Mark'os Guut'tso
Nodoonz Iyesus Krstos Dooshishiyo
Kindo
Mark'os doo shishiyo, «Han Ik'o naay Iyesus Krstos doo shishyo b́ tuwokoniye» etona b́tuu, dooshishiyanitse Iyesus fini ashonat naash wotatni b́t'in. Bí alonwere b́daniyonat fo'erawwotsatse b́ detsts angonat ash na'i morro oorowe bí eton be'ere. Iyesus «Ashuwotsi morr finosh guuts wototse kishosh t kasho beshi de'er ímosh waats Ash Na'o taane» ett b́tookon keewre.
Mark'os Iyesus jango b́t'intswere kaawonat angon s'een b́wotts weeron wotat b́t'iwintswere Iyesus aap'onat b́daniyats b́ woterawo b́fiints adits finwotsatsa b́tesh. Gupfo Yohans jangonat, Iyesus gupewon bíyats bodts fadewo k'awintsdek' b́ ími hakon guut'tsman Iyesus daniyonat kashiyon gawintsdek' b́keewi. Múk'i b́teshihakon Iyesus shuutso shoydek't shaiirwots Iyesusi iki bogshdek't danfere boami taawo Iyesusi k'efirwots iki bogshdek't bín shit'fera boam. Mas'afahan s'uwaatsi k'ot'wotsitse fa'uwots Iyesus beewotse s'uwatse ik gawiyotse wotts keewwotsi bítsnooru b́ jiteyi jangonat k'irotse b́tuwi jango keewirwotsiye.
B́ doo shishiyan s'uwoke k'nfiyotse fa'a git kaywotsitse, yoots mas'aafwotsitse ik ikwots mec'rotsna bo daatsefo.
Jamon mas'aafan b́detstso
B́ doo shishi tuwoko 1:1-13
Iyesus Galiln fino dek' b́tuwok'o 1:14—9:50
Iyerusalemitse b́fintsok'o 10:1-52
Iyerusalemnat bgúúratse s'uwaatsi ik gawiyor 11:1—15:47
Doonzo k'irotse b́ tutsok'o 16:1-8
K'irotse tuuts doonzo be'ewonat daromaand bí amtsok'o 16:9-20
1
Gupfo Yohans b́ nabtso
(Mat. 3:1-12; Luk'. 3:1-18; Yoh. 1:19-28)
1 Hań Ik'onaayi* 1:1 Ik'o naayi: Yoots mas'aaf ik ikwots Ik'o naayi etirwo dabrakno. Iyesus Krstosko doo shishiyo b́ tuwokoni.
2 1:2 Mil. 3:1 Nebiyiyo Isayasn,
«Hambe, nwerind foketwo
T woshtso nshinatse beshide woshitwee. 3 Hanwere
‹Doonzosh weerindo k'aniwere
B́fudonowere manutsiwere› etfere,
Worwotse b́k'aaro eenshde'k't keewiru asho k'aaroniyee»
ett guut'etsok'one.
4 Mansh gupfo Yohans «It morrosh orowe eto itdatsish naandrone err gupewere» ett worwotse kuhdek'et keewfere b́weyi. 5 Yhud datsonat Iyerusalem kitutse ay asho b́maantsa bowaafo, bo morro kish keewr Yordanosi eteets fokotse b́ kishatsna bogupefo.
6 1:6 2 Naash. 1:8 Yohans tahonwere kambuli s'iron wozeka b́tesh. B́gebatso shaak'a bí edefo, b́maafonwere p'elonat dok'shi mas'ona. 7 Bí hank'owa bí'etfo «Túmr b́c'aami tipi joko bitsosh tborawo taayere ayidek' bogtso tshutsatse weeyirwe. 8 Taa iti aatson gupetwe, bímó itn S'ayn shayiron gupetwe.»
