23
1 Paulo, Sanhedeli ya kino didinidi na iyen,
Falegu Isalaela! Yaubada matana yai egu laulau sa dudulai ya laoma ee–, aho te, yo nuwagu yai hige somo heyaheyayana ya ginauli.
2 Yo fede Tau Antalasam Baꞌisana, Ananiya ya liba, be safalumadi Paulo fadidina yai sa mwaimwaito bena ai moꞌana sa oi.
3 Habahim Paulo ya libalau lisina iyebom,
Um doha ginauli hesa mulimulina nenena olina, na ganahewana ya bida heyaya! Wa taꞌai, be laugagayo yai bena wa fadudulaigu, in moho, laugagayona wa utusi, be wa falibadi sa talaigu! Yaubada haba hinaga ya talaim. (au italau Deut 25:1-2).
4 Dodoga haisa Paulo sadaina yai sa obiꞌobiyo tiyen,
Fede Yaubada ena Tau Antalasam Baꞌisana fafalibana doha?
5 Paulo alinadi ya bui iyen,
Haidagu, hige ya sibai mate, in Tau Antalasam Baꞌisana. Doha haꞌa sa uli tiyen, “Dodoga adi tanuwaga tabu u liba faheyaya!”
6 Paulo ya siba mate haisa iti Sadusi na haisa mate Falesiya, yo fede Sanhedeli ganahewana yai ya yoga laꞌilaꞌi iyen,
Afa haidagu! Yau hinaga Falesiya, Falesiya hesa natuna yau. Ami falau fatalagu paꞌana E kawawananaha mate tau peꞌipeꞌi haba sa mwahuli fuyo!
7 Libana te ya libaen yo fede Falesiya yo Sadusi sa faibayaho fuyoꞌidi be sa faitamo dailinidi.
8 (Sadusi sa liba mate hige mwahuli fuyo yo hige anelu yo yaluyaluwa. In moho Falesiya mate ginaulidi te sa kawawananahaꞌedi.) 9 Bobohalahala ya laꞌi ya laulau na laugagayo tau lau faꞌataena haisa, iti Falesiya peledi sa obiyo fahi, be sa liba adidili tiyen,
Doga te, hige ena heyaya somo ai lobahi! Nuwana yaluyaluwa e anelu i libalibama lisina!
10 Faibayaho ya laꞌi wananaha, yo fede Komanda ya ꞌwasabu be iyen,
Ibe Paulo ti tabe motumutu.
Yo fede ena tau hiyala ya duidi be sa lidi (yai), Paulo sa mupafahi nuwanuwadi yai, be sa lawen tau hiyala edi baleki. 11 Maihonana mate Guyau ya obiyo Paulo sadaina yai na iyen,
Nuwam i adidili! Yelusalem yai ꞌwasagu haꞌa wa duwai, ai Loma hinaga haba doha wa ginauli. (Paisowa 27:24)
Diusi, Paulo Tala Funuhina Edaꞌedana sa Yoꞌo
Paisowa 23:12-22
12 Bobonna Diusi haisa simosimo yai edi sa oiliba. Sa angwala mate ibege somo hesa ti an e ti nom ee–, Paulo sa wunui. 13 Oiliba te ganahewana yai mate dodoga ouꞌoulidi 40 ya diꞌoi. 14 Habahim sa lau tau antalasam edi babaꞌisa yo Diusi babadadi lisidi na tiyen,
ꞌE angwala haꞌa mate ibege somo ai an ee–, Paulo ꞌe wunui. 15 Aho te, Sanhedeli maꞌemiu emi anꞌeta bwalabwala au fatamali lawen Loma edi Komanda lisina be Paulo i fatamaliyama lisimiu na auwe, “ꞌE fanuha bena Paulo ꞌe fatiꞌo buibui be matana somo ꞌe sibai.”
Haba ai edaꞌeda ꞌe nahai, be ꞌe unui.
16 Paulo ena golowa edi oiliba heyaheyayana wasana ya atahiyen. Yo fede ya lau tau hiyala edi baleki yai be Paulo ya liba fanuwatagu.
