1 Kiyoo kaama malaikat bagee mée ena, kuwa otaawee petoo to doopea malaikat bagee petoo to kuwa waa ena meedoota ni paagoo nasiino, "Aa meei. Otoopa kepe masenaa see api damaa to mee pedeo kiyaano kuwa kadeeyaanaka. Mee pedeo see api damaa to mee uwo eebaa see yoo animaata toogeeka. 2 Magaa da kaa ebo tookee bagee yuwa mee apii to ma otoopa aadoge-maadoge segeekea. Magaa da kaa bagee okoo boomagaa see uwoo maamaa noomaata see see okoo mee apii to ma maamaa tobaaka taagee naadi kaama boomagaa taakea mokoo" see nasigi.

3 Kiyoo kaama Roh me anii pesee nakiyaata kaama mee malaikat see mée to me anii ebo mee maga ugii da kaa nadoogi. Peemaata kaama anii deeyaa naaki api ena topa. Waa biyaa ipu epoo da see see agiyoo damaa to dagii da kaa animaata totaaka. Mee agiyoo damaa to wa me maa to kaa Ogatamee wisineekee ekaa yuwa maamaa ebeamaata topa. Waa mumo kegaa petoo, takuu apa gaasi see agiyoo damaa to. 4 Apii to mee diino esee daamaa. Wa me dokaa yuwa ko dadi poo epoo da ma, tadaa epoo da ma see see dokaa maataata topa. Wa me maa to kaa emas ma, kepe ebo edaakee omaa yuwa ma, mutiara keepa yuwa ma kuwa wasi-wasi taaka. Wa me yagaa da kaa emas otaawee ena agoo. Mee otaawee yiba wa me tobaaka taagee naadi esee pedeo agiyoo maamaa agoo, mée pedeo kiyaayaa agiyoo-pagiyoo kuwa pudii. 5 Wa me etaguu to kaa ekaa ena ebeamaata topa. Mee ekaa da mee mena nekeeniino yaato idukaa kaama boonemaata awee da kaa kiyaano taa, mee ko kisee: "Ebo kota magaa Babel mee ko tobaaka omaago see api damaa to mee, pedeo kiyaa apii yuwa uduma me baayo mee ebea-ebea, magaa da kaa pedeo agiyoo-pagiyoo uduma manii to mee" see menaa kuwa mee apii to kaa ebeamaata topa. 6 Uwo noomaata kaama boomaga-baamaga siyaa mokoo mee apii to miya kisee. Wa me Ogatamee me daamaa wa too wigintaata bagee yuwa ma, Yesus kaa menaa yaweganaa see bagee yuwa ma kuwa wa me okoo me tadaa peeyaata kaama ede ma, ede ma boomaga-baamaga taaka mokoo. Anii kisee deeta kaama dimi nagimaano ebo.