Iyesus b́gupetsok'o
(Mat. 3:13-17; Luk'. 3:21-22; Yoh. 1:31-34)
9 Manoor Iyesus Galili eteets datsatse beyiru Naazreti eteef kituts waat́ Yordanos fokotse Yohans kishon b́gupeyi. 10 Yohans manoor, Iyesus aatsotse b́keshtsok'on daro gaad'at́ b́k'eshefere, S'ayin shayiro kurkund areyat bíyats b́ oot'́fere b́bek'i. 11 1:11 Aze. 22:2; Dub. 2:7; Isa. 42:1; Mat. 3:17; 12:18; Mar. 9:7; Luk'. 3:22 Manoor «Taan gene'úshtso t shunts na'o neene» etiru k'ááro darotse b́weyi.
Iyesusi fadetsok'o
(Mat. 4:1-11; Luk'. 4:1-13)
12 Manóór Ik'i Shayiro Iyesusi worwots dek't bí'ami. 13 Manoknowere worwotse Shed'ano Iyesusi hab aawosh b́ fadfera b́teshi, dín s'ootswotsntoni b́ tesh, melkiwotsu bísh finernó botesh.
Iyesus b́ daniyi fino Gelil datsatse dek' b́tuutsok'o
(Mat. 4:14-17; Luk'. 4:14-15)
14 Yohans detseyat tipimo b́ kindiyakon Iyesus, Ik'i mengsti jangosh doo shishiyo† 1:14 Doo shishyo: Eto wongeliya etee. nabfere Galil maants b́weyi. 15 1:15 Mat. 3:2 B́daniyoro, «Dúro s'uuwtsere, Ik'imengstu karnfere b́watsotse it naandrone erere, dooshishi nabetsono amanore!» bí etfo.
Iyesus mus' detsf awdetswotsi b́s'eegtsok'o.
(Mat. 4:18-22; Luk'. 5:1-11)
16 Maniye il Iyesus Gelil aatsk'ari ganoke beshefetst Simon nat bí eshu Indriyasn mus' detsfwotsi boteshtsotse bo mus' kambo aats k'aro maants boshap'fere boon b́ bek'i. 17 Iyesuswere «T jafrats woore itsh tdanisha, err mus' it detsirwok'o ashuwotsi it detsetwok'ó woshitwe» bí eti. 18 Bowere manoor bo mus' detsi kambo k'azk'rat́ b́shuutso bo tuwi. 19 Maniyere múk'i beshat k'osh eshu gitwotsi b́bek'i. Bowere Zebdiyos nana'úwots Ya'ak'obnat Yohansna botesh. Bowere bo jelbotse bedek't bo mus' detsi kambo bok'anifera botesh. 20 Iyesus manoor boon b́s'eegi. Bowere bonih Zebdiyosnat bísh fin finirwotsn jelbatse k'azk'rat Iyesus jafrats boami.
Kim shayiro bín s'eents asho b́kashtsok'o
(Luk'. 4:31-37)
21 Beshatnu K'frnahom kitots bobodi. Manoori waats sanbatots Iyesus Ayhdiwots Ik' k'oni mootse daniyo dek't b́twi. 22 1:22 Mat. 7:28-29 Iyesus, Muse nemo danifwots kok'o b́woterawo naashikook'o b́danifotse shishts jamwots b́daniyor ada bo adfo. 23 Ayhudiwots Ik' k'oni mootse beyiru ash iko gond shayiron s'eentso hank'o ett b́kúhi, 24 «Nazrettso Iyesuso, nee nooke eeg kis'e ndetsi? Noon t'afiyosh waafi? Nee koni n wottsok'o taa daank'reree. Ik'oko S'ayino neene.»
25 Iyesuswere gond shayirmansh «S'ik err, bí atsotse kee» ett b́fayi.
26 Gond shayronwere ashman dikdek't b́s'ik'iyakon b́k'aaro eensh dek't kuhefetst bí atsotse b́ keshi. 27 «Eebi han naaroni? Hanwo handr daniyeya?» Gond shayirwotsi bí aloro bo bíshere bo aleyiri, ett adt bo atsatseyo aateyo dek' bo tuwi. 28 Muk'i b́teyawo, Iyesus shúútso Galil gúúratsi dats jamatse dane b́wtsi.
