1 Gõꞌdá nĩngá sĩ, má drí mãlãyíkã ãzâ ndrẽzó ânĩꞌá ꞌbũû lésĩ ãngó drı̣̃ ꞌá nõngá. Gólâ cú rĩꞌá mãfõtáã ạ́tı̣̃ ꞌbú ạ̃dũkũ ãkó dı̣̃ ngı̣̂lı̣́-ngı̣̂lı̣̃ rî kâ bê yí drı̣́gạ́, gõꞌdá kpá nyãrĩ ạ́ngı̣́ tãmbãrã kãgãꞌdã rî bê. 2 Ĩtí rî, gólâ drí ı̣̃nı̣̃ ândrê õnjí tẽtẽ ꞌdî rũzó, ꞌdĩî rĩꞌá ı̣̃nı̣̃ gólâ rĩ ꞌbá trá ndrô dũû sĩ, gólâ rĩꞌá zı̣̃lâ Sãtánã kúmú líndrí õnjí rî ꞌbá yî drı̣̃lı̣́ rî ĩꞌdî. Gõꞌdá mãlãyíkã ꞌdî ômbê gólâ trá nyãrĩ ạ́ngı̣́ kãgãꞌdã ꞌdî sĩ. 3 Gõꞌdá mãlãyíkã ꞌdî drí ı̣̃nı̣̃ rî ꞌdĩ trõzó vũlı̣́ kạ̃ạ́lũ ꞌbú gólâ dı̣̃ ngı̣̂lı̣́-ngı̣̂lı̣̃ ạ̃dũkũ ãkó ꞌdĩ ꞌá, gõꞌdá mãlãyíkã rî ꞌdĩ drí ꞌbú rî ꞌdĩ ạ́tı̣̃ lâ âꞌbãzó gõꞌdá îcízó lâ ngạ́rạ́, tãlâ Sãtánã õzó kô kpá ngãâ âfõlé ĩvĩ rĩꞌá õjílã âdólé ãngó drı̣̃ ꞌá, té bũúũ ndrô kútũ-ãlô õndẽ rû trá rî ĩꞌdî. Ndrô kútũ-ãlô ꞌdĩ vósĩ rî, áâꞌdô ı̣̃nı̣̃ rî ꞌdĩ înjíꞌá kậyı̣̂ fínyáwá sĩ.

4 Gõꞌdá má drí kpá õjílã ãzâ ꞌbá yî ndrẽzó rĩꞌá ĩyî kı̣́tı̣̃ kũmũ kâ rî ꞌbá yî drı̣̃ı̣̂ sĩ. Õjílã rî ꞌdĩ ꞌbá yî óꞌê gólĩyî trá lîdrílí óꞌdí lédrẽ-lédrẽ ró. Ôvârí fẽ drı̣́-ãcê trá õjílã rî ꞌdĩ ꞌbá yî drí rĩzó tã kĩlí. Gólĩyî kpá rĩꞌá õjílã gólĩyî ûfúlı̣́ trá, tãlâ gólĩyî âtâ tã trá trạ̃ậtrậ õꞌbí ꞌá kĩ, Yésũ ĩꞌdî rĩꞌá kúmú ĩyíkâ ĩꞌdî, gõꞌdá tãlâ gólĩyî âtâ kpá úlı̣́ Ôvârí kâ rî ꞌbá yî trá õjílã drí rî tãsĩ rî ꞌbá yî ĩꞌdî. Õjílã rî ꞌdĩ ꞌbá yî ı̣̂njı̣̃ı̣́ ĩyî kõrõnyã ândrê õnjí tẽtẽ ꞌdî kô, ngãtá gólĩyî gã kpá trá líndrí lâ ı̣̂njı̣̃lı̣́, ngãtá lãmbé lâ ꞌbãlé ĩyî ándrá-gạ́-sı̣́lı̣́ ꞌá ngãtá drı̣́ ꞌá. Gõꞌdá gólĩyî âꞌdô rĩꞌá kpãkã ãlô Yésũ yí bê kúmú ró ĩyî ndrô kútũ-ãlô sĩ. 5-6 Gõꞌdá tã rî nõ rĩꞌá tã drı̣̃-káká lîdrî-lîdrî kâ rî ĩꞌdî. Õjílã gólĩyî ꞌẽꞌá lîdrílâ ĩyî õdrã ꞌásĩ sı̣́sı̣́ rî ꞌbá yî, rĩꞌá õjílã ngîngî lâ Ôvârí kâ rî ꞌbá yî ĩꞌdî. Ãyĩkõ bê! Ãyĩkõ bê! Gólĩyî âꞌdô âꞌdóꞌá ãyĩkõ ró. Îcá kô gólĩyî drí ôdrãzó óꞌdí gólĩyî lôꞌbê-lôꞌbê sĩ lı̣̃mvû ândrê gólâ rĩ ꞌbá kõlé lạ̃sı̣́ ró rî ꞌá. Ĩtí rî, gólĩyî âꞌdô lôsĩ ꞌẽꞌá Ôvârí yî drí Yésũ Krístõ bê gólĩyî sı̣́sı̣́-lésĩ rî ꞌbá yî ró. Gõꞌdá gólĩyî âꞌdô âꞌdóꞌá kúmú ró ĩyî Krístõ bê ndrô kútũ-ãlô sĩ. Ndrô kútũ-ãlô ꞌdĩ vósĩ rî, õjílã ạ̃mbúkũ gólĩyî ôdrã ꞌbá trá rî ꞌbá yî âꞌdô ĩyî kpá lîdríꞌá õdrã ꞌásĩ, âꞌdô ró tã gólĩyíkâ kĩzó bê.

7 Gõꞌdá âbĩ-âbĩ ámákâ ꞌá rî, má ndrê tã trá nõtí. Ndrô kútũ-ãlô ꞌdĩ õndẽ rû trá rî, Ôvârí înjî Sãtánã trá nyãrĩ ꞌásĩ. Gõꞌdá drílâ âfõzó ꞌbú ꞌásĩ. 8 Nĩngá sĩ, gólâ ngâ trá nĩlí võ tı̣̂ ãngó drı̣̃ı̣̂ rî ꞌbá yî ꞌásĩ ãkí ãkó, nĩꞌá õjílã õrĩ kâ ndrĩ âdó bê gólĩyî êꞌbélé võ ãlô ꞌá, ãꞌdô ró bê gólĩyî drí ạ̃jú ꞌbũzó Ôvârí bê.* 20.8 Yõwánĩ zı̣̂ õrĩ rî ꞌdĩ ꞌbá yî drí Gógõ ãngó Mãgógõ kâ rî ꞌásĩ. Tã ậngũ ꞌbá Ẽzẽkélẽ âtâ tã õrĩ Gógõ ꞌdĩ tãsĩ búkũ íyíkâ ꞌá kápĩtã lâ yî rĩꞌá 38, gõꞌdá kpá 39. Rú ꞌdĩ âꞌdâ õjílã gólĩyî ndrĩ ạ̃jú-ꞌbá-ãzí Ôvârí kâ ró rî ꞌbá yî ĩꞌdî. Õjílã trá rĩꞌá dũû õzõ drı̣̃-ꞌbí kâtí. 9 Nĩngá sĩ, má ndrê gólĩyî drí ngãzó võ kpãlé ãngó drı̣̃ı̣̂ sĩ ndrĩ gõꞌdá cãlé võ õjílã Ôvârí kâ drí âꞌdózó tũ ꞌálâ ãlô rî kĩlí gbãâ, ꞌdĩî rĩꞌá õjílã jạ̃rı̣́bạ̃ gólâ Ôvârí drí lôvó lâ ꞌbãlé rõô rî ꞌá rî yî ĩꞌdî. Kpálé ĩtí rî, lạ̃sı̣́ âꞌdô âꞌdéꞌá ꞌbũû lésĩ gõꞌdá ạ̃jú-ꞌbá-ãzí Ôvârí kâ ꞌdĩ ꞌbá yî zãlé ngbá vólé. 10 Gõꞌdá nĩngá sĩ rî, má ndrê Ôvârí drí Sãtánã gólâ õjílã rî ꞌdĩ ꞌbá yî âdó ꞌbá rî vũzó lı̣̃mvû ândrê lạ̃sı̣́ bạ̃rútı̣̃ kâ ró rî ꞌá ꞌdó ndrĩ kõrõnyã ũrı̣̃-gâ-dẽ ró ꞌdĩ ꞌbá yí bê, gõꞌdá kpá tã ậngũ ꞌbá gólâ õnjõ âgã ꞌbá trá rî yí bê. Gólĩyî âꞌdô rĩꞌá tólâ ĩzã kõkõ ŋãlé ĩyî drı̣̃ı̣̂ zãâ gbạ́dú ró.

