1 Mã Pirat te krãhtare kwỳ mã pryti kà kamwakỳre to Jeju cahhyr kêanre na harkwa. 2 Mã krãhtare te me to hapactu na me ajpẽn par, ne me amji mã:

— Hacme, ne ame to pajapactu — hajỹr. Ne cute hômjĩ to me cumã pahhi krãhkà, ne ihkrã mã me haxàr. Ne cute me hõ pahhi kà intepti ata mã me haxàr, ne ahna me hãm, mã xa. 3 Mã hỹrmã me pra ne ahna me ahtêp ne me ahna xwỳ to:

— Hàpà Juta catêjê jõ pahhi, ampeaj kam apej, ne ampeaj kam atỳj! — hane. Ne ajco mehũhkra krã to mehcahhy.

4 Mã hipêr me hàhtôti atajê wỳr Pirat cator, ne mecumã:

— Me ikampa! Wa ha ajpên Jeju ita to mõ, ne me acuna mã hãm. Ne imãa ihhêj ne nee cute ampo kên ton nare, iteihcuran xà caxuw. Ne mẽr ampo na wa ha ajteihcura? — hane. 5 Mã Jeju cator, ne ihkrã na hômjĩ te me hõ pahhi krãhkà ata ajêt, mã ihkà intepti kam xa. Mã Pirat te me cumã harẽn to:

— Nãmhã hũmre ita xa he! Me hõmpu, imãa ramã ihhêj ne cute amji pupun xà kêanre na amji pupun — hajỹr.

6 Mã Pahpãm mã mehcajrẽn catêjê jõ pahhi kwỳme, cute me Pahpãm jũrkwa jamãr catêjê me, cuteme Jeju pupun, ne me caràr kam me to ihtẽm, ne me caràr to:

— Pĩ kam me axô! Pĩ kam me axô quê ty! — hane. Mã Pirat me cumã:

— Wa nee ite kam ampo kên mã icator nare ita kam, wa neeihcuran nare. Quê ha me amã ihcuran prãm na, ca ha me caa, ate amji kam me gapac xàa to me to mõ, ne pĩ kam me axô ne mehcura — hane.

7 Mã Juta catêjê me cumã:

— Me icaca xà jõ kàhhôc kam, cute harẽn to: “Quêha jũm te cupê Pahpãm kra na amji jarẽn na, quê haihtỳj mehcura” hajỹr. Cwỳrjapê ca ha atỳj ite mehcuran xà na me imẽ, wa ha mehcura — hane.

8 Mã Pirat te, Jeju te Pahpãm kra na amji jarẽn na, me harẽn par, ne ampeaj kam cumã hũpa. 9 Mã ma hacpỹ mã hũrkwa mã hàr, ne cute Jeju cukijto:

— Jũ pĩn mã ca ajte acator? — hajỹr. Mã nee Jeju te cumã jũ mãn nare. 10 Mã Pirat te cumã harkwa to:

— Xà amã imã acakôc prãm nare? He xà amã itỳj iteacuran xà me, amã hikran xà na, apê ijahkre kêatre? — hajỹr.

11 Mã Jeju cumã:

— Quê ha kỳj rũm côjkwa kam Inxũ pĩn ate ito hajỹr xà ita caxuw amã acarôt cator nare na mã, ca ha nee ito jũ mãn nare. Ne por jũmjê te amã ijõr atajê te ri girôa pê ito kêanre — hane.

12 Mã Pirat te ihcakôc xà ata na kam hapac, cwỳrjapêri ihtỳj cumã Jeju mã hikran prãm cakrô, mã Jutacatêjê ame cumã caràr to:

— Ca ha ate cumã hikran na, ca ha nee ramã apê pjê cunea jõ pahhiti pêXexa ata jõ ikwỳ nõ nare! Ne por jũmamã cupê pahhi na amji jarẽ ata pê ri gõ pahhiti, ne cupê Xexa curê xwỳn! — hane.

13 Mã Pirat te ita kam hapac, ne põ mã Jeju to cator. Por põ pê kẽn te ihcahty, mã Juta catêjê te me harkwa na me cumã haprỳ to Capata ata wỳr Jeju to cator, mã xa. Mã Pirat te ihkrĩ xà kam mehkên catêjê cukij xà ata kam hỹr, cute Jeju kên mã mẽn xà caxuw. 14 Ne pê amcro ata kam, cute me Hakren xà jõ amji kĩn kam me to ihtẽm xwỳjrea na, ramã pyt ajmãr me pahkrã jimoac kam hỹr kam pê me to hane. Mã Pirat te Juta catêjê mã hũjarẽn to:

— Ihnãm hã, me gõ Pahhi xa he! — hajỹr.

