11
Yennu nba loon u mɔyêtuk niib biaŋinba
1 Yennu ŋamm yet a,
“Yoo nba ki Israel* 11.1 Israel-e tee Israel teeb. din tee bik na, n din loonɔ,
ki dat nyinnɔ Ijipt, ki u tee n bija.
2 Ŋaan mi-i ji kii yiin Israel yoo nba kur,
u tuu lek numm nanime;
ki n niib maŋ mann maruŋ ki teen tingbann Baal,
ki bia jokin bonnunubit ki teen yenbis.
3 Mine lek din tumii Israel teeb sommir,
ki tebir n niib maŋ n nuu ni,
ŋaan ki bi lek ki bann nan mine goriibi.
4 N datib nan lomm, ki bi baar n boor,
ki n tɔkirib ki wɔbib parpaak,
ki tuu bɔɔn tiŋ ni, ki goomm.
5 “Baa yêt bin jen n boor na paak, see ki bi ŋmat Ijipt, ki Asiria teeb sii diab. 6 Tɔbii saa faa bi doi ni, ki faa jint bi doi gana. Li saa biir n niib, kimaan bi tuun linba ki bi loone. 7 N niib na lor nan bin yêtime. Bi saa bui sanpaapo, kimaan jikir nba be bi paak na, ŋaan sɔɔ kaa ki saa jikitibi.
8 “Israel teeb, nlee ki n saa ŋaaini?
Nlee ki n saa nyikini?
N bo kan fit biiri nan maa tun biaŋinba ki tur Adma,
koo ki bo dia-i nan maa tun biaŋinba ki tur Seboyim na.
N par kan chabin ki min tun nna,
kimaan n mɔk lomm nani bonchiann.
9 N kan donn wutoor ki dat i tuba.
N ji kan biir yimm Israel teebi,
kimaan n tee Yennu-e, n ki tee nisaarik kaa.
Mine tee kasii daanɔ, ki be nani.
N kan baar i boor nan wutoori.
10 “N niib sii waa n poore, yoo nba ki n mɔ nan yanbɔr na ki tookit bi datai. Bi saa nyi yonbaa po ki kakit baar n boor. 11 Bi saa nyi Ijipt po, ki lian nan nɔɔnii na, ki nyi Asiria yent po nan lanjerii na. N bia saa te bin jen bi ŋei ni. Min Yennu-e pak na.”
Ki jiin Israel nan Juda teeb biiru po
12 Yennu ŋamm yet a, “Israel teeb na kookin nan fai nan kpinkpannii, ki Juda teeb bia lek daa yêen n mɔb, min nba tee barmɔnii nan kasii Yennu na.