1 Ijõ krĩ kam cute Pahpãm jũrkwa wỳr me ijator, ne me imã:

“Hacme, Pahpãm to cute me amji kam hapac xà jũrkwa wỳr!” hajỹr,

ata pyrên ijakry, ne imã amji kĩn crire nare.

2 Na wa ramã hỹrmã me icator, ne itỳj Krĩpinkrên kam ame ipa.

3 Ne ramã hacpỹ mã cute me Krĩpinkrên to impej.

Mã ramã Ixaher catêjê jakrã amehcuhhê atajê te hỹrmã me cuprõn.

Mã jũm te mehcukij to,

4 “Mẽr ampo na mã me hõ krĩ cunea pĩn,

Krĩpinkrên wỳr, me hàpir to me ipa?” hane.

Wa cumã:

“Nee mã ampo na nare!

He cute ampo pej cunea pyrên me hakryti na,

me Pahhiti pêPahpãm mã me amji jarẽn prãmte ri me ipa” hane.

Hõ, ita na ri cute mehcunea mẽn,

mã harkwa kôt cute me ton.

5 Ne ita ri mehcukij xà kam hõtpê me pajõ pjê jõ pahhi.

Ne cute ajpẽn kôt me harẽn catêjê atajê kampa,

ne catyt kam mehcukij,

ne ajkam me to impej.

Ne ita ri me cupê pro kam atajê ihcunea na,

ihtỳj me ajpẽn kampa.

6 Hacme, ne Pahpãm mã Krĩpinkrên kam amehkrĩ atajê cajrẽn.

Cu ha mehcajrẽn to hane he:

“Ca ha ma me hamã,

mãr quê ajpẽn na mehhôncoti to me ipa.

Ne por krĩ kwỳ mã, Krĩpinkrên kam amehkrĩ catêjê kĩn atajê,

ca ha hanea ne me to impej,

mãr quê me cuxà mempej pêa mã me ipa.

7 Ne imã Krĩpinkrên tête kwỳc tỳjti me,

cute me hamãr catêjê jũrkwa tỳjti atajê to,

cuteme curê xwỳn pê, me amji pytàr pejti na me to prãm,

mãr quê ikre atajê cunea kôt me ankrê,

ne nee ame amji mã ampo cupa nare, ne mehcarĩcti ne.

8 Ne por krĩ ata kam, me ikwỳ me, me ikjêjê ame ipa atajê,

ca ha hanea ne me to impej, quê mempej pêa mã ame ipa.

9 Ne mẽr ampo na mã wa ame ana ijàhwỳr to hane?

He apê me ijõ Inxũ Cati pê Pahhiti to

ite amji kam me ijapac xà jũrkwaita,

ita ri krĩ ita kam ihcuhhê,

na ca ha ipu na amehkrĩ atajê to hanea ne impej,

mãr quê me cumã amji kĩn jakryti kam me ipa” hane.