15 Mã cute me caràr to:

— Quê ha ty! Pĩ kam me axô, quê ty! — hajỹr ita na. Mã Pirat me cumã:

— Xà me amã pĩ na me gõ Pahhi ita xôr, mã kam ihtyc na to prãm? — hane. Mã Pahpãm mã mehcajrẽncatêjê jõ pahhi kwỳ te me cumã harkwa to:

— Me imã Roman jõ krĩ kam, pjê cunea jõ pahhiti pê Xexa pê me ijõ pahhiti ata pyxit peaj. Na ri nee iràn xà na me imã me ijõ pahhi nõhamreare — hajỹr.

16 Mã hamre Pirat te pĩ na cute me Jeju xôr xà caxuwme cumã hõr, mã ma me to mõ. Ne cute me Jeju mã pĩhticatia te amji kam ihcapa ata jõr.

17 Ne ma kẽn nõ ata wỳr me to mõ. Ne Juta catêjê jarkwa na kẽn ata japrỳ te Corcota, ne ihkôt harẽn xà te “Mehkrãhhi jõ kẽn”. Mã ma cute hõ pĩhti ata pỳn ne cupjê.

18 Mã curi me to cator, ne cute pĩ na me hir, ne ahna hũhkra me ihpar kam wakỳre cuhhêc, ne ahna me hãm, mã kỳaj pê kam ajêt. Nehanea ne cute ihkôt me hũmre to me ipijakrut, ne hajỹar ne ajtea me hõ pĩa kam me haxôr, ne ahna me hũxwỳr. Mã Jeju mehcote na ajêt, mã cute me hũjê ne me to ajêt.

19 Mã Pirat te Jeju na ihkàhhôc jipêj, ne cute ihkrãcwỳrpê pĩ na inxôr na hũjahkre. Ne pê krĩxàreincrê jarkwa na ihhôc atajê pê Juta catêjê jarkwa me, Roman catêjê jarkwa me, Crec catêjê jarkwa. Ne ihkàhhôc ata hũjarẽn to:

— Naxare jõ krĩ pĩn hũmre pê Jeju cator, ita pê riJuta catêjê jõ Pahhi — hane. 20 Pom curi cute pĩ na me Jeju xôr ata, krĩna pire mã, na ri ihtỳj Juta catêjê jàhtôa ne cute mehkàhhôc ata cahyt. 21 Mã Pahpãm mã mehcajrẽn catêjê jõ pahhicatêjê te Pirat mã ihkàhhôc ata to mehhimpej to:

— Pom ate ahna ihhôc to: “Cupê Juta Catêjê Jõ Pahhiti” hajỹr to ita ca ha antuw, ne “Cutea amji jarẽn to, ‘Ipê JutaCatêjê Jõ Pahhiti’ ” hajỹr na, ca ha ihhôc — hajỹr. Mã Pirat me cumã:

22 — Pom wa ite ahna ihhôc ita, quê ha hàhhuc rohnỳtti mã — hane.

23 Mã krãhtare atajê te pĩ na me Jeju cakrô inxôr, mã ihcakrô ajêt. Jirô pê mã ri cute me cwat itajê te ahpỹanre na ihkàto me amji tỳj. Ne hanea ne cute me ihkàte ihpar kõn na iwrỳc tu ata pyr. 24 Ne cute me ajpẽn par to:

— Cu ha nee ame ihkà impejti pijapỳn xà nare ita cokjêr nare, ne cama kẽn to ihkôt me amji pê hũhkà. Ne me pahnõ te amji pêto hũhkàr na, cu ha me pahnõ amji mã ihcunea nacupy — hajỹr. Hõ, pê ramã Pahpãm jõ kàhhôc ita jarẽan xà na pê hane, pê harẽn to:

25 Mã pĩ na Jeju ajêt ata krac ri cuna mã wa Jeju menxi me, ihtõj xa, mã hanea ne me cahi na Marij Matarkwỳj me, Marij nõ pê Cropa me hĩxi ata, hanea ne xa. 26 Mã Jeju te ipupun, ne icahê na inxi pupun, ne cumã:

— Inxê, por ijaxà kam acahê na akra xa ata — hajỹr. 27 Ne imã:

— Jowãw, por ana acahê na xa ata — hane. Cwỳrjapê wa ite ahna amji caxàr, mã ijũrkwa kam hõtpê icahê na ihkrĩ.

