18
Mɨútú gara Babelónịya
1 Gɨ do kacɨ́ ledre née ní, zɨ́ma lúrúndíki ngíti maláyika kɨ́ ógụ gɨ komo ere. Nɨ kɨ́ mongụ́ rokoꞌbụné, zɨ́ bi óṇgóne do sogo káṇgá wé gɨ zɨ́ rokoꞌbụa née. 2 Zɨ́a ótrụ́ ledre ꞌdága kɨ́dí,
“Utú go, mongụ́ gara Babelónịya utú go.
Nɨ nda go ꞌbe ꞌbɨ ṛị́kị́ dokéké e mbá,
solụ́ kuꞌdú e kpá kɨ́ ngíti géyị bɨcayi lomo e nɨyí ógụ óto ꞌbe ꞌbɨ eyé nda sɨmɨ a ye.
3 Ṛị́kị́ sị́ do ꞌyịmaꞌdí e mbá koyónɨ́ go mɨkóyó,
koyónɨ́ gɨ zɨ́ bɨsinyí mɨméngị ledre ꞌbɨ kára née.
Mɨngburoko ngére ga bɨ ꞌbɨ do sogo káṇgá ní ꞌdiꞌbinɨ́ go mbá bɨsinyí mɨméngị ledre ené,
gɨ zɨ́ bɨsinyí ꞌdódo ledre ꞌbɨ kára née, zɨ́ tụ́ꞌdụ́ ꞌyị úgúóyó éyị́ e ídíye kɨ́ tụ́ꞌdụ́ éyị́ e zɨ́ye kɨ́ngaya.”
4 Zɨ́ma kpá úwú ngíti kúrú gɨ komo ere kɨ́dí,
“Sée ꞌyị amá e, ídísé ólụ́ógụ gɨ sɨmɨ Babelónịya ꞌdáꞌba,
káa bɨ ásé ꞌdíꞌbi bɨsinyí mɨméngị ledre ené,
do ꞌdóꞌdo kótrụ sée ndro kéye ke.
5 Bɨsinyí mɨméngị ledre ꞌbɨ Babelónịya nɨ go mɨówoné gị komo ere,
Lomo owoyeme lúyú ledre ené e go bɨlámáne.
6 Ídísé méngịlúgu zɨ́a kpá ledre bɨ mengị zɨ́se ní,
zɨ́se ꞌdóꞌdo wo bɨsinyíne káa zɨ́ bɨ ꞌdoꞌdo sée ní.
Idí ndúwú káa zɨ́ bɨ nduwu sée ní.
7 Ídísé ꞌdóꞌdo wo zɨ́a ndị́sịné íni ini gɨ zɨ́ éyị́ mɨówo útúásáne kpịnị kɨ́ mongụ́ rokinyi bɨ kóo nɨ sɨmɨ a ní.
Ndịsị ị́lị́ kɨ́ngaya zɨ́a ndị́sịné úku ledre kɨ́dí,
‘Mááyí yị́ amá káa zɨ́ meꞌbe mongụ́ ngére ní, mándá ꞌbɨ amá ꞌyị lerị́ káa zɨ́ kára umbu wá,
éyị́ bɨ mááyí ndị́sị íni ini gɨ roa ní ndaá.’
8 Kadra kị́éꞌdo ledre ga ba nɨyí ógụ zɨ́a,
umbu, ini kɨ́ ꞌbú nɨyí ógụ zɨ́a.
Nɨ áṛáónzó roné za mbá,
Ngére Lomo, ꞌyị rokoꞌbụ nɨ ꞌdécị ngbanga roa ne.
