24
1 Màrààw wexak Tupàn Tuweharupi Wiko Ma'e hemimutar kury. Iporomono kar wer ze'egatu Izaew wanehe Màrààw pe a'e. A'e rupi Màrààw nupuranu kwaw Tupàn rehe kury. — Ma'e ereputar, ni'i kwaw izupe. Nan. Uwak ywyxiguhu kutyr. 2 Wexak teko Izaew a'e pe wà. Izaew ta'yr wazuapyapyr uzemono'og uzehezehe uker haw iapo pà pitàitàigatu a'e pe wà. Tupàn Hekwe umuze'eg kar Màrààw kury. 3 A'e rupi umume'u ko ze'eg puràg uzeapo ma'e ràm imume'u haw.
Na'aw Màrààw Meor ta'yr ze'eg xe.
'Aw awa upuner ma'e hexak katu haw rehe.
Na'aw ize'eg xe.
4 Upuner Tupàn ze'eg henu katu haw rehe no.
A'ar ihe. Herehazawok.
Aexak Tupàn upuner ma'e ihe.
5 Ipuràg eteahy teko Izaew izuapyapyr waker haw.
Ipuràg eteahy wanàpuzràn wà.
6 Nuzawy kwaw inàzàràn 'yw tetea'u uzehyrohyrogatu ma'e.
Nuzawy kwaw ma'etymaw yrykawhu izywyr har.
Nuzawy kwaw aroe 'yw Tupàn Tuweharupi Wiko Ma'e hemitygwer.
Nuzawy kwaw ywyràkàxigyw 'y huwake har.
7 Heta tetea'u putar 'y Izaew wanupe nehe.
Ui'u putar wà nehe.
Omono putar 'y wemitygwer rehe nehe no.
Wanuwihawete upuner wera'u putar Akak wi nehe.
Teko paw ukwaw putar hemiaihu wakàgaw wà nehe.
8 Tupàn upyro Izaew Ezit ywy wi wà.
Uzàmàtyry'ym waàmàtyry'ymar tapi'ak awa hehaite ma'e ài.
Izaew u'u putar wàmàtyry'ymar wà.
Uzuhaw zauxiapekwer wàkàgwer wà.
Uzuka u'yw pupe wazywà pà wà.
9 Izaew nuzawy kwaw zàwàruhu iriàw upuner ma'e wà.
Iker mehe ni amo numume'e kar kwaw wà.
Aze amo omono ze'egatu Izaew wanehe nehe,
Tupàn omono putar ze'egatu a'e ze'egatu imono har rehe nehe no.
Aze amo omono ze'egaiw Izaew wanehe nehe.
Tupàn omono putar ze'egaiw a'e ze'egaiw imono har rehe nehe no.
10 Na'e Marak wikwahy Màrààw pe kury. Ukwar opo rehe inugwer opo pupe wekwahy haw hexak kar pà. Uze'eg izupe.
— Urenoz xe heàmàtyry'ymar wanehe ze'egaiw imono kar pà newe. Na'iruz haw xo ze'egatu zo eremono wanehe. 11 Eho nereko haw pe kury. Amume'u hekuzar newe. Nezewe rehe we Tupàn Tuweharupi Wiko Ma'e hemupytu'u kar hekuzar newe imono 'ym mehe we a'e, i'i izupe.
12 Na'e Màrààw uwazar ize'eg izupe. — Amume'u a'e ma'e neze'eg herur har wanupe ihe. 13 — Aze mo eremur neparat paw ihewe, aze mo eremur neor paw ihewe, napuner iwer mo Tupàn Tuweharupi Wiko Ma'e ze'eg heruzar 'ymaw rehe. — Nazapo kwaw heremiapo kar nehe, a'e wanupe. — Xo Tupàn hemimume'u zo amume'u putar nehe, a'e wanupe, i'i izupe.
Màrààw ze'egatu haw iahykaw
14 Màrààw uze'eg wi Marak pe.
— Azewyr putar heànàm wanupe ihe nehe kury. Heho 'ym mehe we amume'u putar Izaew neremiaihu wanupe wanemiapo ràm newe nehe, i'i izupe. 15 Na'e umume'u ko ze'eg puràg ma'e uzeapo ma'e ràm imume'u pà kury.
Na'aw Màrààw Meor ta'yr ze'eg xe.
'Aw awa upuner ma'e hexak katu haw rehe.
Na'aw ize'eg xe.
16 Upuner Tupàn ze'eg henu haw rehe.
Aze Tupàn ywate wera'u ma'e umur ma'e kwaw paw izupe,
upuner ikwaw paw rehe.
A'ar ihe. Herehazawok kury.
Aexak Tupàn upuner wera'u ma'e hepuahu zàwenugar kury.
17 Ame'e uzeapo ma'e ràm rehe.
Aexak teko Izaew izuapyapyr wà.
Wanuwihawete zahytata uhyape katu ma'e uzexak kar putar wanupe nehe.
Ur putar Izaew wanuwi zahytata uwewe ma'e ài.
Weityk putar Moaw wanuwihaw wà nehe.
Umumaw putar 'aw teko wiko wera'u ma'e wà nehe.
18 Weityk putar Izaew waàmàtyry'ymar Enom izuapyapyr wà nehe.
Upyhyk putar waiwy wà nehe.
Wiko putar waiwy izar romo wà nehe no.
Teko Izaew izuapyapyr wexak kar putar ukàgaw wà nehe.
19 Zako izuapyapyr wanuwi uhem putar teko wazar nehe.
Umumaw putar tawhu pupe wikuwe ma'e wà nehe.
20 Na'e upuahu haw zàwenugar rehe Màrààw wexak Amarek izuapyapyr wà. Na'e umume'u ko ze'eg uzeapo ma'e ràm imume'u har.
Izypy mehe Amarek wiko teko amogwer wanuwi
upuner wera'u ma'e romo wà.
Iahykaw rehe amo umumaw putar Amarek a'e wà nehe.
Nuzewyr pixik kwaw wà nehe.
21 Màrààw wexak Kene izuapyapyr wà no. A'e rupi umume'u ko ze'eg uzeapo ma'e ràm imume'u har.
Ywy peneko haw ikatu.
Naheta kwaw pezuka haw a'e pe.
Pezapo penaity itahu rehe.
22 Nezewe rehe we Axir pemumaw putar wà nehe.
Peneraha putar wemipyhyk kwer romo wanupe
uma'ereko e ma'e romo a'e wà nehe.
23 Màrààw umume'u ko ze'eg uzeapo ma'e ràm imume'u har no.
Amo teko uzemono'og kwarahy heixe haw awyze har kutyr wà.
Mon aipo wà.
24 Waàmàtyry'ymar ur putar Xip yrypypo'o wi ukanuhu pupe wà nehe.
Weityk putar Axir wà nehe.
Weityk putar Emer wà nehe no.
A'e re Tupàn umumaw putar a'e teko
kwarahy heixe haw awyze har kutyr har wà nehe no.
25 Na'e Màrààw uzemuàgà'ym weko haw pe uzewyr pà kury. Marak oho a'e wi a'e no.