Iyesus shodts ayuwotsi b́kashitsok'o.
(Mat. 8:14-17; Luk'. 4:38-41)
29 Muk'ib́teyawo Iyesus ayhudi Ik' k'oni mootse kesht Yak'obnat Yohansnton, Simoonnat Indryasn moots b́kindi. 30 Maa manitsno Simon awu ats k'ees'its shodo shodat bk'efera btesh. Bshodmanowere manoor Iyesussh keewbok'ri. 31 Iyesuswere bmaand t'int́ bkisho detsdek't b́tuuzi. Bi atsi k'ees'onwere manoor binfakshb́k'ri. Tuwatnwere boon b ibiy.
32 Aawu bkindre datso bí iliyakon ashuwots shodtswotsnat fo'erawon detsets jamwotsi Iyesusok dek't boweyi. 33 Kititsi ash jamo maa úratse kakwe b́wtsi. 34 Iyesus ay naari shoodon kic'iru ay ashuwotsi kashi b́k'ri. Fo'eraw aywotsno b́kishi. Fo'erawwotswere bí koni b́woto danfno botesh. Ernmó bokeewrawok'o boon b́baziyi.
Iyesus Geliln doo shishiwo b́ nab́tsok'o
35 Datso gatsosh bí etfere, Iyesus guuron tuut mootse kesht Ik' k'onosh ash aalok k'az bíami. 36 Simoonnat bínton teshtswots bín geyo kesht boami. 37 Bín bodatstsok'ono «Ash jamonwo neenere b́geyiri» bo eti.
38 Iyesuswere, «Taa twaa danyosh b́wottsotse doo shishiyo danyosh karnoke fa'a gal galóts amone!» bí et.
39 1:39 Mat. 4:23; Luk'. 9:35 Mann ayhudiwots Ik' k'oni maa mootse danifetsit fo'erawwotsnowere kishfere Galil dats jamatse b́gúúrefo b́tesh.
Iyesus eenshodets asho b́ s'ayintstsok'o
(Mat. 8:1-4; Luk'. 5:12-16)
40 Een shod detsts ash iko Iyesus maants waat b́ tufi shirots tuk'maldek't, «Ni eekiyal taan s'ayintso falfne» eton bín b́k'oni.
41 Iyesuswere bísh maac'o k'ewat, b́kisho jargdek't shu'efetst, «Eekere s'ayine!» bí et. 42 Ashmanwere manoor bí een shodotse s'ayinb́wtsi. 43 Iyesus ashmansh kup'shdek't, ntooko korde'e ett faksh b́k'r. 44 1:44 Lew. 4:1-32 «Wotts keewan ik doonzshor nkeewrawok'o ni tooko korde'e, ernmó amr ntooko kahniyosh kitswe. Ashjamosh gaw b́wotish nkashtsotse Muse k'aluwere bí etts wosho t'intswe» ett bíazazi.
45 Ernmó ashman manoke kesht keewman ashosh keewo dek't b́tuwi. Manatse tuutson Iyesus kit ikutsnor be'efetst kindo b́maawi. Ernmó kitoniye úratse ash aaloka b́befo. B́ wotefere ashuwots bo be beewoke b́ maants waa bowaafo.
*1:1 1:1 Ik'o naayi: Yoots mas'aaf ik ikwots Ik'o naayi etirwo dabrakno.
1:2 1:2 Mil. 3:1
1:6 1:6 2 Naash. 1:8
1:11 1:11 Aze. 22:2; Dub. 2:7; Isa. 42:1; Mat. 3:17; 12:18; Mar. 9:7; Luk'. 3:22
†1:14 1:14 Doo shishyo: Eto wongeliya etee.
1:15 1:15 Mat. 3:2
1:22 1:22 Mat. 7:28-29
1:39 1:39 Mat. 4:23; Luk'. 9:35
1:44 1:44 Lew. 4:1-32