1 Ᵽúrto, nijuh émit evugul ni ᵽoᵽ ettam evugul. Emít yay étiar yay ni ettam yay étiar yay sinemonemo so ᵽooso, fal fafu fámah fafu ᵽoᵽ mo. 2 Mbiban nijuh ésuh yanabe yáᵽullo n’Aláemit éavul n’émit. Esúh yauyu eemme Yérusalem yay evugul yay : ésangenisangen wári ti áyava áibore bi ni áinol. 3 Ban niun firim fijil fúᵽurul n’efenjeŋ yay yaa jávi fuoh : « Biĉin babu banab me bo Aláemit abaj me n’etut buganol ube. Aláemit ᵽan aĉin dó alofil ; ᵽan ñer gúni bugola, ban may o faŋaol ᵽan áni ni bugo. 4 Ᵽan áti jufu jánojan jalolo n’gúĉilil : eĉet mat’ebbañ ebaj, ñuhul mati ñibbañ ñibaj, gápib mati gubbañ gubaj, ñatiñ mati ñibbañ ñibaj. Ey, waf waw ᵽe útiar waw wo banemoer uban. »

5 Ñer an ahu anamo me n’efenjeŋ yay yaa jávi naah : « Juluj, ban ikan waf waw ᵽe úni uvugul. » Mbiban naagom : « Uhiĉ gurim gauge : gurim gom gaa maagen, ban gufiumay gom. »

6 Aban naagom : « Kanoe ban ! Injé iomme fíĉilum fafu ni fúuñenum fafu. An marem mujogol me, ᵽan ikanol narem n’ébula yay yaa mal mamu masene me buroŋ, m’barorenutol bacam bánoban. 7 An ateb me ebeŋ yay, waf wauwu ᵽe ᵽan úni me bijisol ; ᵽan íni Aláemit ahu ola, ban aĉila ᵽan áni añolom. 8 Bare gatee me gubbañ búsol, gáinenut me, gakane me maarat, gamuge me bugan, gakane me suneni, gakane me waf waa múuet, gamigelete me sinetal ni gabije me ᵽe, bugo ᵽooil fugabil fo fuomme ebeleni ni fusun fafu faa sambun ni batoroh babu : yoemme eĉet yay éutten yay. »

9 Mbiban, ace ni emalakaay gaamme futoh ni gúuba gaogen me síremuma sasu saamme futoh ni súuba sammeŋ me sílam sasu súsola sasu saamme futoh ni súuba, nájoul mbal ínje aĉigul naagom : « Ujóul, ᵽan igiteni áyava ahu, aar Gabbarum gagu. »

10 Ñer Biinum Aláemit m’buloom min amalaka ahu ájaenumom bi ni firijaŋ fice fújalo ban ni fubbah maagen mamu. Nagitenom ésuh yay yanab me yaamme Yérusalem Aláemit o n’ekan yo n’éavul n’émit ; 11 bájalool m’bukan yo neh’eij salsal. Malleñe yo manur ni mal eval ejaha (so guŋare me n’gucokor úibor), manur ni mal ébbibi yámah yaŋannoe faŋ. 12 Yérusalem yauyu ebaje fiteᵽ fájaloe ban ni fubbah ; ebaje ᵽoᵽ únonum wono guñen n’úuba, ban ni gánogan ni wo bajene amalaka ni ᵽoᵽ gajow gahiĉihiĉ ; ujow wauwu wo uomme waa guil gagu gaamme guñen ni gúuba gal Israel. 13 Unónum waw maa uiye nogor : baje úfaji bo tinah tiiyeul me, úfaji babu bo tuloe me, uce úfaji ni gañen gárib ni uce úfaji ni gañen gamay. 14 Fiteᵽ fafu fágot me ésuh yauyu ni guval gono guñen ni gúuba fiiye ; ni guval gaugu ujow waw wal uᵽotoraaw gaamme guñen ni gúuba bugaa Gabbarum gagu uhiĉi me.

15 Amalaka ahu alobe me n’ínje jipil jal éurus naogene bi elih ésuh yay, únonum yo ni fiteᵽ fafu fala yo. 16 Esúh yay ulam yo waamme ubbagir urere heb. No nalih yo me ni jipil jaju, nabaj butum ulih wono súuli guñen ni súuba (12 000) ; bahuli babu, bauŋ babu ni gabbah gagu sanur. 17 Amalaka ahu nalih may fiteᵽ fafu. Ni fubaj simetar sono ekeme ni úvi gúuba n sibbagir (144) ni baliger babu bal arafuhow bo naŋar me. 18 Sival sijaha samecore guŋare n’guteᵽ fiteᵽ faufu, ban ésuh yay fumum yo ni éurus étut ecokori, níme ti síbbibi saŋannoe ca. 19 Guval gagu gáĉit me fiteᵽ ésuh yay, ganogor gánogan gal eval ejaha guŋargoŋar n’gúsangen go : fuval fítiar sival sijaha so guvoge me Jasip fubaje, fúutten sasu so guvoge me Safir, fúfatten sasu so guvoge me Kaliseduan, fubarigen, fo, sasu so guvoge me Emérod, 20 futogen so guvoge me Sarudonikis, futogen ni fanur so guvoge me Saruduan, futogen ni gúuba so guvoge me Kiristolit, futogen ni gúfaji so guvoge me Beril, futogen ni gubbagir Topas guŋare, fakan me guñen Kirisopuras, fakan me guñen ni fanur Yasent, fakan me guñen ni gúuba Ametist guŋare n’gucokor fo. 21 Unegen waw waamme guñen n’úuba ti sunuh sijaha sámah uomene ; ganegen gánogan ni enuh yanur gucokori. Furobo fafu fámah fal ésuh yay ni éurus étut fucokori, funogonogor ti ébbibi yaŋannoe ca.

22  Gávi-Aláemit ijugut go dó n’ésuh yauyu : Ataw aamme Aláemit-Sembe aĉila aamme gávi gagu gala yo, o aamme Gabbarum gagu. 23 Esúh yay esoholaut tinah, esoholaut ᵽoᵽ fieñ bi ejaŋen yo, mata bájalo babu bal Aláemit gujaŋene yo, ban Gabbarum gagu guomme gatirul gagu gola. 24 Bugaa súsuh sasu ᵽan gujow ni gajaŋa yo, ban úviaw bugaa mof ᵽan gúŋarul gubajil bi ró. 25 Unegen yo ᵽan úpeguli úni to me funah fafu ᵽe, mat’úmus upegi mata efuga mat’émus ebaj dó. 26 Ᵽan gúŋarul bájalo babu baa sasu súsuh ni gubaj gagu gala so bi ró. 27 Mati baj waf wakurut únonul dó, mati ᵽoᵽ akana-maarat ter abija ánonul ró ; bugan bugagu bugo ujail uhiĉi me n’élebur yay yaa buroŋ yaa Gabbarum gagu, bugo bare gujae ró enogen.