17 Habahim Paulo ya yoga lau hiyala tau lau kulukuluwenna hesa lisina iyen,
Hewali te u lawen komanda lisina. Somo hesa bena ya faliba.
18 Yo fede hiyala tau lau kulukuluwenna ya lawen Komanda lisina be ya faliba iyen,
Tau lau deli, Paulo, ya yogaigu na ya anꞌetaigu bena hewali te E leyama lisim be nuwatuhu hesa haba em ya liba.
19 Komanda, hewali ni ya foya hudoꞌiyen be ya fatiꞌoi iyen,
Somo bena wa falibagu?
20 Alinana hewali ya bui iyen,
Diusi babadadi nuwadi esega be sa anꞌetaim bena bobon Paulo wa lawen Sanhedeli lisidi, be au bwalabwala yai sa fatiꞌo buibui.
21 In moho tabu alinadi u lau watanidi paꞌana tau nahaina ouꞌoulidi 40 ya diꞌo mate sa bagibagiyen. Haꞌa sa angwala mate ibege somo ti an o ti nom ee–, Paulo sa wunui. Haꞌa sa nonoha, na em yali moho sa bagibagiyen.
22 Habahim komanda, hewali ya liba fanuwatagu iyen,
U koman! Tabu sai hesa u faliba mate edi bwala te, haꞌa wa fafinaheyama lisigu.
Yo fede ya dui ya lau.
Paulo sa Lawen Gawana Filiki lisina
Paisowa 23:23-35
23 Habahim komanda ena hiyala tau lau kulukuluwendi luwaga ya yogaidima be fatalawaudi iyen,
Tau hiyala 200, yo hosi tau awaidi 70, yo alahiya tau abidi 200, au nonohaidi. Haba 9 koloki ma afa haidamiu ami lau Sesaliya. 24 Hosi fisa au abi nonohaidi, be haba Paulo ma loholohona ami lawen Gawana Filiki lisina.
25 Na habahim Komanda leta ya uli doha ite:
26 Yau Kilaudiya Laisiya E uliꞌuliwa, Um ma hesam, Gawana Filiki! Yauwedo. 27 Doga te, Diusi sa tohai be egoba sa wunui. In moho tau hiyala ma afa haidagu ꞌe laoma be ꞌe galatata, paꞌana E sibai, in, Loma dogana. 28 Somo lisina yai sa fafagilu E fanuha bena E sibai. Logena E lawen Diusi edi Konisela Sanhedeli lisidi. 29 E lobahi mate iti ibodi edi laugagayo fatiꞌodi yai sa fafagilu. Hige laꞌi i ginauli ponoli haba ti falau deli e ti wunui. 30 Muliyai, egu sa liba mate Diusi haisa simosimo yai sa oiꞌoiliba bena doga te sa wunui. Yo fede feula E duiyawa lisim yo tau fagiluna E falibadi somo lisina yai sa sadi, bena sa fafinaheyawa lebem.
31 Tau hiyala nuwatuhu te sa lau watan be maihonana Paulo sa lawen Antipatili Taonina.* Aꞌawana doha Alotau na ee–, Sinalili. 32 Bobonna tau lau fote sa fuyo edi baleki Yelusalem yai na hosi tau awaidi maꞌedi Paulo sa lau Sesaliya, 33 be pepa Gawana sa felen na Paulo sa tole afulen lisina yai.
34 Gawana leta te ya fatili ofiꞌi, ya fatiꞌo lau Paulo lisina iyen
Em nuꞌu somo?
Gawana ya lobahi mate in Sisiliya dogana.† “Sisiliya” yo “Sesaliya” mate nuꞌu hudoꞌi. Paulo ena taon hesana Tasusi mate “Sisiliya Nuꞌuna” ganahewana yai na “Sesaliya” mate taon laꞌilaꞌi “Diudeya Nuꞌuna” ganahewana yai.
35 Paulo ena liba Gawana Filiki ya atahi, be iyen,
Yena tau fagilum sa mahanoma haba em pilipili E fadudulai.
Habahim ya liba be Paulo sa gatiꞌi Heloda ena luma laꞌilaꞌina yai.