7 Kuwa kaboo da mee malaikat see mée to me nasiino, "Aa kaasee kaa dimi nagimeamoo taake? Mee apii to ma, bedaa mee mumo kegaa petoo, takuu apa gaasi kisee mee apii to doonaa see agiyoo damaa to mee ma ekea kaa boonemaata menaa nekeeniino yaato kuwa anii awee da kaa kasi-maniinaka, mee ko kisee: 8 Mee apii to doonaa see agiyoo damaa to a me deepe mee ko waa idukaa tota kiya eto toono taa. Waa eto toono taa kiya eebaa umiino taa kaa waa paa yuwa dooyamoo taa see komoo to yiba kaama pakaatagi. Pakaamaata kaama waa pedeo kiyaano yoo pootagi. Mee agiyoo damaa to pakaamaagi kaboo magaa da kaa bagee me deeta kaama okoo me 'Ei, waa idukaa tota kiya mee wodoo diino taa, eto too bedaa awee da kaa kigi nao' naadi dimi nagii-nagii taatagea. Kuwa bagee kuwa ko Ogatamee me kapogee kaa okoo ekaa yamagaano taa bagee yuwa. Mee ko Ogatamee me idukaa petamanii agiyoo-pagiyoo uduma ogaatagaano taa kaboo Wa me tuyaabuu siwoo taatagi bagee okoo ekaa yuwa yamaataata kiya kuwa okoo ekaa yamaatagaano taa bagee yuwa me mee agiyoo damaa to deeta kaama dimi nagii-nagii taatagea. 9 Kuwa menaa kuwa nekeeniino yaato ko dimi ipi see bagee yuwa daamaa nekeenii, kuwa ko mumo kegaa petoo to kuwa ko maga kuye petoo to ebea-ebea mee. Kiyoo ko mee apii to animaata toogee yoo. 10 Bedaa kisee miya kuwa mumo kegaa petoo to kuwa ko magaa da kaa ebo tookee bagee okoo petoo kuwa ebea-ebea. Kuwa ebo tookee bagee petoo to kuwa ko okoo idibi yaato ebo toono kuwa taa kiyaata. Okoo mée waa ena eto ebo totaaki, petaagoo to mee eto ebo toono taa kaboo. Waa meemaata ebo tootagi mee ko peenaa too, waa taa ma taa keedaa too ebo tootagi. 11 Mee mumo kegaa petoo see agiyoo damaa to a me deepe mee gaayu ko waa ebo tookee bagee wagaagoo to mee ebea-ebea. Waa idukaa ebo tota kiya eto ebo toono taa. Waa ko okoo ebo tookee bagee petoo to kuwa mée waa ena. Waa bedaa kaagaa ena ma ebo tootagi kiya waa pedeo kiyaano yoo pootagi. 12 Mee agiyoo damaa to kaa takuu apa gaasi a me deepe kuwa ko okoo epeekaa magaa da kaa ebo tookee bagee gaasi ebea-ebea. Okoo eto kiipaa ebo toono taa kiya okoo mee agiyoo damaa to ma epo enaataa jam ena too too ebo tusi naadi pesee da mee masiitagea. 13 Kuwa ebo tookee bagee gaasi kuwa okoo uduma ena dimii, ena menaa kaa mee agiyoo damaa to wa too ebo tusi naadi okoo me ebo tusi naadi maseta pesee da kuwa waa maniitagea. 14 Okoo epo enaataa Domba Pooduu to ma aawogee taano see naadi yape masiitagea. Kiya Domba Pooduu to mee Waa Ebo Wodoo Eboo, magaa da kaa tookee eboo yuwa uduma miya okoo asii Eboo yoka Wa me okoo uduma daba, peedi kiyaatagi. Bedaa kuwa Waa ma epo enaataa bagee okoo me miya kisee ukuwaatagea. Okoo ko Wa me Ni paagoo nameei naadi kaama daamaa wigintaata bagee yuwa, Wa me menaa daamaa yayeetaa see bagee yuwa" see kuwa mee malaikat see mée to me nasigi menaa.

15 Bedaa mee malaikat see mée to me nasiino, "Mee otoopa kepe masenaa see api damaa to waa uwo eebaa see yoo animaata totaaka see a me deepe mee ko kuwa uwoo yuwa kuwa gaayu ko mée ebea-ebea. Kuwa ko mée tomaa-tomaa yuwa ma, maga tomaa-tomaa yuwa ma, mena tomaa-tomaa yuwa ma kisee mée eebaa ebea-ebea kuwa. 16 Mee agiyoo damaa to waa takuu apa gaasi ebea-ebea see a me deepe mee gaayu ko kuwa bagee gaasi kuwa ebo tuyaata kaama okoo ma, mee agiyoo damaa to ma okoo paaya enaataa mee pedeo apii to be kaa wa me agiyoo-pagiyoo uduma oma yamasegeeta kaama má tago ekeasiitagea. Okoo me wa me ponee yuwa noomaata kaama waa biyaa kaa pooniyaatagea. 17 Okoo me kisee ukuwaatagea kuwa ko Ogatamee me gaata-gaata doodoo too. Wa me okoo me dimii yiba 'Kisee ukuwaai' see dimii mee mantaata kaama okoo uduma ena dimii, ena menaa kaa mee agiyoo damaa to wa too ebo tusi naadi okoo me ebo toono pesee da waa maniitagea. Mee agiyoo damaa to magaa da kaa ebo tootagi, kisee too Ogatamee me kisee ukuwaaniita, kisee ukuwaaniyaabuu taata see aseta menaa kuwa uduma sikii, uwa daaniita yoo too. 18 Mee a me deepe api damaa to mee gaayu ko ebo kota magaa mee ebea-ebea. Mee magaa mee too ebo, pesee, apanaa magaa kaa ebo tookee bagee kuwa uduma me eboo" see kuwa mee malaikat see mée to me nasigi menaa.