Rut
Eᵽájul élebur yay yaa Rut
Elébur yauye, Rut aĉil me fuhow yo, yo ekan me n’gusen yo gajaol. N’elobolal maa buroŋ baa fiil fice fal Israel fakaene enemo, ban ni fúbbañul fijef.
Elob yauyu no ebaj me, ufan ésuh yay yal Israel ni guvogil utalena gurim. Bare neki ehiĉi búsol ᵽio bo.
Buroŋ fiil Elimelek ala Betuleem ni mof maa Yuda, ni bumundum bubaj sílam ti bieb, búuy, ni eĉet ᵽayma ni guñolol. Elob yauyu nek’eban ni gabugi gal añil, gaĉil me fiil fafu ni fubbañ fijef.
Baje waare gúuba gaĉil me sembe elob yauyu, bugo guomme Noemi, aar Elimelek, ni ásabulol Rut. Rut, áᵽullo me Moab, amaŋut me áhatulo asomol Noemi, najoh bugan asomol ti bugan bugola.
Aaren ace áine ala Israel áuye bi Moab aĉih bo naĉet, nábbañul áyabo n’ace áine ala ᵽoᵽ Israel, gajaol Boas. N’gubaj añil ajae me éni afan ávi ahu David. Ñer Rut náni ace ni waareaw bugo ésuh yay yal Israel gufaŋ me n’gúkanume, mata aĉila aamme abuga David afan.
Ban ñammeŋe bugaa Moab gujamorérit ni bugal Israel. Nemme ejaora bugom, guarenat gúni ni fuomunor fal Aláemit, ti firim Aláemit fulob yo me (Dáteronom 23.4-5).
Wo élebur yauye emaŋ me etajen egitenolal, dóemme bu ace aare ajaora anone n’etut bugan bugo Aláemit afeje, min abaj ró sembe n’eilen Israel.
1
Sílam sasu saa fiil Elimelek
1-2 Elob yauye no ebaj me, ésuh yay yal Israel yo m’babajerut ávi. Gannay gaugu, bieb báloerul dó n’ésuh yauyu. Ñer ace áine, gajaol Elimelek, áᵽullo Betuleem ni mof mamu maa Yuda, náᵽur n’ésugol bugo n’aarol ni úᵽurol gúuba. Min gujow bi ni mof mice mo guoge me Moab. Aarol gajaol Noemi, úᵽurol ahu gajaol Malon, ahu Kilion. Bugo ni fiil fal Efarata gúᵽullo. Ñer n’gujow iki guĉin dó Moab. 3 Ᵽúrto, áin Noemi, Elimelek, naĉet min aarol áni to ni guñolol. 4 Ᵽio, úᵽurol n’guyab sújur bugaa ró Moab : ahu gajaol Rut, ahu Orupa. N’guĉin dó butum símit guñen. 5 Mbiban, Malon ni atiol n’guĉet may bugo éubail, Noemi nanamo to nevonol m’babajut añil m’babajut ánaine.
Rut nalagen Noemi mbaa Betuleem
6 Funah fice, dó ni mof mamu maa Moab, firim fuvugul ni futolol, faamme : Atúla nakanno gásumay bugal ésugol min abbanno me asenil eᵽit yaaro. Noemi nagoror bi éᵽurul Moab, o ni gúsabulol. 7 N’gúᵽurul bi ebbañ mbaa mof mamu maa Yuda. 8 No gúᵽullo me bi ekay, naah gúsabulol : « Jibbañ bi ni saŋul* 1.8 Jibbañ bi ni saŋul : ni gúhiboriay guoge jibbañ bi ni saŋ sijaul.. Jikanomkan maaro ni ᵽoᵽ guñolom gaĉet me. Ti buru jikanóli me, Aláemit mbi may akanul mo. 9 Mb’asenul ánoan ni buru ánaine min jibaj gásumay ni saŋ wáinul. » Naban nállloŋil. Usábulol n’gukoŋ gúihilor 10 n’guogol : « Jimaŋut, wóli bi elageni mbal ésugi. » 11 Naagil : « Usábulom, jibbañ mbaa saŋ ubugaul. Wa uĉile n’jimaŋ jilagenom ? Jíinene búoh níjue ebaj maer uñil iki guᵽilo eyabul ? Jiffase maer íjuut. 12 Neegul jibbañ mbaa saŋul. Injé nífanume nár bi ebbañ íyabo. Hani níyaboene jama min ibaj uñil, 13 ᵽan júju jinagil ᵽiaŋ iki gújalo min guyabul ? Ᵽan jilat búyabo mala enah yay ? A-a, sújurom. Buroŋom bufaŋe gátañi bolul, mata Aláemit najogomjoh búlat. »
14 Ñer gúsabulol n’gufaŋ n’gukoŋe. Orupa nabbañ álloŋol bala akay. Bare Rut najoh búoh ban anamo n’asomol. 15 Noemi naagol : « Ujuh abeli umu n’ebbañ mbal ésugol atoh bo sínatiol. Ukan ti aĉila, uot mbaa súndoi ! » 16 Bare Rut naagol : « Jamb’urondopenom min ihali nibbañ bi súndoom. Bánoban bo nujae, wola. Tánotan to nuĉin me, wola. Bugani buganom, ban Aláemili Aláemilom. 17 To nujae me eĉet, wola, to may mbi gufogom me. Iní inamout n’aw iki eĉet éfaculorola, mbi Aláemit ategom. » 18 Noemi no najuh me Rut aban dáh bi elagenol, ñer nahabo. 19 Min gujow éubail bi Betuleem.
No guĉih bo me, bugal ésuh yay ᵽe no gujugil me, n’gujahali. Waareaw n’guoh : « Dáru Noemi oomme ? » 20 Naagil : « Jambi jibbañ juvogom Noemi, gajow gaa gásumay. Maer juvogom Mara, gajow gaa matalo. Mata Aláemit-Sembe nakakan buroŋom bútali. 21 No níᵽur me tale, biinumom mafiloe, yaŋom gárira yo. Jama Atúla nabbañulom guñen gurakel. Atúla návuomvu búsol, Emít-Sembe ekanutom maaro. Yo eĉil me, jambi jibbañ juvogom Noemi ! »
22 Mamu Noemi abbañulo me, bugo ni ásabulol Rut ala Moab. N’guĉigul Betuleem bugan n’eju ealo eᵽit mitiñil mo guoge me oris.