1 Inxũ Cati! Inxũ Cati!

Ampo na mã ahte ate irer to hajỹr?

Wa tee ate itehcajpar xà na icagãgãa kam ana ahwỳ,

ca nee ate ipar nare!

Ca ihhêj ne ipê ampỳa mã apu mõ.

2 Wa ihcaprỳ na ite amã icwỳr to pyt,

ne ite amã ijàkjêar to apẽ,

ca nee ate imã jũ mãn nare.

Cakrô wa itỳj cormã amã akij,

ne nee wa ha uu ne ijàkjêr jicu nare.

Wa cormã pa xàhte ikrihkrit ita na ikrĩ,

ne ramã ijõtnare na, ina amcro jàhtô.

3 Cakrô, wa itỳj ate apejti,

mehcunea na atetetti to Pahhiti krĩ xàcatihti ata kam gỹr na,

imã gahkre pej.

Ne Ixaher catêjê cunea acatihti na amji mã me garẽn to me ipa.

4 Pê me iquêtjê ihtỳj ajco amji mã me ato ihhimpej to me ipa,

cwỳrjapê pê ca atỳj mehkên pê me to acato.

5 Pê ajco me amã akij,

pê ca ajco atỳj mehkên xà atajê pê me to gapôj.

He nee cute ihcaprỳ na amji mã me ato ihhimpej nare.

6 Ne mehkĩnte nee ipê me hũmre te ihkên xà pê amji pytàr xà ata nare.

Ne ihhêj rũm ipê ampo cô pyràac, ne icrire, ne icarôt peacre.

Mã mehcunea ame ixũn, ne ma amji tête ame icurê.

7 Ne ame ipupu atajê cama ame ina xwỳ,

ne ame ina acxa,

ne me imã:

“Gõ Pahhiti ita te ramã amã hikran! 8 Pom ca ate gõ Pahhiti to amji mã hajỹr ita?

Mẽr ampo na mã nee akênmã axàr xà ita pê cute ato cator nare?

Quê gõ Pahhiti ita mã akĩn na mã,

quê ha rỳ pêa mã atehcajpa,

ne akên mã axàr xà ita pê apytà!” hane.

Hõ, ame ina xwỳ to hane.

9 Ne cute me ijarẽn to hajỹr cakrô,

pê ca caa, ipỳm pêa mã, ajpên itehcajpar kam tẽ,

ne imã icaca xà gõ, ne icrire naa mã ijamãr kam tẽ,

ne cormã ijamãr to apa.

10 Ne ipỳm pêa mã ri, ipê atekjê,

ne apê ijõ Pahpãm rohnỳtti mã.

11 Ne hamre, wa ramã ikêan kam ipa,

na ca nee irer ne ipê gũjawry nare.

Ampo na?

He nee aràn xà na

jũm te itehcajpar xà caxuw hamreare.

12 Ramã me icurê xwỳn catêjê te me ito kên prãmte me ikrãhtu,

ne me cupê ihhêj rũm

Paxã jõ pjê jõ pryti xũmti jàprêhti te apu ikam imprar atajêpyràac.

13 Ne me cupê rop tycti hãn ne pryre mã wa japrã,

ne cumã carõrõ,

ne kam intoj ne ihcakê, ne ihcãmxa

ita kôpit na mã,

ihtỳj me ito kên to prãm.

14 Ramã icarôt jamre xà ita pê ihhêj rũm

cô te pjê kam ipijaxwỳr ne hamre.

Ne ajpẽn kam ihi ihcuhhê xà itajê,

ramã apuajpẽn pê hapôj partu,

ne ihcuhhê xà kaj na apu ihcuhhê.

Ne ina cuhkõnre pê ihhêj rũm

amcro te apu penhê to ihhorhot,

ne ramã ipigãn to mõ.

15 Ne ramã imã kôar to kôr,

ne ijõkre kam ihhêj ne pjê jacrô ne incràre.

Mã ijõhto te ijapto na impỳn ita kam,

ca ihhêj ne ityc na apu icãmjĩ,

ne ihhêj ne ate pjê jacrô ita kam irer.

16 Ne mehkrã kên catêjê te me ito kên prãmte, me ina cuprõn.

Ne me cupê ihhêj rũmrop te apu pryre na cuprõn ne ihkrã,

ne ajpẽn pê ihcyt to ipa atajê pyràac.

Ne ramã cute ame ipê ipar me ijũhkra caxwỳrti.

17 Ne wa icakrô te amji capô, ne ihire ita kam,

quê ha ihtỳj me ihi cunea pupu.

Ne me icurê xwỳn catêjê cama ame ikôpĩr to me ipa,

ne ite amji pupun xà kêanre ita pyrên ame hakry.