11 Nĩngá sĩ, má drí Ôvârí rî ndrẽzó gólâ cú rĩꞌá rĩlí gá kı̣́tı̣̃ gólâkâ mvẽêmvê ró rî drı̣̃ı̣̂. Gõꞌdá gólâ âꞌdâ rû bê rî, gõꞌdá ꞌbũû ãngó drı̣̃ bê drí ậvı̣̃zó ngbá vólé má lı̣̃fı̣́ sĩ. 12-13 Gõꞌdá nĩngá sĩ, má drí õjílã ndrĩ gólĩyî ôdrã ꞌbá trá rî ꞌbá yî ndrẽzó. ꞌDĩî rĩꞌá ãrãkã gõꞌdá ꞌdĩyímvá bê ndrĩ ꞌdó âdréꞌá ĩyî kı̣́tı̣̃ Ôvârí kâ ândrá. Õjílã ndrĩ lêté ꞌbá trá lı̣̃mvû zẽlé rî ꞌbá yî âfõ trá vólé ĩvĩ lı̣̃mvû ꞌásĩ, gõꞌdá gólĩyî ndrĩ lôꞌbãlé trá ꞌbú ꞌá rî ꞌbá yî âfõ trá kpá ndrĩ ĩyî lóꞌdé ꞌásĩ. Gõꞌdá kpá gólĩyî ôdrã ꞌbá ãvõ lâ yî lôꞌbãlé ꞌbú ꞌá kôꞌdáwá rî, lîdrî ĩyî kpá trá ndrĩ. Gõꞌdá õjílã ãlô drí búkũ ãzâ ꞌbá yî âtrõzó ꞌâ lâ yî lônyĩlí, gõꞌdá kpá õjílã ãlô rî drí búkũ gólâ cú õjílã gólĩyî ꞌẽ ꞌbá rĩlí zãâ gbạ́dú ró rî ꞌbá yî rú lâ yí bê rî nyĩzó. Gõꞌdá Ôvârí drí tã õjílã kâ kĩzó ãlô-ãlô. ꞌDĩî té rĩꞌá âꞌdô tã gólâ îgĩlí trá tã ꞌẽꞌẽ nî ãlô rî kâ búkũ ãzâ ꞌdĩ ꞌbá yî ꞌá rî vó ró. Ĩtí rî, gólâ âꞌdô tã nî ãlô rî kâ kĩꞌá kpá té âꞌdô tã gólâ ní drí ꞌẽlé trá drẽ ãkpã ní drãá kô rî vó ró. 14-15 Õzõ õjílã ãzãkã ãlô, gõꞌdá gólâ rî rú íĩîgĩ kô búkũ õjílã gólĩyî rĩ ꞌbá ĩyî lédrẽ-lédrẽ ró zãâ gbạ́dú rî ꞌbá yí kâ ꞌá rî, úvũ gólâ íyíkâ kôrô lı̣̃mvû lạ̃sı̣́ ró ꞌdĩ ꞌá. ꞌDĩî vósĩ, õdrã gõꞌdá trá yûꞌdạ́wạ́ lóꞌdé yí bê. Úûfû ngá rî ꞌdĩ ꞌbá yî trá lı̣̃mvû ândrê lạ̃sı̣́ ró rî ꞌá ngbá. Zı̣̂ ĩyî lı̣̃mvû rî lạ̃sı̣́ ró ꞌdĩ rú lâ kĩ, “ ‘Õdrã rı̣̃ lâ ró zãâ” ’ rî.