Waf waw wo Aláemit agiten me Saaŋ
Waf waw wabaj me n’élebur yauye
Bavoger babu baᵽi me bal "Apokalis" gugerekay gom : dóemme egiten maagen maffasenuti ter makoᵽeneni. Yo eĉil me ni gubanjalay élebur yauye nebaj gajow gagu gaa "Bagitener".
N’élebur yauye, Saaŋ uligorum ni únogor nah’aŋar bi éᵽajul bugan bugagu waf. Wammeŋe ni wo ni Bahiĉer babu Bufan babu úᵽullo.
Siletar sono futoh ni súuba síĉile élebur yauye (Bagitener 1 bi 3). Siletar sausu sihiĉihiĉ bi ni sijangu may sono futoh ni súuba saam n’ettam yaa bugaa Rom, ni mof mamu maa Asi, yo guvoge me jama Turuki. Ᵽiᵽima élebur yay ᵽooyo bi ni sijangu sausu ehiĉi (Bagitener 1.4, 11). Ahiĉa yo ni so nájoume min alob ni sijangu sasu ᵽee saa mof.
Babu yo (Bagitener 4 bi 20), Saaŋ nalobe mala bujugum bámah bo Aláemit akanol najuh n’émit. Najuge waf wajahalienie ban nagitene bu waf wauwu únie nogor. Ujógum ni Bagitener 4 jow bi 11, ahiĉa ahu nagitene bu Yésu Kirista ápegul me uinum bugan bugagu min gúju gujoh wo Bahiĉer babu Bufan babu bulob me. Saaŋ nagitene may búoh Firim fafu Fásum me faa Yésu Kirista fujoulojow bi mala súsuh sasu ᵽe. Bagitener 12 bi 20 sigitengiten bútaj babu bámah babu bajae me ehek sembe sasu saarat me. Yésu, aamme An ahu Aroŋ me, gugitenol ni ganogor gaa juñol gabbarum. Gabbarum gagu gal Aláemit, gasen me buroŋ go ti gabbarum gaffasut wáfowaf, gutebe ebeŋ yay.
Bagitener 21 ni 22, saamme fúbanum élebur yay, súlobalie mala bátuler buvugul bo Aláemit ajae étul. Ni bátuler baubu, baj dó ésuh yámah, yaavulo n’émit yay ní bájier bal Aláemit : yo eomme Yérusalem. Gurim gaugu go ñer gúuñene élebur yauye, ban may go gubane Ebibul yay ᵽee.
1
Waĉil me élebur yauye n’ebaj
1 Elébur yauye ebaj me maagen mamu makoᵽeni me mo Aláemit agiten me Yésu Kirista. Aláemit nagitenol mo min mbi aĉila may agiten mo urokaol min guffas waf waw waat me mati ᵽio n’ubaj, ban náboñul amalakaol ákail agiten wo ínje Saaŋ aamme arokaol. 2 Niĉimen fo gaa búoh wo nijuh me ᵽe firim fafu fal Aláemit wom, ban Yésu Kirista may nagitengiten búoh dó ᵽe maagen dom. 3 Abaj gásumay, an ahu ajangae me bugan bugagu gurim gauge gáᵽullo me n’Aláemit. Gubaj gásumay gauttene go me ban ni gubaŋ go jon ! Tinah talu tulofulo no waf wauwu ᵽe ujae me ekano.
4 Injé Saaŋ ihiĉulo maa bi ni sijangu sasu saamme futoh ni súuba saamme ni mof mamu maa Asi. Mbi Aláemit, aam to me, aᵽi me náni, ajae me éjoul, asenul gáji ni gásumay. Mbi uinum waw waamme futoh n’úuba waamme bújoŋor efenjeŋol yaa jávi usenul may gáji gaugu ni gásumay gaugu. 5 Mbi Yésu Kirista ᵽoᵽ, agitena ahu ala maagen, an ahu amundum me ailo ni gaĉet me, afaŋ me úviaw ᵽe, asenul gáji gaugu ganur gagu ni gásumay gaugu ganur gagu. Gasal ni sembe síni ni an ahu ábboliolal me, áyu me físimol min aᵽagenolal n’utilolal, 6 ban nakanolal núnial úvi, núnial uteŋena bi emigelet Ᵽayol Aláemit ; mbi gasal ni sembe síni ni o bi nánonan. Amen !
