6
1 Nemme ñer wóli jurokodokor n’Aláemit, yo eĉil me wóli ubugu n’elaul juogul : jambi jihat gáji gagu go jiyab me ni o min gúni gáji garakel ni buru. 2 Maagen mamu, Aláemit naaseh :
« No tinah talu táari me tiĉige, níttunettun galai.
No funah fafu faa min iᵽageni fiĉige, nirambeneiramben* 6.2 Juluj Esai 49.8. »
Juutten ! Maer tinah talu táari me tiĉige, funah fafu no Aláemit ajae me eᵽagen bugan bugagu fiĉige. 3 Wóli jimaŋut jiĉil an naloŋen min alo ni gatil, jambi an abil áju alob maarat aya ni burokóli. 4 Bare til, ni waf waw ᵽe wo wóli jikane me, jigitengiten búoh wóli fumumóli uroka jom bugal Aláemit. Ni burok baubu, jiteteb n’emuten yámah ró sílam, buyoh, ni bíyih ; 5 gutególiteh, n’gujogóli iki gukul, n’guinnul ésuh yay bi ni wóli, ban ni gumugóli ni burok, gúfiroli gámori ni fitiñ. 6 Jurondoŋ buroŋ baĉole, ban n’jibaj gaffas gajoumulo n’Aláemit ; jumutemuten ban n’júsum ni bugan bugagu ; Biinum Banabe ubu ni wóli, ban ni júbboli bugan bugagu maagen mamu. 7 Ni búkanum baa sembe sasu sal Aláemit jivaree bugan bugagu firim fafu faa maagen. Bakaneróli baĉol mee bo buomme gañóli gaa fitih : gal eteh ni gal égaden. 8 Guce ᵽan gusalóli, bugagu ni guĉotihenóli ; guceil ni gujelóli, bugagu n’gulob maaro guya ni wóli ; guce mul ni gujogóli uᵽula-sulob, ban maagen julobe. 9 N’gujogóli ti bugan bugo guffasut ban guffasóli ᵽe, n’gujogóli ti bugan gaam n’eĉet ban bae wóli ubugu m’buroŋ. Nihi gúlatienoli, bare gújuutoli emuh. 10 N’gukanóli n’júgogor, bare wóli ubugu nánonan n’ésumay. N’gujogóli ti bugan galege nár, bare wóli ubugu min jikane me bugan gammeŋe n’gúni usanum. Wóli jínini ti bugan gabajut wáfowaf, bare jibaje waf waw ᵽe.
11 Buru bugaa Korent, wóli julobullob maagen mamu, julobullob waf waw ᵽe waamme n’uinumóli. 12 Wóli jilalut egitenul gábboli gagu góloli, bare til buru fumumul jilalóli me. 13 Maer ban ilob ni buru ti nihi jíni me guñolom iegul : júbbolioli may ti wóli júbboliul me, ban jípeguloli uinumul !
Ení bugan gáguñorut ni bugagu gáinenut me
14 Jambi júguñor ni bugan bugagu gáinenut me ni Kirista. An aĉole nájue ᵽiaŋ ategori ni an ákanumut Aláemit ? Maŋannoe mújue mujaor n’emoĉ ? 15 Kirista ᵽiaŋ nájue ajamor ni Seytane ? An áinene ni Kirista ni an áinenut ni Kirista wa guogore ? 16 Gajamor bu gújue gubaj tutor gávi gagu gal Aláemit ni siᵽaŋ sasu ? Maagen mamu, wolal uomal me gávi gagu gal Aláemit aroŋ me, ti aĉila fumumol alob yo me aah :
« Ᵽan iĉin ni bugo, ᵽan iroŋ n’etulil,
ᵽan íni Aláemilil, ban bugo ᵽan gúni ésugom† 6.16 Juluj Levitik 26.12 ; Esekiel 37.27. »
17 Yo eĉil me Ataw naah :
« Júᵽur ni bugan bugaubugu, jihalor ni bugo ;
jambi jugor waf wasigoe.
Júttun me firimom, ᵽan ialenul‡ 6.17 Juluj Esai 52.11. »
18 « Ᵽan íni ᵽayul,
buru ᵽan jíni úᵽurom ni sújurom.
Maumu ínje Aláemit-Sembe ilobe§ 6.18 Juluj 2 Samiel 7.14 ; Esai 43.6. »