119
Ki jiin Yennu sennu po
1 Parpeenn tee daansiab nba kaa biit na yare,
binba dia Yennu sennu na.
2 Parpeenn be binba waa u sennu na paak,
binba saak u mɔb nan bi para kur.
3 Bi ki tuun biiti, bi waa Yennu mɔbe yoo kur.
4 Yennu, fine turit a sennii,
ki bia wannit nan ti sakir nan barmɔnii.
5 N sunman ki n bo dia a sennu maŋe ki waar fanu.
6 Mi-i jii n yan ki kɔɔn a sennii na kur ni, n kan di fei.
7 Maa bant a kasii sennu na, n saa jianta nan par nba yeene.
8 N saa sak wei a sennii nawa; a daa nyikitimi.
Ki jiin Yennu sennu na saku po
9 Naasimɔ saa teen nlee ki u binbeŋ-ii yeeni?
See ki u sak gaar a sennii.
10 N loon man weia nan n par kurewa,
ii guun ki n daa mɔk mɔyêtuk nan a sennii.
11 N dia a sennu nae n par ni
a lin te ki n daa tuun biit ki teena ni.
12 Yennu, n dontira, wantin a sennii.
13 N saa pak a sennii nba ki a turit na nan kunkɔsaakar.
14 N par mei a sennii weiu paak ki gar mɔkinta.
15 N tumii a senniie ki fiitir a wannu na.
16 N par man a sennii na paak, n kan tamm li po.
Parpeenn nba be Yennu sennu ni
17 Ii ŋan ki tur min nba tee a toontunnɔ na
ki mii mɔk manfoor ki sak a wannu.
18 Lootir n ninbina ki man fit la bakitnauŋ wannu
nba be a sennu na ni.
19 N tee saamɔe tingbouŋ na ni, a daa bɔriin a sennii.
20 N par nian mii mi a senniie yoo kur.
21 A sikint binba dont bi mɔŋ nae,
ki mɔpora be daansiab nba ki dia a sennii na paak.
22 Nyintin bi sukit nan bi sariku ni,
kimaan n dia a sennii na.
23 Doo diara tuu chet ki lor lorbiite ki jiin n po,
ŋaan min sii tumii a senniie.
24 A wannue teenin parpeenn, ki teenin kpaanii.
Ki jiin Yennu sennu na dianu po
25 Bi nyannime ki n dɔɔ tant ni,
fiintin nan faa senn mɔsonn biaŋinba na.
26 N pak fiit n toona kure ki wanna, ki a turin gatu,
wantin a sɔnii.
27 Sommitin ki man bann a sennii na paak,
ki n sii dukii a bakitnauŋ wannu na po.
28 Parbiir gbee ki yentima,
kɔɔntin paŋ, nan faa senn mɔsonn biaŋinba na.
29 Ii guun ki n daa tuun biiti,
ki jii a ŋant ki wannin a sennu.
30 N loon mii tee mɔsakdaanɔe, n gaar a tumiiuwa.
31 Yennu, n wei a senniiwa, a daa te ki n kɔɔ fei ni.
32 N saa sak a sennii nan n par kur,
kimaan a saa turin bannu bonchiann.
Yenmiaru ki jiin bannu po
33 Yennu, wantin a sennii na paak,
ki mii dia a sennii maŋ yoo saaka.
34 Wantin a sennu maŋ paak ki man diar,
n saa diar nan n par kure.
35 A te ki mii mɔk mɔsaku nan a sennii na,
kimaan bi niŋe ki n laat parpeenn.
36 Turimin niɔŋ nba ki n saa sak a sennii ki gar mɔkint.
37 Ii guun ki n daa fiin linba kaa nyɔɔt po,
ii ŋan ki turin nan faa senn mɔsonn biaŋinba na.
38 Ii dia mɔsonn nba ki a senn ki tur min a daabir na,
mɔsonn nba ki a senn tur binba saak a mɔb na.
39 Nyintin sukit nba ki n tiin na ni,
a wannue tee wannu nba ŋan.
40 N loon man sak a senniie,
turimin manfopaann, kimaan a tee kasii daanɔe.
Ki jiin Yennu sennu na yada teenu po
41 Yennu, wantin faa loonin biaŋinba,
ki tinnin nan a mɔsonn nba tee biaŋinba na,
42 ki man fit pak jiin daansiab nba sukiin na,
kimaan n teen yada nan a mɔmaama.
43 Sommitin ki mii piak barmɔnii yoo kur,
kimaan n dindann be a sennii nie.
44 N sii yɔɔ saak a sennue yaayoo siiyoo.
45 N sii be n yamanie, kimaan n yiab ki dia a wannu.
46 N saa mɔɔnt a sennii ki tur kpanbara, ki kan tin fei.
47 N parpeenn nyi a sennii dianu nie,
kimaan n loon a sennii maŋ.