7 Juutten : Umu n’éjoul n’etut úpar waw ; jíĉil jánojan ᵽan jujugol, hani bugagu gábukenol me ; súsuh sasu ᵽe saa mof ᵽan siĉagor mola. Ey, ᵽan siĉagor mola ! Amen.
8 Ataw Aláemit naage : « Injé iomme fíĉilum fafu ni fúuñenum fafu, an ahu aam to me, aᵽi me náni, ajae me éjoul. Injé iomme Aláemit ala Sembe. »
Saaŋ najuh Kirista o ni bájalool
9 Dáre ínje atiul Saaŋ ihiĉeulul maa. Injé ni buru gailo ganur nubajale mala Yésu Kirista : nugumale sílam ni o, wolal ᵽe bugan bugaa Jávi Aláemit nuomale, bugan gaam n’eaken yay. Gujogomjoh gújaenum bi n’éloŋ yay yo guvoge me Patumos, dó ᵽe mala gavare gagu go nivaree me firim fafu fal Aláemit, mala elob yay yo nilobe me mala Yésu. 10 No funah fafu fanab me fiĉilo me, fo nuvogale me funah fal Ataw, Biinum Banabe ni buloom, ban niun búsolom firim fijil, níme ti baeler gáturuᵽa, 11 fuoh : « Wo nujuge mee, uhiĉ wo n’élebur, uban nuboñ yo sijangu sause saamme futoh ni súuba : yal Efes, yaa Simirin, yaa Ᵽerugam, yaa Catir, yaa Sarud, yaa Filadelufi ni yaa Laodise. »
12 No níbaho me bi ejuh an ahu alobe mee n’ínje, nijuh sihandia sono futoh ni súuba sal éurus. 13 Ni baj an anogore ti añol arafuhow ailo n’etut sihandia sausu, akano gájuo gaave bi ni guolol, ban nabaj gasinja gal éurus ni bagingol. 14 Fuhool ni walol ni sútuen par ti bíbil, ti gaeñ ; gúĉilol n’gújuh ti sambun. 15 Guolol n’guij salsal ti mañ máᵽullo ni sambun saa buaᵽ, níme ti nihi gusoi me ni bíniᵽ baa sambun. Firimol ni fíni ti gael gulongos gaa fal fámah. 16 An ahumu naogen ni gañenol gárib suut sono futoh ni súuba, ban gafoje gañege n’ulam go ᵽoowo nihi gúᵽurul ni butumol. Buulol m’buhat ni biij ti bunaa bo bájuger lew.
17 No nijugol me, nilo n’ettam to n’guolol nan an aĉele. Ñer naremben gañenol gárib n’ínje naagom : « Jamb’úholi wáfowaf ! Injé iomme átiar ahu ni ásola ahu, 18 ínje ᵽoᵽ iomme aroŋ me. Niĉelenĉet, bare maer ínje ume min iroŋe bi nánonan. Sífaŋum sasu sal eĉet yay, saa tiñ talu to ufugaaw guomme, usu n’guñenom. 19 Mbi ñer uhiĉ wo nujuh me, wabaj me, ni ᵽoᵽ wajae me ebaj. 20 Suut sasu saamme futoh ni súuba so nujuh mee ni gañenom gárib ni ᵽoᵽ sihandia sasu saamme may futoh ni súuba, wo simaŋ me egiten uwe : suut sausu so suomme emalakaay bugaa sijangu sasu saamme futoh ni súuba ; sihandia sasu so suomme sijangu sausu. »