1 Ne Jeju cormã mõr kwỳa kam, cute jũm to tũam naihpỳm ata pupun. 2 Wa me ipê ihkôt me ipa catêjê te ahna mehcukij, neme cumã:

— Me ijõ Pahhi, ampo na mã pê hũmre ita into tũm ita na ihpỳm? Xà pê ajkĩ ihkên xà nõ to jahpan xà na mã cute hajỹr? Nare, xà ajkĩ hũm me inxi te ihkên xà nõ ton jahpan xà na mã into tũam naihpỳm? — hajỹr.

3 Mã Jeju te me ipar ne me imã:

— Nee mã ihkên nõ cwỳrjapê into tũm nare, ne nee mãhũm me inxi kên nõ cwỳrjapê cute hajỹr nare. Ampona ri into tũm? He Pahpãm te hũmre ita kôt carôt tỳjti to ipipẽ to prãm to ri, cute to into tũm. 4 Pom hãn ne ihtỳj amcro kam me hàpên xà to mehàpên to me ipa, ne caxwari nee me hàpên nare. Itajĩkjê na mã ite hajỹar. Na wa ha cormã ita ri pjê kamapu imõr reria mã itỳj, por cute ajpên ikujahêc ata mã, apu ijàpên to ipa. Ne wa ha ma jũ caxuw hacpỹ mã tẽ, ne nee hipêr ita ri cumã ijàpên nare. 5 Ne pom pyt me parĩt xà caxuw me pamã pjê cujro, cu me rĩt, ne me ampo pupu ne me hahkre pej, ita jĩkjê na mãipê me cumã Inxũ te amji kam hapac xà cunea tohahkre catê, mãr quê mehcunea me hahkre pej — hajỹr. 6 Hõ, cute ita jarẽn to hajỹr jirô pê mã ri cutepjê kam harcô mẽn, ne to pjê to incrire ne to ihtô, ne to carẽc necumã into na to ihtẽm, ne cumã harkwa to:

7 — Tẽ ne Kujahêc jõ cô kam akuccuhhõ — hajỹr. Mã into tũm ata te mõr ne ihkuc cuhhõn, ne hacpỹ ne amji jaxàr, ne ramã ampo cunea pupun to mõ. 8 Mã cahi na mehkrĩ catêjê me, hàhwỳr na cute mehõmpun pejtu atajê te me hõmpun, ne ahna me ajpẽn cukijto:

— Xà into tũm ihkrĩ ne me pahna ahwỳ ata mã? — hajỹr.

9 Mã mehkwỳ me cumã:

— He taa mã ri! — hane. Mã mehkwỳ me cumã:

— Quê nare! Taa mã nare! — hane. Mã mehkwỳ me cumã:

— He mã ajte cupê hũràcti — hane. Mã me cumã amjijarẽn to:

— He pa wa! — hane.

10 Mã cute mehcukij ne me cumã:

— Ne mẽr jũ mã mã ate ne atỳj rĩt? — hajỹr.

11 Mã me cumã:

— He jũm japrỳ te Jeju ata te ri harcô to pjê incrirene carẽc na ton, ne ito na imã to ihtẽm ne imã: “Tẽ ne Kujahêc jõ cô kam ca akuc cuhhõ” hane. Wa ma mõ ne ite ikuc cuhhõn, ne amji jaxàr, ne ramã ampo cunea pupun to imõr pyrentu — hane.

12 Mã ahna mehcukij ne me cumã:

— Jõ ri mõrmõ jũm xũmre ita apu mõ? — hane. Mã mecumã:

— Pỳpỹn — hane.

13 Mã ma me cupê Parixêw catêjê wỳr, por pê mam into tũm ata to me mõ. 14 Ne por pê amcro nõ na Jeju carẽc to ihtô, ne hũmre into tũm ata na to tẽ, ne hacpỹa mã cumã irĩt to impej jõ amcro ata kam pê mehkôt xà jõ amcro. 15 Mã Parixêw catêjê kwỳ te ahna mehcukij ne me cumã:

— Jũ mã mã cute aton ne acaprãr? — hajỹr. Mã mecumã:

— Pjê kam cute harcô mẽn ne to carẽc to ihtô, ne ito na imã to ihtẽm, wa ma tẽ ne ite ihcuhhõn ne irĩt pejpyrentu — hajỹr.

