Matiwarini kuku
Wasina pakich kamanchinllpa yuwaa Matiwarini yandarangu anootsi
Sirútamasa Matiwarini Isusoo wamachtashimuna. Leviyaa tsurtarangitamta. Ndatuma Isusush tachitarangu, uw Romshucheem urkiree yarangiya (9.9-15). Itaru, Isussha: Nuwash izuuru tchitangandama, tárangu, Matiwarinsha zapan tachitarangiya. Ashirucha, Isusoo kapung yasarangiya; waana wach parangiya Isusootsi. Isus Waparip kárirangu anumun 20 masach tushiyaru, Matiwarinsha kirakaa yandarangiya. Isusoo izuuru kamanpi átu yandarangiya.
Utaáshusheem yandarangiya, watam uwshtisin: Nitaati Isusooja Apanll wip táranganawa. Itaru, izuuru Isusoo mangoonpana átu, yuwaa sirútamasa Apanll tuyandarangu anoo kamanirangiya. Zurakcha, Isus Apanllcha wipa. Waana Apanll Ipareetsi zanganchima tapachindamaama átu, watatamcha Isusu, tárangiya Matiwarini; anoom yandarangiya wirkarimuna. Apanll wip Utaáshucheem tapachindapi átu tsiparangiya. Itaru, nda Utaáshucheemmari tsiparangiya; tsapurunasshucheem tputsi ichinguroo istapi átu tsiparangiya. Ashirucha, Matiwarini anoo kapung kamanimaam zandarangu wirkareem yandarangiya.
Ashiriya, na yuwaa kamanirangu anoo pakich kamanchinllpa:
A. 1.1—2.23 Yuwaa Apanll wasina kamanirangu anootstam Isusush tuminarangiya. Isus Dapiyarinshini nlluranur nllurtarangiya. Yutarit tputs Isusoo kanxuritaatstaa pachamaam zandarangusin, ashiritaa Apanll istarangiya.
B. 3.1—11.30 Isus wachinayaru, tputsee tayaspatarangiya. Yutaritshishireetsis ksangtsa, tárangiya. Apanll siyaa izuuru kasimaam zandkiya. Nuwaa kuki payungtsa; ksarintspa. Ndunnaa mangoonkus, Apanllsha siyaa wanichapantsa, tárangiya Isusu.
C. 12.1—28.20 Isus tputsee istapi átu nish tsapush kusarangiya. Tputsimand yutaritshishirini tsiparangiya.
Tárangiya Matiwarini.
Nuw Matiwi Isusoo kamankina
1
Yuwaa Isus nllurtarangu anoo kamanchintspa
(Lukasa 3.23-38)
1 Isus ndatuma nllurtachu, zitamin anchichinand kinatarana anoo kamanchintspa.
Ísúkirísut Apanllcha Wipa. Tputseem kinarangu, Dapiyarinchichush nllurtarangiya. Apramarinchichitamcha.
2 Mazinangtsa; sirútamasa Apramarin wipaa Isaakarinee iparinarangiya.
Isaakarinsha Akoparinee iparinarangiya.
Akoparinsha Utaásarinee iparinarangiya; zoonllinandari k'tsas tsimbun matayaru taarangiya.
3 Utaásarinsha wip tsimbun wanindarangiya, iwiparangiya. Wip sura Faresa misha Serah. Nllur waanari Támara sura.
Faresarinsha Hesronarini iparinarangiya.
Hesronarinsha Aramarinee iparinarangiya.
4 Aramarinsha Aminadaparinee iparinarangiya.
Aminadaparinsha Nahasonarinee iparinarangiya.
Nahasonarinsha Salmunarinee iparinarangiya.
5 Salmunarinsha Rahabarinee wizanlleem yamarangu, wip Boosarinee iparinarangiya.
Boosarinsha Rutirinee wizanlleem yamarangu wip Obedarinee iparinarangiya.
Obedarinsha wip Jeseyarinee iparinarangiya.
6 Jeseyarinsha Dapiyarineetsi kuraka iparinarangiya.* Ruti 4.18-22 tsiyatsis nipta tatsamooru taaritamta.
Ashiri Apramarinpat Dapiyarinpat washunand 14 tputs itsutarangiya.
Kurak Dapiyarinsha tputsee wizanll yamayaru, Uriyasarinee wizanll yamayaru, wip Salomonarinee iparinarangiya.
7 Salomonarinsha Robowamarinee iparinarangiya.
Robowamarinsha Abiyasarinee iparinarangiya.
Abiyasarinsha Asaárinee iparinarangiya.
8 Asaárinsha Josafatarinee iparinarangiya.
Josafatarinsha Joramarinee iparinarangiya.
