CORINTI JÕ KRĨ WỲR
Hapu Na Pawrô Jõ Kàhhôc
Ỹhỹ, pê Pawrô pê Jeju jarkwa na memprar catêjê nõ. Ne pê Jeju na mehkwỳ jakrã Corinti jõ krĩ kam mehkrĩ atajê wỳr, pom cu me hõ kàhhôc cahyt ita kujate. Na pê hapu na hõ kàhhôc ita japrỳ pê Corinti Jõ Krĩ Kam Jeju Na Mehkwỳ Jakrã Mehkrĩ Atajê Wỳr, Hapu Na Pawrô Jõ Kàhhôc (2 Corinti).
Ne hõ kàhhôc itajê kam, cute ampo cunea to mehapackre, mãr quê nee me cumã mehtyc xà cupa to me ipa nare. Ne hanea ne cute me pamã me pajĩ tuw jarẽn.
He nee ite Corinti wỳr Pawrô te hõkàhhôc kujahêc atajê cunea to ipintuw nare, ne ihkwỳ jatujre atajê ri ite to ipintuw.
4
Pê Pawrô Pahpãm mã hàpên na amji kôt harẽ
2 Corinti 4.1-18
Me Hàpên Xà 19.23-40; Roman 1.11-12
1 Pê Pahpãm hàhcaprĩa kam, me ipê harkwa na me iprar catêjê na me ipyxwỳ ita kam, wa ha nee intête me amji hi kwĩn, ne ame ipec, ne me cumã ijàpên jicu nare. 2 Ne wa quêt ampo kên pimxur cunea kam me pahpahàmti atajê cunea, wa ma ame ton caca, ne nee ame cumã me ihêj to me ipa nare. Ne neewa Pahpãm te harẽn xà kaj na me amã ihcupan xà nõ jarẽn to me ipa nare. Ne wa quêt catyt kam me amã hirãa pê Pahpãm jarkwa jarẽn xà tocapô to me ipa. Ne wa Pahpãm kam mare mã, me cumã harkwa jarẽn to me ipa, mãr quê mehcunea, wa nee ame ihêj xi nare na, me ijahkre pej. 3 Nãmri quê ha jũm te nee ite me ijũjarẽn xà ita par jahkre pej nare na, quê ha nee incwỳrjapê amji mã me icuhtom nare. Ne ampo na mã nee me kam hapac jahkre pej nare? Jũ wỳr quê ramã me ipictor to me mõ ita kamme kam hapac pej. 4 Ne quê jũm ato caxwỳ, ca ha nee arĩt nare. Ita jĩkjê na mã Xatanaj pê pjê ita kam, cute amji kam me hapac xà kên jõ pahhi ita te, me cupê cute amji kam me hapac xà to kên, mãr quê neeJeju Crixtô pê Pahpãm kra pê ampo kên catia pê me hũtàr catê ata na me hahkre pej nare. Jeju pê Hũam pyràc, na quê ha nee Pahpãm to amji mã mehhimpej nare ita kam, quê ha nee Jeju Crixtô kôt me Pahpãm jahkre pej nare. 5 Ne nee wa me pa, amji to me amã me icakôc nare, ne quêt Jeju Crixtô pê me pajõ Pahhiti to, wa me amã me ijũjarẽn to me ipa. Ne Jeju cwỳrjapê ri me ipê me amã me ijàpên catêjê pit. Cwỳrjapê wa ame amã me amjijarẽn to me ipa.
6 Ne pê Pahpãm pjê ton xà ata kam, awcapàtkô cunea to hamre prãmte, harẽn to: “Amcro” hane. Hamre pê amcro pyrentu, pahte me ampo cunea pupun, ne me hahkre pej xà caxuw ahcujro pyrentu. Ita jĩkjê na mã, ihhêj ne Pahpãm te me pamã pahte amji kam me pajapac xà cujro, cu ihkôt me ampocunea kampa, ne me hahkre pej. Ne Jeju Crixtô tea ri me pamã Pahpãm to ipipẽ, na cu ha ihkôat me Pahpãm carôt jàhcujro jahkre pej.