9 “Ngére ga bɨ ꞌbɨ do sogo káṇgá ꞌdiꞌbinɨ́ bɨsinyí méngị ledre ꞌbɨ Babelónịya zɨ́ye ídíye kɨ́ rokinyi gɨ roa ní, sɨmɨ bɨ nɨyí lúrú cika phoꞌdụ gɨ doa gụ́ndrụ ní geré zɨ́ye útúye ndị́sị íni wo. 10 Zɨ́ mongụ́ ngịrị útúne sɨmɨyé, zɨ́ye ngásá tóroyé gbála ndị́sị ndị́sị ótrụ́ kása ini kɨ́ ledre kɨ́dí,
“ ‘Bɨ káa laká nduwú ꞌdi, áko Babelónịya,
áyí tɨ́ go ụ́kụ́ do komozé ba,
lá sɨmɨ owụ́ sịndị́ kadra cúkuꞌdée ba ke.’
11 “Zɨ́ ꞌyị úgúóyó éyị́ e kpá ndị́sịyé íni ini gɨ zɨ́a ꞌyị úgú éyị́ eyé e nɨyí go úyuónzó royé. 12 ꞌYị bɨ nɨ úgú éyị́ eyé ga bɨ dábu e, mɨṛíṛiṛí késị́ e, tutú ga bɨ kɨ́ lámá royé ní, bongó ga bɨ kɨ́ lámá royé ní, kágá ga bɨ kɨ́ ndonyoyé ní, bɨlámá éyị́ ga bɨ yemenɨ́ yée gɨ sɨmɨ kágá kɨ́ so kiꞌdi ní, kpá kɨ́ bɨlámá éyị́ ga bɨ yemenɨ́ yée gɨ sɨmɨ késị́ e kɨ́ tutú e ní ndaá. 13 Gba sụꞌbụ́ mɨndonyo, kɨ́ kágá mɨndonyo e, kɨ́ kágá ụkụ́, leꞌyị́ e, sụꞌbụ́ e, tụdụ e, kére e, ị́tị́ e, kábịṛị́kị e, usáni e, arabíya ga bɨ bangá ndịsịnɨ́ lála yée ye ní, owụ́kụlụ́ e, kpá kɨ́ ꞌyị ga bɨ nɨyí bo ní ꞌyị úgú ndaá.
14 “Zɨ́ ꞌyị úgúóyó éyị́ e ndị́sịyé íni ini kɨ́ mbụ́mbụ́dụ́ wáwá, wáwá, kɨ́ úku ledre kɨ́dí, ‘Sée ꞌyị ꞌbɨ Babelónịya e, née kenée laká lerị́ ꞌdi. Mbágá éyị́ ga bɨ kóo zɨ́se ba ndụkụ́nɨ́ gɨ zɨ́se go mbá, ndaꞌbaogụnɨ́ lolụ wá.’
15 “Zɨ́ ꞌyị ga bɨ ndịsịnɨ́ úgúóyó éyị́ ga gére née zɨ́ye ndị́sị ndíki tụ́ꞌdụ́ késị́ e ní ídíye kɨ́ ngịrị royé. Do ngásá tóroyé gbála íni kása ini gɨ zɨ́ ngịrị ledre bɨ nɨ ndị́sị méngị roné ní. 16 Zɨ́ye ndị́sịyé mbụ́mbụ́dụ́ wáwá wáwá kɨ́ úku ledre kɨ́dí,
“ ‘Bɨ káa lerị́ ꞌdi, Babelónịya mongụ́ gara,
tụ́ꞌdụ́ éyị́ ga bɨ kóo zɨ́yị kɨ́ ledreyé owóowó káa zɨ́ ledre dábu e, késị́ e,
kɨ́ tutú ga bɨ ṛiṛínɨ́ mɨṛíṛí ní ndanɨ́ lolụ mbá wá.