48 N lomm be a sennii ni, ki n teen a sennii maŋ baakir.
N sii dukii a sennii maŋ poe yoo kur.
Parcheenn nba be Yennu sennu na ni
49 Tiat a mɔsonn nba ki a senn ki tur min a daabir na;
li turin dindanne.
50 N daamii ni lek, ŋaan n laa parcheenna,
kimaan a mɔsonn nae turin manfoor.
51 Karinbaandamm na laame,
ŋaan n ki chat nyik a sennu na.
52 Yennu, n tian a sennii nba bo be yaayoo niwa na,
ki li teenin parcheenn.
53 Mi-i la biitdamm na ki dia a sennu yoo nba,
li tuu donn n wutoore.
54 Manfojinjiŋ nba ki n mɔk tingbouŋ na ni na,
n yiin yaniie ki jiin a sennii na po.
55 Yennu, n tian a poe nyiɔk, ki dukii a sennu na po.
56 Mi-i dia a senniie, ki n par tuu peen.
Ki jiin Yennu sennu dianu po
57 Yennu, fine tee linba kur ki n loon,
n senn mɔsonn nan n saa dia a senniiwa.
58 N meia nan n par kur, a fii mɔk ninbatinu n paak
nan a mɔsonn nba tee biaŋinba na.
59 N fiit n binbeŋewa ki senn mɔsonn
nan n saa dia a wannu.
60 N kakite yian maa n sak a sennii.
61 Biit damm na pii baruko a n sik leŋ,
ŋaan n kan tamm a sennu po.
62 Tansuuniie ki n tuu fiir ki dontira,
kimaan a kasii sennii na paak.
63 N yɔɔsnbae tee binba kur jiantira na,
binba kur saak a sennii.
64 Yennu, tingbouŋ na kur gbee nan a lomm
nba kaa gbennue; wantin a sennii.
Yennu sennu mɔk nyɔɔt
65 Yennu, a dia a mɔsonn nawa,
ki ŋan ki tur min a daabir.
66 Turimin yan nan bannu,
kimaan n teen yada nan a senniiwa.
67 N tuu tuun ki kpete, ki a daar n tubir,
ŋaan mɔtana n saak a mɔb.
68 A ŋan bonchiann, ki mɔk burchint, wantin a sennii.
69 Biitdamm na fa faake ki paantin,
ŋaan n saak a wannue nan n par kur.
70 Niib maŋ ki mɔk bannu,
ŋaan a sennue teenin parpeenn.
71 N tubdatu na ŋammime,
kimaan li te ki n tumii a senniie.
72 Sennu nba ki a tur na mɔk nyɔɔt ki turin
ki gar tingbouŋ na ni likirii kura.
Barmɔnii nba be Yennu sennu na ni
73 Fine namin, ki bia dian fanu,
turimin bannu ki man fit tumii a sennu.
74 Binba baakita na-i lan, bi sii mɔk parpeenne,
kimaan n dindann be a mɔsonn nie.
75 Yennu, n mi nan a sennii tee kasiie,
ki a mɔk mɔnii nan faa dat n tubir na.
76 Ŋaant ki a lomm nba kaa gbennu na n turin pardɔɔnn
nan faa senn mɔsonn ki tur min nba tee a daabir na.
77 Tinimin ninbaauk ki mii mɔk manfoor,
kimaan n par mei a sennu na paak.
78 Ŋaant ki karinbaandamm na n di fei
nan baa fa faak ki biirin na,
min ŋarin sii dukii a wannu na poe yoo kur.
79 Ŋaant ki binba baakita na n baar n boor,
binba kur mi a sennii na.
80 Ŋaant ki n sak a sennii fanu ki daa di fei.
Yenmiaru nba jiin fat-n-mɔŋ po
81 Yennu, li paakima, ki n ji guu fine maa a tinnin,
n teen n dindann a maan niŋe.
82 N guur a mɔsonn na po ki tan bake;
ki n boi a, “Nlee yooe ki a tan saa sommimi?”
83 N ki mɔk nyɔɔt nan dalenchiɔk nae,
ŋaan n lek ki tamm a sennii na po.
84 N saa guura ki lin wei nlee?
Nlee yooe ki a saa dat binba biirin na tuba?
85 Karinbaandamm nba ki dia a sennu na gbiir bootite
ki loon man baa leŋ.
86 A sennii kur ŋane;
niib dia faake ki biirin, sommitin.
87 Bi poŋ ŋman kpiima, ŋaan n ki yêt a sennii.
88 Tint n manfoor, kimaan a lomm nba kaa gbennu na paak,
ki man fit sak a sennu na.
