1 Jirô pê mã wa irĩt, ne ite Caràcahàcre Kra pê Jeju ata te Xijãw jõ hàpkàjti na hãm na hõmpun. Mã cahê na cute me 144 mir ne mehcuhhê. Mã mehkuctỳj kam me Jeju haprỳa hikwa, ne me kam Hũm Cati japrỳ. 2 Wa ite côjkwa pĩn me hõkre ata par, mã ihhêj rũm cupê côhxocti jàhkrihkrit, ne hàwrãrãc ita pê ihhêj rũm pahhàjê jàwrãrãc, wa ite impar. Mã hõkre pê ihhêj rũm wakỳre japàre ita jõkre par. 3 Mã Pahpãm krĩ xà pu na cute me cwat atajê me, pahhi te me winticwat atajê me, cute mehkrã ne me to xa. Mã me cuna mã cute me 144 mir atajê me xa. Ne mencrer xà intuw ata to me cre, ne jũ wỳr quê pjê pê cute mejũm pytàr nare ata me iràn xà na increr atajahkre pej ne to cre. 4 Ne por me xa atajê te amji kam me hapac xà peaj to impej, ne nee rỳ jũ caxuw pyjê na amehũhkra nare. Quê ha jũ kam Caràcahàcre Kra ata mõr prãm, quê ha ma ihkôt me mõ atajê pê me hũmre cahhur na me hũtà. Ampo na? He me taa mã pê mam Pahpãm me Caràcahàcre Kra ata mã me amji gõ. 5 Ne jũ caxuw mehnõ te ihhêj xi xà nõ ton nare. Ne nee ampo pyxitre na mehnõ kên nare, ne mempeaj to mempej.

6 Wa ite Pahpãm mã imprar catêjê nõa tor, ne kỳj pê ihtẽm na hõmpun. Mã cute pjê kam ampokra me, me harkwa pihho me, ampo krĩxàre cunea mã, ihkrãhhia kam Jeju pê me pahkritxwỳ na harẽn xà impejti to hũjarẽn to ihtẽm na, ite hõmpun. 7 Mã cute me cumã hũjarẽn to hajỹr he:

— Imã me amã ampo pej rohnỳtti mã ata jarẽn xà ata pê nee mã ampo nare. Caamji mã me Pahpãm cupa, ne catihti na amji mã me harẽ! Nãmri cute pjê kam me hũmre cunea cukij xà ne me to ipicokjêr jõ amcroa kam ramã hàhhuc. Ca ha, por cutecôjkwa me, pjê me, côxwa me, hatuj xà cunea ton catê ata, ca ha to me hàmnãn prãmte me acakôc to impejti, ne me amã ihkĩnti ne — hajỹr.

8 Mã ihkôt mare mã ihtor ita te hanea ne hũjarẽn to:

— Ma krĩ catia japrỳ te Papirõn jõ krĩ ata pỳm ne hamre. Ampo na? Por pê curi mehkrĩatajê pê mehkêanre, ne ajco pjê cunea kam mehkwỳ mã ampo to hahkre to hane he: “Hacme ne ahti na ame pyjê kwỳ caxu” hane. Ata pê ihhêj rũm cutemehkwỳ mã côxỳhti jõr, ne amehkwỳ to ipipãn pyràac. Ne me caxun ita pê ihhêj rũm cute me côxỳhti xen, ne ampeaj kam ahti na me cumã me cahãj caxun prãm. Cwỳrjapê ri Pahpãm te me hõ krĩ mea mã me tohamre tu — hajỹr.

