8
1 Núu súcuan te jnūhun cánuú gá jeē jé ni cahān rī cúu yāhá: Névāha yó ɨɨn sutū cujéhnu nájnūhun ni cahān rī, te ndéé yá lado váha mesa nuū ndácu jniñu máá Yaā cujéhnu nde andɨvɨ́. 2 Te vijna te cúu ya sutū nde andɨvɨ́, jeē cúu ndije lugar iī jeē ni sáha máá Jítoho yō Yaā Dios, nasūu ñáyuu. Chi tu cáa nájnūhun vehe iī jenahán jeē ní casáha ñayuu. 3 Te tāca sútū cujéhnu ni jeconaā de jeē socó de ndajníñu jíín quɨtɨ nuū Yaā Dios. Núu súcuan te Jesucristo suni ni jini ñúhún jeē socó yā jeē cúu ya sutū. 4 Te núu ní íyo ga yā ini ñayɨ̄vɨ́, te ni ma quijnáhan jeē cúu ya sutū jiín táca gá sutū, chi níní cásocō gā de quɨtɨ nájnūhun cáhán ley Moisés. 5 Te jniñu cásáha de, tu quíjnáhan jíín jéē iyó andɨvɨ́. Chi cúu ɨɨn muestra‑ni jeē steén sɨquɨ̄ andɨvɨ́. Te cúu nájnūhun jeē ni cáhān Yaā Dios jiín Moisés quɨvɨ̄ ní quejéé de sáha de vehe iī jenahán: Coto vāha ró jéē sáha ró táca ndajníñu nájnūhun jíto jeē ni stéén rī nuū rō nde xinī yúcu, áchí Yaā Dios jiín de. 6 Te vijna te sáha Cristo jniñu jéhnu ndasɨ́ gá vēsú jeē casáha tāca sútū ún, chi ndíso jníñu ya sɨquɨ̄ contrato jeé jéē yóhyo vāha ga, chi ndíso jnūhun jéhnu ga jeē ni jéjnūhun Yaā Dios.
7 Chi contrato ley xīhna ñúhún, núu jeē ni sáha jeē quée vāha jniñu núú, te tuá cánuú jéē cóo contrato uū. 8 Chi ñayuu jenahán un jéē tu ní cáquendōo ndaā, suhva ni cahān Yaā Dios jiín i, áchí tutu:
Quiji quɨvɨ̄ jeē nasáha ri ɨɨn contrato jeé
jíín ñáyuu Israel jiín ñáyuu Judá, áchí Jítoho yō Yaā Dios.
9 Te ma cóo nájnūhun contrato jeē ni sáha ri jiín jíí i jenahán,
quɨvɨ̄ jeē ní jnɨɨ ri ndaha de jíjnáhan de,
te ni quenehen ri de ini nación Egipto.
Chi tu ní cásquícu vāha de jíín contrato ley rī.
Jeē yúcuan tuá ni táñúhún rí de, áchí Yaā Dios.
10 Núu súcuan te suhva coo contrato jeē nasáha ri jiín ñáyuu Israel,
nde na quíji quɨvɨ̄ yúcuan, áchí Jítoho yō Yaā Dios:
Sáha ri jeē jécūhun ley rī nuū jeē níjnūní i,
te suni ini anuá i tee ri jnūhun ley rī.
Te cuu ri Yaā Dios maá i,
te máá i cuu ñayuu maá rí.
11 Te tuá jíni ñúhún stéén i nuū jnáhan i nuū ñáni i,
návāha cuni i ndese Yaā cúu Jitoho i.
Chi ndɨhɨ i cuni ndese Yaā cúu ri,
nde ñayuu núu ga jiín ndé ñayuu cujéhnu ga.
12 Chi cone cáhnu ni rī nuū i jeē ní casáha i jniñu néé,
te ni ma núcūhun ga ni rī cuēchi ni casáha i.
Achí Yaā Dios. 13 Te jeē ni cáhān yā jeē cuáha ya ɨɨn contrato jeé cúu jeē ní cachi yā jeē tuá cuajníñu contrato xīhna ñúhún. Te ɨɨn jeē ní cutúhú jéē tuá jejníñu, chi jíní yō jeē je yajni naa.
Vehe iī ñayɨ̄vɨ yáha ní steén ndese cáa andɨvɨ́