16 Mã Parixêw catêjê kwỳ ajpẽn mã me harẽn to:

— Por jũm te ita ton ata pê nee Pahpãm tekjê nare. Xàajkĩ Pahpãm jarkwa kôt mã cute hàpên xà ita to hajỹr? Ne mẽr ampo na mã nee me pahkôt xà jõ amcro ita pupun, ne amji mã hũpanare, ne ihtỳj apu ahna apê? — hane. Mã mehkwỳa nõ te me cumã harẽn to:

— Xà quê ajkĩ jũm kêanre ata ihtỳj carôat to ampo pihho catia pejti atajê nõ ton to hane? — hajỹr. Ne ajpẽn mã me harẽn itacwỳrjapê cute amji to me ipicapôn. 17 Mã hipêr Parixêw catêjê atajê te ahna mehcukij ne me cumã:

— Ca ate cute amã ato tũm caprãr na amji jarẽn, nejũ mã mõrmõ ca to amji kam gapac to? — hajỹr. Mã mecumã:

— Imã cupê Pahpãm jarkwa to ihcakôc catêjê nõari — hane.

18 Mã Juta catêjê jõ pahhi kwỳ te nee amji mã, jũm te into tũm caprãr, mã hacpỹa mã irĩt na, amjimã me to hajỹr nare. Cwỳrjapê ri cute hũm me inxi na mehàhwỳr, cute ahna mehcukij prãmte. 19 Mã hỹrmã me cator, mã cute ahna mehcukij to:

— Xà me akra mã ita? Pê ca into tũm ita na ihpỳm na me imã harẽ, nõ na mã ajte ihtỳjrĩt? — hajỹr.

20 Mã hũm me inxi atajê me cumã:

— Wa cupê me ikra na ite me hahkre pej, ne pê into tũamna ihpỳm. 21 Ne pom jũm te caprãr, mã hacpỹa mã irĩt ita na ri, me ipê hahkre kêatre. Ne ramã ihkàhtu. Mehcukij, quê ha taa me amã amji jarẽ — hane.

22 Ampo na pê hũm me inxi me cumã harẽn to hane? Nee mã ampo na nare. Quê ha jũm te Jeju pê, por pê Crixtô to Pahpãm awjahkre ata jarẽn pejti to harẽn na, quê ha ma cute me cuprõn xà pê me jũm cator, quê ha jũ caxuw hacpỹ ne amji jaxàr nare na, cute me hahkre pej. Na ri nee me kam mare mãme cumã Jeju pê me pahkritxwỳ jarẽn xà impejti nõ jarẽn nare. 23 Cwỳrjapê pê me hũpate hũm me inxi me cumã harẽn to:

— Ramã ihkàhtu, mehcukij, quê ha taa me amã amji jarẽ — hane.

24 Ne hipêr cute me hũmre into tũm ne hacpỹa mã irĩt ata na hàhwỳr, ne me cumã:

— Me imã ahêj jicu ne Pahpãm kam mare mã ampeaj kam me imã gũjarẽn na amji to. Ampo na? He waite me Jeju kêanre na me hahkre pej — hajỹr.

25 Mã into tũm ne hacpỹa mã irĩt ata me cumã:

— Pỳpỹn, ipê Jeju kêanre ita na hahkre kêatre, ne ampopijakrut ita na ri imã amji jahkre pej he, mam ito tũm, newa itỳj ita caxuw rĩt — hane.

26 Mã hacpỹ ma mã cute mehcukij to:

— Jũ mã ri cute aton ne amã ato tũm ita toimpej? — hajỹr.

27 Mã hipêr me cumã:

— Wa ite ramã me amã amji jarẽn, ca ma ame ipar caca. Nemẽr ampo caxuw mã ca hipêr ahna me icukij? Xà ca ha ajkĩ hanea ne amji to ihkôt me apa catêjê na me amã amji to prãm? — hane.

28 Mã cute me hũn kam ihtẽm, ne me cumã:

— He apêa ri ihkôt apa catê, ne me ipê ri Mojxe xwỳ teamji kam hapac xà kôt me ipa catêjê. 29 Ne wa ite me Pahpãm te Mojxe xwỳ mã ihcakôc, necumã ampo to hahkre na me hahkre pej. Ne jũm xũmre ita, wanee ite jũ rũm cator na me hahkre pej nare — hajỹr.