9-10 Ne pom hapu na ipijakrut kôt ihtor ita te ri ihkrãhhia kam hũjarẽn to:

— Por jũmjê apu ampo kênti me, ihkrekà kĩn, mãcute mehkuctỳj kam haprỳ nõr, nare, cute mehũhkra kam haprỳ nõr atajê, quê ha Pahpãm te ame kam incryc xà pê ihhêj rũmcôxỳhti ata to amehkõm. Por mehcunea te ame ita ton atajê, quê ha mehkàj xà atajê uu ne cuhy te kẽn to ihprà ata kam me cumã hamre nare. Nekẽn cacro ata, quê ha ihtỳj Pahpãm mã memprar catêjê me, Caràcahàcre Kra ata kam mare mã mehkà to caxàr to ihcuhhê. 11 Ne pom quê ha cuhy ame cumã ihkàj xà to ita kũm, quê ha ihtỳj hõtpê ma hàpir to ipa rohnỳtti mã. Quê ha cute ame ampo kênti me, ihkrekà kĩn itajêmã, jũ caxuw caxwa me amcro kam mehkàj xà itajê amji to ihpec nare. Ne hanea ne, por cute mehkuctỳj kam ame haprỳ nõr atajê cunea mã, quê ha ita hane — hajỹr.

12 Quê ha Pahpãm na mehkwỳ me, por me harkwa kampa, ne ampeaj kam Jeju to amji mã mehhimpej atajê, quê ha ihtỳj me curê xwỳn te ame to kêanre ata jàhpan xà na, mehkên mã me hàr name to amji japackre. Ne quê ha ihtỳj me awcanã, ne cormã Pahpãm me Jeju kôat me amji ton to me ipa.

13 Wa pea ite côjkwa pĩn jũm jõkre ita par, mã hũjarẽn to:

— Ita na ca mehhôc he: “Pom quê ha cormã Pahhiti jàpên xà kam ame ty atajê quê ha ame hakry” — hajỹr. Mã Pahpãm Carõ Pejti te me cumã hũjarẽn to:

— Ỹhỹ, ita ampeaj kam ri. Hamre. Ita caxuw, quê ha ihtỳj me hàpên catêjê atajê ame kôt. Ampo na? Ramã me hàpên xà ita kôt me cumã ampo cunea — hajỹr.

14 Wa irĩt, ne ite jũm pê me Pahhàkà cati pyràcti, ne wakỳre prà tepti pê ôr te ihkrãhkà ne ihkrã na ajêt ata pupun. Mã cute hũhkra to rõhkrỳt xwahhi pyrne ahcakrã jakati kam to jỹ. 15 Mã pea Pahpãm mã memprar catêjê nõ Pahpãm to amji kam hapac xà jũrkwa pĩn cator, ne cute kỳj cati pêa mã ahcakrã jakati kam jỹ ata mã caràrto:

— Gõ rõhkrỳt to, pjê kam, me hũmre pê ihhêj rũm pur kam ramã ampo teptu, neramã ihkẽhkẽn xàa na atajê, ca ha to hakep — hajỹr.

16 Jirô pê mã ri, por ahcakrã kam jỹ ata te pjê na hõ rõhkrỳt to ihtẽm, ne cute to ampo cunea jakep xà atajê jakep partu.

17 Wa ite côjkwa kam Pahpãm to amji kam me hapac xà jũrkwa pĩn harkwa na imprar catê nõ cator na hõmpun, mã cator, ne hanea ne cumã hõ rõhkrỳt xwahhihti. 18 Jirô pê mã wa ite Pahpãm mã imprar catê cuhy toamji pytàr ata te Pahpãm jũrkwa pê cator na hõmpun. Ne cute ihnõ mã rõhkrỳt ata mã kỳj cati pêa mã caràr to:

— Ramã pĩxô pê uwa itajê cunea inteptu, gõ rõhkrỳt to pjê kam pĩxô atajê cunea jakep partu — hajỹr. 19 Mã cute pjê na hõ rõhkrỳt to ihtẽm, ne cute to pĩxô atajê cunea jakep partu, ipàr pê. Ne cute Pahpãm te incryc to hipu xà pêihhêj rũm kwỳr jatên xà ata kam haxwỳr. 20 Ne pê Pahpãm jõ kwỳr jatên xà ata krĩ pê ampỳa mã xa. Ne pê Pahpãm te incryc tohipu xà kam me pĩxô jatên kam me tẽ, ne pê pĩxô cacô ata pê me caprône ajxwỳ. Ne ihtua to ihtu. Ne kàj mã ihtu na me pajara capô pyxit. Ne mõr jũwry to cute 300 quirom.