18
Babilonia wakpa e̱newa ta̱ iké̱ sulunewa̱
1 E' ukuöki̱ ta̱ ye' tö Skëköl biyöchökwak skà sué̱ eköl datse̱ ká̱ jaì a̱, e' diché ta̱' tai̱ë. Ilo tai̱ë, e' buneka̱ ká̱ i' ko̱s ki̱. 2 Ie' tö iché a̱neule:
“¡Babilonia wakpa e̱newa ta̱ iké̱ sulunewa̱!
Ká̱ e' sulunewa̱ mía̱ne aknamapa ké̱ie.
Ee̱ wimblupa sulusi tsa̱ki̱ë e̱' dapa'wé̱ka̱ se̱nuk.
E' dör iyiwak sulusi dör ñá ena dù dör ñá, ese wé.
3 Ká̱ ulitane wakpa e̱rkiöwé̱ka̱ Babilonia wakpa tö
trënuk we̱s s'tteke blo' tö es.
Ká̱ ulitane blúpa se̱néka̱ ie' ta̱.
Ì sulu ko̱s tue̱ke ie' tö ì sulu wambloie,
e' tö dalì watau̱kwakpa ulitane blu'wé̱ka̱ tai̱ë.”
4 Ttö̀ skà ttsé ye' tö datse̱ ká̱ jaì a̱, e' tö iché:
“Wé̱pa dör ye' icha, e'pa ko̱s e̱' yö́lur Babilonia
a̱s a' kë̀ tö ì sulu wamblërke ee̱ e' wamblö̀ñak.
Ñies a' e̱' yö́lur a̱s ì sulu datse̱ ie'pa ki̱ e' kë̀ dö̀ a' ki̱.
5 Ì sulu wamblé ie'pa tö, e' dör tai̱ë shu̱te̱,
e' mú dapa'wè̱sö, e̱'ma ideka̱ ká̱ jaì a̱.
Ì sulu wamblé ie'pa tö, e' jche̱r buaë Skëköl wa̱.
6 Eta̱ ttö̀ ttsé ye' tö e' iché inamépa a̱:
Ì sulu wamblé ie'pa tö pë' male̱pa ki̱,
e' nuí̱ ské patkö́ne ie'pa ki̱ tai̱ë dö̀ bötökicha.
Ì sulu wamblé ie'pa tö pë' male̱pa ki̱,
e' dör we̱s ie'pa tö pë' male̱pa ké ì bacha'bachaë yök es.
E' kue̱ki̱ ibaché döka̱ bötökicha,
e' ské yökwa ie'pa kö́ inuí̱ie.
7 Ie'pa e̱' kkeö̀ka̱ tai̱ë, ie'pa wa̱ íyi bua'bua tso' tai̱ë shu̱te̱,
ekkë ie'pa we'ikö́ tai̱ë shu̱te̱.
Ie'pa e̱' bikeitsö̀:
‘Se' tso' buaë we̱s alaköl dör blu' es,
se' kë̀ dör we̱s schö́ es weir sia̱rë.’
8 Ie'pa e̱' bikeitsö̀ es, e' kue̱ki̱ ì suluë döraë ie'pa ki̱ bet.
Ie'pa teraë bli tö, ie'pa weirdaë sia̱rë,
ie'pa duöralur, ie'pa ñardawa bö' a̱.
Skëköl diché ta̱' tai̱ë íyi ulitane tsa̱ta̱,
e' wa ie' tö ie'pa wöme'ttsa̱bak weinuk.”
9 Ì sulu wambleke Babilonia wakpa tö, ese wamblë'ñak ká̱ blúpa tö ie'pa ta̱. Ñies íyi bua'bua tso' tai̱ë Babilonia, e' tö ie'pa ttsë'wé̱ buaë. Mik ie'pa tö Babilonia ñarkewa e' shkle̱ sué̱, eta̱ ie'pa e̱riardaë tai̱ë, i̱u̱raë sia̱rë. 10 Ie'pa suardaë dö' ì sulu e' dö̀ ie'pa ki̱ ñies. E' kue̱ki̱ ie'pa e̱' tsu̱raa̱rak ka̱mië ikí̱ sa̱u̱k ta̱ icherarakitö:
“¡Wëstela i̱na Babilonia wakpa ta̱!
Ie'pa dör pë' tai̱ë. Ie'pa ká̱ dör tai̱ë buaë.
¡Ì sulu wamblé ie'pa tö e' nuí̱ de ie'pa ki̱ bet,
ekuö́löie ie'pa e̱newa, ie'pa ká̱ sulunewa̱!”