Ki jiin Yennu sennu na yada teenu po
89 Yennu, a mɔmaan sii yɔɔ be-e, li yɔɔ be-e yendɔuŋ ni.
90 A binbenŋaŋ yɔɔ be-e maaru kur ni,
fine senn tingbouŋ na li seenu ni.
91 A sennu na paake te ki bona kur biar be,
kimaan bi kur tee a daabae.
92 N parpeenn-i bonni kii nyi a sennu ni,
fara nba ki n di nae bo saa kpin.
93 N kan ban yêt a sennii,
kimaan a te ŋanne teenin manfoor.
94 N tee a yɔɔe, tintin; n koore maa mii saak a sennii.
95 Biitdamm na guue a bin kpin;
ŋaan min sii dukii a sennii na poe yoo kur.
96 N bann nan bont kur mɔk joontue,
ŋaan a sennii na ŋarin yɔɔ be-e.
Ki jiin waa loon Yennu sennu na po
97 N loon a sennu bonchiann. N dukii li poe daar kur.
98 A sennii be n boore yoo kur ki te ki n sub ki gar n datai.
99 N mɔk bannu ki gar n wannteeb kur,
kimaan maa dukii a sennii maŋ po yoo kur na paak.
100 N sub ki gar nikpera, kimaan maa saak a sennii na.
101 N yêt toonbiit kure, kimaan maa loon man sak a maan na.
102 N ki yêt a sennii, kimaan a mɔŋe tee n wanntɔɔ.
103 A mɔmaan man bonchiann, li man ki gar siata.
104 A senniie teenin subinii, li paak ki n yêt toonbiit tumu.
Ki jiin yentu nba be Yennu sennu na ni po
105 A maan tee fitire ki wantin sɔnu, ki bia tee yentu, n sɔnu ni.
106 N saa dia n mɔsonjaann nba ki n senn
nan n saa dia a kasii sennu na.
107 Yennu, n biak paakima,
turimin manfoor nan faa senn mɔsonn biaŋinba na.
108 Yennu, gaat n niipoturu miaru na,
ŋaan wannin a sennii.
109 N teen siir nan min chibin n saaŋmaŋ yoo kur;
n ki tamm a sennu na po.
110 Biit damm na pii baruko ki guunin,
ŋaan n ki yêt a kpaanii.
111 A sennii tee n mɔkint nba yɔɔ be-e,
ŋanne teenin parpeenn.
112 N lor man dia a senniie
ki saa tuu daar nba ki n saa kpo.
Yennu sennue guut
113 N ki loon binba ki waa-a fanu na,
min ŋarin loon a sennu.
114 Fine tee n guutɔɔ nan n fat-tɔɔ;
n jii n dindann ki maa a mɔsonn paake.
115 Yimm biit damm na, seetir n boor ni;
n saa sak Yennu senniie.
116 Yennu, turimin paŋ nan faa senn mɔsonn biaŋinba na,
ki mii mɔk manfoor, ki daa te ki n di fei, n dindann ni.
117 Ii dian ki mii be n yamani; ki n sii yɔɔ gbiin a sennii na.
118 A yêen binba kur ki saak a sennii nae,
bi kpinkpannii lora na ki mɔk nyɔɔti.
119 A dia biit damm na gbaka gbaka nan kparchant nae,
li paak, n loon a sennii.
120 A paake ki n tiin jaŋmaanii,
n gbee nan yanputuko kimaan a sennii na paak.
Ki jiin Yennu sennu na saku po
121 N tun linba took ki bia ŋana,
a daa nyikitin nan n datai.
122 Sent mɔsonn nan a saa somm min a daabira;
a daa te ki biitdamm dintin biaki.
123 N guur bak a tinnu sommir na powa,
tinnu nba ki a senn mɔsonn li po na.
124 Ii dian nan a lomm nba kaa gbennu na
ki wannin a sennii.
125 N tee a daabire; turimin bannu, ki man bann a wannu.
126 Yennu, yoo baar nan fan tun siara,
kimaan niib yêen a sennu nae.
127 N loon a sennii ki gar salima,
n loon a sennii ki gar salinŋana.
128 Li paak ki n waa a wannu kur fanu,
n ki loon toonbiit tumu.
Ki jiin sennu dianu po
129 A wannu tee bakitnauŋo. N gaarir nan n par kure.
130 Niib-i bann a maan paak, li tuu turib yentue,
ki teen binba ki mi siar na yan.
131 N ŋakitir a sennii na paake.
132 Ŋmantir n paak ki tinin ninbaauk
nan faa mɔk ninbatinu ki teen binba loona na.
133 Ii dian ki n daa baa nan faa senn mɔsonn na;
a daa te ki biit yentirimi.