17 Káa zɨ́ ledre izi ní, tụ́ꞌdụ́ éyị́ ga bɨ kóo sɨmɨ Babelónịya ba ndụkụ́nɨ́ go mbá.’
“Zɨ́ ꞌyị lála kuṛúngba e, kpá kɨ́ ꞌyị máa yée ga bɨ ndịsịnɨ́ gámá kɨ́ kuṛúngba maáge ní, kpá kɨ́ yée ga bɨ ndịsịnɨ́ méngị moko sɨmɨ iní ní, ị́nyịyé ngásá tóroyé gbála ndị́sị lúrúkása bi íri. 18 Sɨmɨ bɨ lurúnɨ́ cika phoꞌdụ gɨ do Babelónịya gụ́ndrụ káa zɨ́ cika ṛịndị́ ní, zɨ́ye ndị́sịyé mbụ́mbụ́dụ́ kɨ́ úku ledre kɨ́dí, ‘Ngíti mongụ́ gara bɨ zɨ́a rómoné gɨ do wo bɨ nɨ go áṛáónzó roné ba ndaá.’ 19 Zɨ́ye ndị́sịyé íni ini kɨ́ mbụ́mbụ́dụ́ kɨ́ léfe káṇgá kɨ́ mbụkụ sɨmɨ doyé, kɨ́ úku ledre kɨ́dí,
“ ‘Bɨ káa lerị́ ꞌdi, Babelónịya ụkụ́ go.
ꞌYị ga bɨ za mbá ndịsịnɨ́ gámá kacɨ́ komo ngbuṛu ní,
nɨyí kóo go mbá kɨ́ éyị́ e zɨ́ye gɨ zɨ́a.
Káa zɨ́ ledre izi ní, éyị́ ga gére née ụkụ́nɨ́ go mbá.
20 Sée ꞌyị ꞌbɨ komo ere e, ídísé ídí kɨ́ rokinyi.
ꞌYị ga bɨ ꞌbɨ Lomo ní, ꞌyịmɨkása e kɨ́ nébị e mbá, ídísé ídí kɨ́ rokinyi,
Gɨ zɨ́a Lomo ꞌdoꞌdo Babelónịya go gɨ zɨ́ bɨsinyí ledre ga bɨ mengị sée kɨ́e ní.’ ”
21 Zɨ́ maláyika bɨ kɨ́ mongụ́ rokoꞌbụné ní ꞌdíꞌbi mongụ́ tutú káa zɨ́ ꞌbɨ ụ́sụ éyị́ ní, ụ́cụ a bu sɨmɨ mongụ́ iní zɨ́a úku ledre kɨ́dí,
“Kɨ́ mɨmbéꞌdekesị́,
Lomo nɨ ụ́cụóyó mongụ́ gara ga bɨ Babelónịya ní kenée,
utúasá ndáꞌbaógụ ídíne lolụ káa zɨ́ wo bɨ ꞌdáꞌdá ní wá.
22 Do ꞌyị úku keꞌbị e kɨ́ kụꞌdụ́, kɨ́ káṇgá,
utúasánɨ́ lolụ úwú a íri wá.
ꞌYị ꞌbɨ moko ꞌbɨ ꞌyị úgúóyó éyị́ e,
utúasá lolụ ídí íri wá.
Utúasánɨ́ lolụ úwú gboṛụ tutú kɨ́ ụ́sụ éyị́ ówụ́ íri wá.
23 Bimɨóṇgó utúasá lolụ ídí íri wá.
Kúrú oꞌdo kɨ́ mɨkánda meꞌbené
utúasá lolụ ówụ́ sɨmɨ gara née íri wá.
ꞌYị ga bɨ kóo ndịsịnɨ́ úgúóyó éyị́ e ore ní nɨyí kóo ye kɨ́ rokoꞌbụyé.
Londonɨ́ ṛị́kị́ sị́ do ꞌyịmaꞌdí e go zɨ́ye ꞌdíꞌbióyó komoyé gɨ ro Lomo.
24 ꞌYị ga bɨ ꞌbɨ Babelónịya ní ndịsịnɨ́ kóo go úfu nébị e kɨ́ ꞌyị ga bɨ ꞌbɨ Lomo ní
kpá kɨ́ ngíti géyị do sogo káṇgá.”