Põ rũm me pajĩ peacre cakrô, mã kam Pahpãm Carõ Pejti carôt tỳj ihkrĩ
7 Ne pjê te pot na kyre pê hĩ jàhwỳr, ne ihcacure, ne ihkre kam, ampo pejti na hĩ jàhwỳrti te hipu, ita na mã me ite. Ne me ijĩ peacre, neihcacure cakrô, mã ihtỳj me amã ampo pej pit jarẽn to ipa. Na quê ha mehcunea, ite Pahpãm jarkwa kôt mehcunea mã harẽn xà pejti jarẽn ita na me ipupu. Ne Pahpãm te ri imã caxuw ampo cunea jirô pêcarôt tỳjti ita jõr na me hahkre pej.
8-9 Wa ampo cunea kam me amji pupun to kêanre cakrô,
mã nee cute me itohjê nare.
Ne ampo kwỳ kam amji jahkre kêatre cakrô,
wa nee amjia kôt ite me hicu nare.
Ne me icurê xwỳn ame icapôr cakrô,
mã nee Pahpãm te meimã hikran nare.
Ne hãn ne ihtỳj me ito kên cakrô,
wa nee me ijamre nare.
10-11 Ne Jeju te me pancwỳrjapê mehcuran xà mã amji jõr, mã cute mehcuran. Jĩkjê na, wa itỳj me amã Jeju te amji kam hapac xà pejtijarẽn xà mã amji jõr to ipa. Ne ite me amã harẽn xà ata kôt, ca ha me atĩrrohnỳtti mã na me apa xà ata, ihtỳj mehcunea mã Jeju te hacpỹa mã ihtĩr na harẽn. Ne wa Jeju cwỳrjapê amji to me ikên cunea japên to me ipa. 12 Ne ite amji to me ikên japên to me ipa xà ita kôt, ca ha me atĩr rohnỳtti mã na me apa.
13 Pê pahhi xwỳ pê Tawi ata, ita na Pahpãm jarkwa kôt hõ kàhhôc kam ihhôc to hane he:
“Imãa, Pahpãm jũjarẽn xà ita pê nee ihhêj xi nare,
na wa itỳj amji mã to ihimpej,
ne me amã harẽn to me ipa” hane.
Na wa itỳj cuxà Pahpãm to amji mã me ihimpej to me ipa, ne itỳjcuxà me amã Pahpãm jũjarẽn xà jarẽn to me ipa. 14 Ne ampo na mã wa Pahpãm to amji mã me ihimpej? Wa ite, cute hacpỹa mã me pajõ Pahhiti pê Jeju to ihtĩr na me hahkre pej, na quê ha ihtỳj cuxà me ito itĩr, ne hanea ne me ato me atĩr. Na cu ha pahtỳjjũ caxuw me pahcunea cuxà hỹrmã me api, necahê na ame papa rohnỳtti mã. 15 Ne me acwỳrjapêa ri, ite me amji pupun xà kêanre itajê jàhtôa to hàhtô. Ne me imã pjê cunea kam, me hàhtôa ne Pahpãm wỳr me ipipkjêr na me to prãm, mãr quê Pahpãm mehcunea caprĩ, ne mehkên pê me hũtà. Mãr quê me hàhtôa to me hàhtô, ne Pahpãm te ampo kên pê me hũtàr pyrên me hakry na, cumã me amji jarẽn catia to me ipa.
Cu ha pahtỳj Pahpãm to amji mã me pahhimpej kam me to pancrà
16 Ne amcro cunea kam, me pahkà amji to hamre to mõr cakrô, mã me pahcaxwãm pê pahte amji kam me pajapac xà ihtỳj amji to intuw to mõ. Na cu ha nee Pahpãm mã me pajàpên tête me amji hi kwĩn, ne me hicu nare. 17 Ne pahte amji pupun xà to kêanre kênre, kên pejti te cyt ne imprar atajê jahpan xà na, quê ha Pahpãm amji cahê na me papa na me pahto, ne ampo kên ita jirôa pê me pahto impej catia to catito ihcuhhê rohnỳtti mã. 18 Ne por cu pjê kam me panto to me ampo pupu atajê, quê ha ihtỳj jũ caxuw hamre. Ne quêt côjkwa kam pahte me ampo pupun nare atajê, quê ha hàhhuc rohnỳtti mã. Cwỳrjapê cu ha nee ita ri, pjê kam, pahte me ampo pupunitajê to ame pajàptõ nare. Ne quêt côjkwa kam, cormã nee pahte me hõmpun nare atajê to, cu ha pahtỳj me amji japackre to me papa.