134 Nyintin binba dintin biak na nuu ni, ki man fit sak a mɔb.
135 Ŋaan ki a benu-ii tee piisin n paak, ki wannin a sennii.
136 N ninnyuut puub nan mɔkir nae,
kimaan niib nba ki dia a sennu na paak.
Barmɔnii nba be Yennu sennu na ni
137 Yennu, a tee kasii daanɔe, ki a sennii ŋan.
138 Faa tur sennii nba kur ŋane, ki bia took fanu.
139 N par di muue nan wutoor,
kimaan n datai ki yiin a sennii na ki li tee siari.
140 A mɔsonn tee barmɔniie,
n loon a mɔsonn bonchiann.
141 N ki tee siari, ki bi yisimin, ŋaan n ki yêen a sennii.
142 A popeensin sii yɔɔ be-e, ki a sennu na tee barmɔnii yoo kur.
143 N gbee nan daamiie nan parbiir,
ŋaan a senniie teenin parpeenn.
144 A sennii tee mamɔmme yoo kur;
turimin bannu ki mii yɔɔ kii mɔk manfoor.
Yenmiaru nba jiin fat-n-mɔŋ po
145 Yennu, n jii n par kur ki yia,
turimin gatu, ki n saa sak a sennii.
146 N yia; tintin, ki n saa dia a sennii.
147 Yonnu tuu tan do na ki sɔɔ ki n yiinawa,
ki loon sommir; n teen n dindann a mɔsonn nie.
148 N ki gɔɔnt nyiɔk a man fit kii dukii a sennii po yoo kur.
149 Yennu, gbiintirin, kimaan a lomm nba kaa gbennu
na paak, want a ninbatinu ki tinn n manfoor.
150 Nɔɔntont damm nba biirin na ki fɔk nanimi,
ŋamme tee damm nba ki dia a sennu na.
151 Yennu, a ki fɔk nanimi
ki a sennii kur tee linba yɔɔ tee barmɔnii.
152 Yaayoo niewa ki n din tumii,
ki bann nan a sennii maŋ yɔɔ be-e.
Fabinii nba jiin sommir po
153 Gotir n daamii na ki fatin, kimaan n ki tamm a sennu.
154 Taantin ki nyinnin barii ni;
fatirin nan faa senn mɔsonn biaŋinba na.
155 Biitdamm na kan la tinnu,
kimaan bi ki sak a sennii na.
156 Yennu, a ninkpabauŋ yab bonchiann,
want a ninbatinu ki tinnin.
157 N datai nan binba mukisin yab bonchiann;
ŋaan n ki yêt a sennii saku.
158 Mi-i got biitdamm na, n tuu yaa man put nan wutoore,
kimaan bi ki dia a sennii na.
159 Yennu, gotir maa loon a wannu biaŋinba.
A lomm kaa lebitu, li paak, tintin.
160 A maan kur tee mamɔmme,
ki a kasii sennii na kur yɔɔ be.
Ki jiin Yennu sennu weiu fanu po
161 Pandamm tuu lekime kaat,
ŋaan min teen a sennu nae baakir.
162 A mɔsona na turin parpeenn bonchiann,
ki li manin nan nirɔ nba tuu la mɔkint
ki li manɔ biaŋinba na.
163 Faak tone n boor, ki n ki loon li maan,
ŋaan mɔk lomm nan a sennu.
164 Daar nɔɔk ni, n teena niipoouk taar munlore-e,
kimaan a kasii sennii na paak.
165 Binba loon a sennu na be bi yamanie,
ki siar kaa ki saa te bin baa.
166 Yennu, n guu fine a fan tinnin, ki waa a sennu.
167 N saak a wannu, n loon a wannu maŋ nan n par kure.
168 N saak a sennii nan a wannu,
ki a laat linba kur ki n tuun.
Yenmiaru nba jiin sommir po
169 Yennu, ŋaant ki n mɔnii na n baar a boor.
Turimin bannu nan faa senn mɔsonn biaŋinba na.
170 Gbiintir n miaru, ki tinnin nan a mɔsonn nba tee na.
171 N saa yin yaŋe ki donta, kimaan a wannin a sennuwa.
172 N saa yin yaŋe ki jiin a sennu po,
kimaan a sennu tee mamɔmme.
173 A teen siir yoo kur kii sommitin, kimaan n dia a sennii.
174 Yennu, n nian a tinnu sommir nae.
N parpeenn nyi a sennu nie.
175 Turimin manfoor ki man donta,
ŋaant ki a sennii na n sommin.
176 N lin yeeke nan pebotikauk na,
li paak, baat ki tan lon min nba tee a daabir na,
kimaan n ki yêt a sennii na weiu.