18 Ne cute ikà to ajpẽn mã me ipicràn,

ne ihkôt kẽn to ajpẽn pê me hũhkàr.

19 Ijõ Pahhiti!

Nee ca ipê gũjawry nare,

ne apu awjarêa ne itehcajpa!

He apêa ri ikên mã ixàr xà ita pê ipytàr catê!

20 Ityc xà ita pê ipytà!

Ne me icurê xwỳn pê me ikwỳ nare pê rop pyràc itajê pê ipytà.

21 He me cupê ihhêj rũm rop tycti pyràac,

ne me wa te icaxwỳr xà ata pê ipytà!

Ne jũ wỳr wa ahte me cupê ihhêj rũm

pryti xũmti jàprê jĩpàr te icaxwỳr xà ata pê amji pytà!

Ne caa, ca ha atỳj me icurê xwỳn itajê pê ipytà!

22 Ca ha ito hane,

wa ha me ikwỳ cunea mã

ate ikên mã ixàr xà ata pê ito acator na garẽ,

ne itỳj cute me cuprõn xà kam mehcuneamã

apejti na garẽ, ne me cumã:

23 “Me apê Pahhiti kôt me apa catêjê,

ca ha me gõ Pahhiti to me gàmnãn prãmte me cumã:

‘Imã acupa hyre nare, na wa itỳj garkwa kôt ipa!’ hane.

Ne me apê Jaco tàmxwỳ tàmxwỳ atajê,

ate me amji mã Pahpãm cupa prãm to, ca ha me cumã:

‘Apeaj to apej! Ne ampo cunea jirôa pê acati!’ hane.

Ne me apê Ixaher catêjê pê Pahpãm na mehkwỳ atajê,

ca ha Pahpãm to ate mecati prãmte me cumã:

‘Apyxit peaj pê ri me ijõ Pahhiti pê Pahpãm!’ hane” hajỹr.

24 Ỹhỹ me ikwỳ,

he Pahpãm nee amji tête

me cupê hamreare atajê curê to ipa nare.

Ne nee cute me amji pupun xà kêanre to

me amji pupun to me ipa atajê to hãn ne hapac kêt nare.

Ne nee me cupê amji to ipimxur to ipa nare.

Na quê ha jũm amji tehcajpar xà na cumã akij,

quê ha ihtỳj jũm ata kampa.

25 Ỹhỹ Ijõ Pahhiti, pê wa ikên kam ipa xà ata kam amã:

“Ate itehcajpar jahpan xà na, wa ha itỳj amã ampo gõ” hane.

Cwỳrjapê wa ha cute me cuprõn xà kam,

cute me ato amji kam hapac prãmti atajê cunea kam mare mã,

amã ite ampo na amji ton xà ata to.

26 Ne wa ha mehcunea mã amji kĩn nõ to,

ne me cupê hamreare atajê mã harte.

Quê ha me cumã akĩn atajê me amã:

“Mehcunea jirô pê apej ne acati” hane.

Na quê ha hõtpê amji to ipijapar pej rohnỳtti mã.

27 Ỹhỹ me ikwỳ,

quê ha pjê cunea kam krĩxàre Pahpãm to amji kampa,

ne to amji japackre.

Quê ha jũa ri amehkrĩ atajê,

ihtỳj Pahpãm wỳrme apkjê.

Ne quê ha ampo kra cunea me hõmpun xà ata kôt,

Pahpãm to cute amji kam me hapac prãmte mecumã:

“Apêa ri me ijõ Pahhiti,

na ri mehcunea jirôa pê me imã me akĩn” hane.

28 Pahpãm pê me pajõ Pahhiti,

ne cupê pjê kam mehcunea to ihhimpejcatê,

ne ihtỳj ampo kra cunea to ihhimpej.

29 Ne cute amji to me cati prãmti atajê,

quê ha ihtỳj cuna mã mehpỳpỳm,

ne mehkryjre na cumã me amji jarẽ.

Ne cu me pahcunea me pahtycto mõ atajê,

quê ha Pahpãm cuna mã mehkõn krã na me jỹ ne me cumã:

“Wa itỳj amji mã me acupa” hane.

30 Na quê ha mehtàmxwỳ tàmxwỳ ihtỳj amji mã me hũpa,

ne me kam hapac to me ipa,

ne ihtỳj mehkra mã me Pahhiti jarẽn to me ipa.

31 Quê ha me kampa,

ne hanea ne cormã nee mehpỳpỳm nare atajê mã me harẽn to:

“Me pajõ Pahhiti pê Pahpãm

pê ajco mehkwỳ kên mã mencjêj xà atajê pê me hũtà” hane.