28 Jirô pê mã ri Jeju te ramã pjê kam hàpên xàcunea jipêj na amji jahkre pej, na ri cute harkwa to:

— Ampeaj kam imã kôr — hajỹr. Ne pê ramã Pahpãm jõ kàhhôc harkwa jarẽan xà na ri cute ihcakôc xà ita to hajỹr.

29 Mã curia ampo cacô xwa xỳre na kyre pê hĩ ahwỳ ata xa, mã cute ampo pĩhhê nõ na, me ampo rerecti ita xôr, ne me to inco, ne Jeju jarkwa mã me haxàr. 30 Mã cute to ihkõm ne harkwa to:

— Hamre, ramã ite ijàpên xà cunea jipêj, mãhamre! — hajỹr. Ne pea imput pec to mõ ne ihtyc.

31 Mã Juta catêjê te Pirat na me hàhwỳr, quê mehũmre incrê ne pĩ na me harij atajê te kẽhkẽ, mãrquê cyt ne amehtyc pa, quê pĩ pê me to irôrôc pa. Ampo na? Ramã mehkôt xà jõ amcroa kam hàhhuc to mõ, na ri ma apu pĩ kam me jũmjê tyc ne ame harij na ame to ihcaca. Ampo na? Por ajpên iràrà mõ ata na ri ramã cute me amji kĩn catia kamme to ihtẽm xà. Na ri Pirat te mehte kẽhkẽn na hõkrãhtare mã harkwa kujahêc. 32 Mã krãhtare te, por pĩ kam ame harij atajê tekẽhkẽn. Ne mam cute, por cute me ipijakrut to me Jeju jũjê atajê nõ te kwĩn, ne ihkôt cute me ita te kwĩn. 33 Jirô pê mã ri ma Jeju wỳr me mõ, ne ahna me hàhtêp ne cute me hõmpun, mã ramã ihtyc tu ne ajêt. Cwỳrjapê ri nee cute mehte kwĩn nare. 34 Mã krãhtare nõ te hõ kruwxwa to Jeju jĩpê kamcaxwỳr, ne cumã caxàr, mã ihkôt mare mã caprô me côajxwỳ.

35 He wa ite ito ita to hõmpun, na wa iteihkàhhôc ita kam me amã harẽn, mãr ca hanea ne me kampa, ne catyt kam Jeju to amji mã me ahimpej. He wa nee ame amã ihêj xi jarẽn nare. 36 Pê Pahpãm jõ kàhhôc Jeju jarẽn to:

— Quê ha nee ahi nõ impàt nare — hane. 37 Ne pê hanea ne kam harẽn to:

— Quê ha me, por kruwxwa to cute me jũm caxwỳr ata pupu — hane, ata na ri cute hajỹr.

38 Ne pê Joje pê Krĩhkàhti jõ krĩ catêjê nõ ata mã, Juta catêjê jõ pahhi kwỳ cupa, na pê aracricupê Jeju kôt ipa catê. Mã cator ne cuteJeju jĩ na Pirat wỳr. Mã Pirat te cumã hahkre. Mã ma Joje tẽ. Mã ma ihkôt, por pê caxwa ri Nicotem mõ ne Jeju pupu ata tẽ, ne cutepĩ pê me Jeju jĩ caxàr. 39 Ne Nicotem ata ampo pĩ pàrkà cuxwati atame, ampo pĩhhô pê ràm cuxwa pyràcti ata pỳ, ne to kwỳ ata pê hũtĩ trĩnta quir. 40 Ne me hũmre pijakrut atajê te me Jeju jĩ na hàhwỳr, ne ma me to kwỳ, ne cute ampo kà ata me, ihnõ cuxwa pê ràm cuxwa pyràcti ata to me Jeju cunea cukên, ne cupẽhkà jakati impejti to mehcupu. Hõhõ, pê Juta catêjêcute me amji jarêt xà caxuw ajco me amji to hane.

41 Ne por pê curi pĩ na me Jeju xô ata cahê na, pĩxô jõ pjê kam, cute me amji jarêt xà caxuw kẽn kre tuwti nõ ata, mã rỳ nee jũm te kam amji jarêt nare. 42 Ne pê Juta catêjê mã amcro te amji mã incjêjxà pê, ajco pytre kam ajpẽn mã acjêj. Ne caxwa pê, pê ajco ramã amcro intuw amji mã acjêj. Ne ma apu amji kĩn kam mehkôt xà kam mehtyc to me hàpên tête me ajpẽnmã. Na pê me hũjarêan kam pĩxô jõ pjê kam kẽn krenõ ata kam, me Jeju jĩ xi.