Joramarinsha Usiyasarinee iparinarangiya.
9 Usiyasarinsha Jotamarinee iparinarangiya.
Jotamarinsha Akásarinee iparinarangiya.
Akásarinsha Esikiyasarinee iparinarangiya.
10 Esikiyasarinsha Manasesarinee iparinarangiya.
Manasesarinsha Amónarinee iparinarangiya.
Amónarinsha Oseyasarinee iparinarangiya.
11 Oseyasarinsha Jekoniyasarinee iparinarangiya zoonllpata washunanda. Anpur Utaáshucheetsi Babiloniyap watsapun machtaranganaya.
Ashiriya, Salomonarinpat, Jekoniyasarinpat washunand 14 tputstam itsutarangiya.
12 Jekoniyasarinsha Sálatielarinee iparinarangiya Babiloniyash tsapu.
Sálatielarinsha Sorobabelarinee iparinarangiya.
13 Sorobabelarinsha Abihudarinee iparinarangiya.
Abihudarinsha Eliyakimarinee iparinarangiya.
Eliyakimarinsha Asórarinee iparinarangiya.
14 Asórarinsha Sadokarinee iparinarangiya.
Sadokarinsha Akímarinee iparinarangiya.
Akímarinsha Eliyudarinee iparinarangiya.
15 Eliyudarinsha Eleasararinee iparinarangiya.
Eleasararinsha Matánarinee iparinarangiya.
Matánarinsha Akoparinee iparinarangiya.
16-17 Akoparinsha Osiyarinee iparinarangiya. Osiyarinsha Mariyaa yamarangiya Isusu waanari.
Ashiriya, Sálatielarinpat Isuspat 14 tputstam itsutarangiya.
Ashiri Isusoo zitaminarini itsuttaranu anoo kamaneena.
(Lukasa 2.1-7)
18 Ashiri na Isus Apanll Wip nllurtarangu anoo kamanchintspa.
Osiyarini Mariyaa wayamandarangiya. Itaru, pishtarangiya izuuru yamamaama. Yamamaam waritarangitaa, itaru Osiyarini nduma yamachu, Mariy Apanllee Ipusamarini wanindarangiya. Apanll wizpur panarangiya Mariyshu. Anurisha wipaa ipanarangiya. 19 Osiyarinsha ¿Tamayshta ashik? ¿Tamaree mireek? tárangu, mang' kapung mantsarangiya. Apanllee chinarangu, ashiriya; Tputsee kamancheezi. Ngutariti kasachima; mangush chinarangu, tárangiya. 20 Anootsi kapung chinachinaw ashirangu, psaansha maarangu, Apanll wasundurur yakarangiya Osiyarinshu. Yakeeru, tsiyatarangiya. Osiyaa, shiy Dapiyarinchichtishcha, shiy tputsish; ashiriya Mariyaa yamamaam punirinllpa. Pzirinllpa. Nda tputspat ashirangu, waana Apanll ashiranguwa. Apanll Wip wanindakiya. Apanll wizpuri wipaa tinarangu. Ashiriya, shiysha Mariyaa izanlleemish yamangcha. Tsiyantarinllpa. 21 Wipaa tatsipkachu, nlluraa Isusu sur ísamangcha; an watatanda tapachindampani. Tputs Isusumun mang' tatkusin, yutaritshishirineetsi izuuru kapeetchiya.* Salmo 130.8 tsiyatsis nipta tatsamooru taaritamta. Ashiriya, shiysha izanlleemish yamangcha. Tatsipkachu, Isusu ísamangcha; Apanll wasundurur tárangiya. Tárangu, tsípata ashirangiya. 22-25 Ashiriya, Osiyarinsha támarangu, Ashiri yamachparina Mariyaatsi, tárangiya. Apanllee wasundurur kuk payurangu, Mariyaa wizanlleem yamarangiya. Itaru, natumasina nda washunand maarangana. Mariysha wipaa tatsipurangu, anacha Osiyarini wizanllpat washunand maarangana Mariypata. Osiysha nlluraa Isus sura ísamarangiya.
Apanll wipaa zanganirangu, ashiriya waanaatsi kuk sirútamasa kamanirangu anoo payurangiya. Apanllee kuk kamanimapani anootsi wasina kamanirangiya. Tárangiya;
Kiz wazaranll nduntaa, tsasataa, wipaa mireeyaru, kamuz tatsipchiya. Tatsipkachu, Emanowelaa yásamachiya, watam Apanll iyapa taakuwa,* Yuwaa Isáysa 7.14 tárangu, anoo nish anuritam atiya.
tárangiya.