30 Mã me cumã:

— Pỳhàpà! Xãmte me apê jũ rũm cator xà ita na hahkre kêatre? Cakrô mã ihtỳj cute icaprãr, wa hacpỹa mã itỳj rĩt. 31 He me pahcunea mã Pahpãm te mehkên catêjê imparnare na me pamã hahkre pej. Ne por amji mã me Pahpãm cupa, ne me cumã, cute ampo na ihprãmti xà ton to me ipa atajê ri, ihtỳj quêt me kampa. 32 Ne cu rỳ jũ caxuw pjê te amji ton pê mã, me pahnõ te jũm te jũm to tũam na ihpỳm ata caprãr na me harẽn parnare. Mã ihtỳj Jeju te icaprãr, ne imã ito to impej. 33 Xà quê ajkĩ Pahpãm ihkujahêc nare, quêihtỳj ajkĩ ampo itajê nõ to? Hãpà, ne imãa ampeaj kam ri Pahpãm te ihkujahêc — hane.

34 Mã cute mempar, ne me cumã harkwa to:

— Pê ca apỳm pê akên ton kam tẽ, nõna mã ca ajte cormã me ipê pahhi catêjê mã ampo tohahkre prãm? Me ipê ahna ihkaj na! — hajỹr. Ne ma cute põ mã cute me cuprõn xà jũrkwa pê me into tũm atato cator. Cwỳrjapêquê ha nee jũ caxuw hipêr cute me cuprõn xà ata mã hàr nare.

35 Mã Jeju te, cute me cuprõn xà jũrkwapê põ mã me hũmre ata cator na harẽn par. Na ri apu hapê ne ahna cator ne cute ihcukij to:

— Xà ca ha ajkĩ atỳj Pahpãm kra to amji mã ahimpej? — hajỹr.

36 Mã cute Jeju mã harkwa to:

— Ijõ Pahhi, jũm pê mã Pahpãm kra ita? Wa itỳj amjimã to ihimpej — hajỹr.

37 Mã Jeju te cumã amji jarẽn to:

— Pom ca ipupu ita! He pa wa amã icakôc — hajỹr.

38 Mã hũmre ata te Jeju kĩnte amji crire na Jeju mã amji jarẽnprãm to, cuna mã ihkõn krã na hỹr, ne cumã:

— Wa ha itỳj ato amji mã ihimpej — hajỹr.

39 Mã Jeju te cumã hũjarẽn to:

— He wa nee mento tũm caprãr to pit mã pjê ita wỳricator nare. Ne ite mempej te amji kam me hapac xà me, mehkên te amji kam me hapac xà pupunprãmte wa icator. Ne wa itỳj mento tũm caprã, mãr quêhacpỹa mã me irĩt pej, ne ihtỳj me ampo cunea pupun to me ipa. Ita jĩkjê na mã wa itỳj me cumã Pahpãm te amji kam hapac xàto hahkre to ipa, mãr quê me hahkre pej, ne ihtỳj ihkôtme ipa. Mã mehkwỳ ihtỳj, cute ramã me Pahpãm jarkwacunea jahkre pej na ame amji cãmjĩ, atajê pê ihhêj rũm mento tũm pyràac. Ampo na? He nee cormã me cumã Pahpãm jarkwa jahkre pej nare, na wa ite me cuna mã icakôc to prãm to, wamehwỳr icator — hajỹr.

40 Mã curi me cahê na Parixêw catêjê kwỳ ihcuhhêatajê te me Jeju cukij to:

— Pỳhàpà! Xà mõrmõ ajkĩ hanea ne me ipê mento tũampyràac, ne me ipê Pahpãm jarkwa jahkre kêatre? Hãpà! He wa itỳj ite me Pahpãm jarkwa jahkre pej — hajỹr.

41 Mã Jeju me cumã:

— Quê ha jũm to tũm amji jarẽn to: “Me anõ itehcajpa, jũ wỳr wa ito tũm ita kam ahte mõ” hane, ne me kam mare mã kre kam ihpỳm na, quê ha nee taa amji curê caxàr nare. Ne me apê Parixêw catêjê te neeme hajỹr nare. Me apê jũm to tũm te amji jahkre kêatre ata pyràac. Ne ihtỳj irĩt na amji jarẽ, ne ma jũm te ihtehcajpar na apuihcaca, ne amjia kôt kre kam ihpỳm ata pyràac. Ne ca me amji jarẽn to: “Ramã meimã Pahpãm jahkre pej” hajỹr cakrô, cormã me apê Pahpãm jahkre kêatre. Cwỳrjapê ca rỳ ate me amji curê caxàr ne me akên mã me axàr — hane.