11 Dalì watau̱kwakpa tso' ká̱ i' ki̱ e'pa e̱riardarak sia̱rë i̱u̱rarak tai̱ë, kë̀ yi ku̱'ia̱ Babilonia ie'pa dalì ta̱u̱k e' kue̱ki̱. 12 Dalì watue̱ke ie'pa tö e' dör orochka, inukölchka, ák bua'bua, ákwöla bua'bua kiè perla, datsi' bua'bua kiè lino ena seda, ñies datsi' bua'bua wöaule sie̱lsie̱l ena batsë; ñies kal ulitane alar jamamaë; ñies íyi ulitane bua'buaë yöule marfil* marfil: E' dör iyiwak kiè elefante ese kà talë́ki wà., ena kaltak bua'bua wa, ena tabechka kiè hierro e' wa ena tabechka kiè bronce e' wa, ena ák bua'bua kiè mármol e' wa; 13 ñies canela klö̀ e' kkuölit, ñies íyi poie alar jamamaë ena íyi masmas ña'wè̱, kiö̀ masmas kiè mirra ena íyi masmas poie tuè̱ darërë kiè olibano; ñies vino ena kiö̀, ñies harina bua'bua ena trigowö; ñies baka ena obeja ena kabaio ena carreta; ñies pë' klöulewa̱ kanè mésoie ena pë' skà tso' watuè̱ ese. Íyi ekkë ko̱s watue̱ke ie'pa tö. 14 Dalì watau̱kwakpa tö icheraë:
“A Babilonia wakpa, ì ko̱s bua'buaë kiarke a' ki̱ tai̱ë,
e' kë̀ ku̱'ia̱ a' wa̱.
Íyi bua'bua ko̱s wër buaë wöñarke dalölöë,
e' ko̱s kë̀ dë'ia̱ a' ulà a̱.”
15 Dalì watau̱kwakpa e̱' blu'wé̱ Babilonia wakpa wa, e'pa e̱' tsu̱raa̱rak ka̱mië ikí̱ sa̱u̱k. Ie'pa suane dö' ì sulu tka Babilonia wakpa ki̱, e' dö̀ ie'pa ki̱ ñies. Ie'pa e̱riardaë sia̱rë, i̱u̱raë tai̱ë. 16 Ie'pa tö icheraë:
“¡Wëstela i̱na Babilonia wakpa ta̱!
A' e̱' paiëule datsi' bua'bua kiè lino ese wa
ñies datsi' wöaule sie̱lsie̱l ena batsë ese wa.
A' e̱' ki̱tkëule buaë oro wa ena ák bua'bua wa ena ákwöla bua'bua kiè perla ese wa.
17 ¡Ká̱ etkë̀ ta̱ a' wa̱ íyi tso' bua'buaë tai̱ë, a' blune tai̱ë, e' e̱newa!”
Es ñies kanò blubluë shköke tai̱ë dayë ki̱, e' wökirpa ko̱s ena ikaneblökerak ko̱s ena wé̱pa shköke kanò shu̱a̱, wé̱pa ko̱s inuköl klö'we̱ke kaneblök kanò wa, esepa ko̱s e̱' tsé̱a̱t ka̱mië Babilonia ki̱sa̱u̱k. 18 Mik ie'pa tö ká̱ e' ñanewa̱ e' shkle̱ sué̱, eta̱ ie'pa a̱ne tai̱ë: “¿Ká̱ wé̱ skà dör buaë tai̱ë we̱s Babilonia es?” 19 Ie'pa tö ká̱ po tkéka̱ e̱' wökir ki̱ iwà kkachoie tö ie'pa e̱rianerak tai̱ë ta̱ i̱u̱ke tai̱ë ta̱ ichérakitö a̱neule:
“¡Wëstela i̱na ká̱ e' buaë tai̱ë, e' wakpa ta̱!
Sa' ko̱s wa̱ kanò tso', e'pa blune tai̱ë ie'pa batamik.
¡Ká̱ etkë̀ ta̱ ká̱ e' sulunewa̱!”
20 ¡A a' tso' ká̱ jaì a̱,
Skëköl tö Babilonia wakpa e̱wé̱wa,
e' kue̱ki̱ a' ttsë'nú buaë!
A' dör batse'rpa,
ñies Jesús ttekölpa tsá̱,
ñies Skëköl ttekölpa, ¡e'pa ko̱s ttsë'nú buaë!
Skëköl tö Babilonia wakpa we'iké,
ì sulu wamblé ie'pa tö a' ki̱, e' nuí̱ ské de ie'pa ki̱,
e' kue̱ki̱ a' ttsë'nú buaë.
21 E' ukuöki̱ ta̱ Skëköl biyöchökwak skà de eköl diché ta̱' tai̱ë. E' tö ák bërie kéka̱, ák e' dör ko̱s ák tso' wawè ekkë, e' u̱yémiitö dayë a̱ ta̱ ichéitö:
“A Babilonia wakpa, a' chörawa
we̱s ák i' chowa dayë a̱ es,
kë̀ yi tö a' sue̱paia̱.
22 Ma'ma tso' bla'wè̱ kiè arpa ena flauta ena duk,
ese kë̀ blarpaia̱ a' ká̱ a̱.
A' kanè mésopa ko̱s kë̀ ku̱'ia̱.
Ák tso' wawè ese kë̀ blarpaia̱ a' ká̱ a̱.
23 Bö'wö ñarke e' kë̀ wöñarpaia̱ a' ká̱ a̱.
Kë̀ yi ku̱'ia̱ ulabatsök.
A' dalì watau̱kwakpa e'pa kkeauleka̱ tai̱ë,
ie'pa dör pë' tai̱ë ká̱ i' ki̱.
Es a' tö ká̱ ulitane wakpa ki̱tö'wé̱ alibchö̀ wa,
e' kue̱ki̱ íyi ikkë sulu de a' ki̱.”
24 Skëköl ttekölpa ena s'batse'r male̱pa ko̱s kötulur Babilonia wakpa tö, e'pa pë́ tëne ie'pa ká̱ ki̱. Ñies pë' male̱pa tai̱ë kötulur ie'pa tö. E' kue̱ki̱ e' nuí̱ de ie'pa ki̱.