? 9 ¿Jahue meha joi nea yora honanyamajaquetai joni yohiti hashoan teema quin? ¿Miin hohcha ta sohuá scah qui hihqui nan? ¿Hueníhue, miin cacajati bichish caresscatanhue hihqui nan? ¿Jahue meha hashoan yohiti teema quin nan? 10 Nai nequebihoxon hohcha sohuati hihbo hea jai man honannon hihxon tah hen nea sca yohihi —jato jaxon yora honanyamajaquetai joni sca yohiquin:

11 —Mia ta hen yohihi. Huenihue. Miin cacajati bichish miin xobon caresscatanhue —hahquin. 12 Yohihah huenixon jahuen cacajati bichish res sca jaton jisnonbi caini. Jatihixonbi jisish rahtetax siripi Papa qui yohuancani:

—Jahuentianbi tah non jascajahi jisyamaniqui —hihcani.

13 Hian quexa sca cahen Jesus caribihi. Jatihibi jonibo hahqui tsamajaqueti, jaan jato haxemanon. 14 Jano huinoquin bi Leví sca meraquin Alfeonen baque. Janoxon coriqui cobranti janin hapobaana cobranxoni tsahotai meraquin. Meraxon:

—Hehbe cahue —hahquin. Jan jascahah huenicahuanax hahbetan cahi.

15 Pihi benahue hahca Levin xoboho sca jahuen haxenicaboyabi Jesus cahi. Jesus betan hicha joni bocani. Nocotax pihi tsahoti hicha cobranxonaiboya hicha hohchayahpabo rihbi jano tsahoti. 16 Hohchayahpaboya cobranxonaibo betan Jesusen pihi jisxon huishani joi honan fariseobaan jahuen haxenicabo yocacanquin:

—¿Jahuejanoxon cobranxonaiboya hohchayahpabo betan pihiquin? —hahcanquin.

17 Jascajaquin yocacaibo nincaxon Jesusen jato yohiquin:

—Hisinjomabo pishinaima bi ta hisinyahpabo rahonica pishinihqui. Hohchajoma jonibo quenahima bi tah hen hohchayahpabo quenahi joniqui —jato jaquin.

18 Jaatian sca cahen Juaman haxematibaan piti tenenish. Fariseobaan rihbi piti tenequin. Jesus qui caxon fariseobaan Jesus yocaquin:

—¿Jahua jenquetsahin Juaman haxenicabaan piti tenenon fariseobaan haxenicabaan rihbi tenehi bi minabaan piti teneyamahihquin? —hahcanquin.

19 Jesusen jato yohiquin:

—¿Jato betan huanohi joni hihparihiya huanoquin quenamahibaan piti tenetihiquin? Jato betan huanohi joni hihparihiya ta piti tenetimahihqui. 20 Huetsatian ta jatoma qui huanohi joni hionyaxihcanihqui. Jaatian pari ta piti teneyaxihcanihqui quenamahibaan. 21 Tsoanbi ta hotsinica chopan chopa payo honayamahihqui. Jascajaquin honahah ta hona teresihqui hashoan huaxascai. 22 Tsoan rihbi ta hompa rahma nehsehihqui bichi borasa xeni qui mahneyamahihqui. Jascahah ta hompa pohtoshihmatihiqui, xehati yohyocohnon borasa rihbi masascanon. Hompa rahma nehsehihqui ta borasa behna qui mahneti qui —hahquin Jesusen.

23 Huesti tantiti neten sca cahen trigo huai nabebacahini cahi. Hahbetan caquin jahuen haxenicabaan trigo bimi tesabonaquin. 24 Fariseobaan sca Jesus yohiquin:

—Jise. ¿Jahua jenquetsahin jaabaan jascajahiquin, tantiti neten jascajatima joi jai bi? —hahcanquin.

25 Jascahahbo jato yohiquin:

—¿Jahua pitimahiya hahbe cahibo rihbi pihan hihquiya jaa rihbi pihan hihxon Davidinin hahni man jisyamaniquin huishani joi janin? 26 Abiatar sacerdotebaan hapo hihqui tian ta Papan xoboho David hihconishqui. Jaa paan sacerdotebaan res piti que bi jaan piquin. Jahuen jonibo rihbi piquihinquin —jato jaquin.

27 Jato jascajaxon yohirihbiquin:

—Tantiti nete copi joni jaima bi ta joni copi tantiti nete jaiqui. 28 Jaa copi ta hea noque baque tantiti nete hihbo qui —jato jaquin.