1 Kirisi ilonidi a tayepe le manga mooloo ye urata moonoo yo ke ger ngan oo. Le ke be la tayei ben poranga pang ger mulu tiap. Nen le ole kakodo le kamede ye Kirisi, inbe kin kamalum pang di tooltool a tiyei ang le kayei dawa ben poranga pang ger mulu be.

2 Ai, kapalongo a katar talngamim ye betanga kiau. Au Paulu i awete nen, kumata le be kamalum pang di tooltool be tikoro tinimim nga, ngan urata ke Kirisi tani yo iyeii i, in o ke be ilonang kasin pitiap yege. 3 Inbe awete betanga galangana mulu pang di tooltool le imot yo timalum pang di tooltool a tikoro tinidi ngan nen. Kumata le be titoo dada yo nen nga, ngan kin titoo ger tina nga dook le imot. 4 Nen le ang di sema tooltool yo kawete be katoo ger ngan ole kayei tooltool noonoonoo ye Maro matana nga, ngan ang tapmim kayepe manga mooloo ye Kirisi. Nen le Maro yo lono pang di tooltool a iyei dada dook mata pang di i, in kawala murimim panga. 5 Bong idi yo tatara lodo medana pang Kirisi nga, ngan Maro Amunu Silene iyepe yidi inbe ipamedidi a be nen ngan tatara lodo le atu, inbe tanamu yo be iwetidi ye tooltool noonoonoo nga. 6 Nen le idi tooltool yo taye Yesu Kirisi tagaua nga, ngan dada yo ke koranga tiniidi in ben so sokorai, inbe dada yo ke koranga tiniidi tiap i, in so sokorai lapau. Bong dada yo be tatara lodo medana pang Kirisi a be nen ngan lodo dook mata pang di diede i, in la so moolmool i.

7 Muku nga ang ngan ben kadada dook mata ye parsukungu. E nga sei tool ilelang be katoo betanga moolmool tiap i? 8 Ngan dada yo nen nga, ngan ipa ye Maro, tool yo ikiu ang panga i, in tiap. 9 Ngan ole lomim tut ye so yo be iyeie porong a isung i, in so mai tiap san, bong ke be ole iyeie porong tani a isung le imot. 10 Bong au i Tool Mai ipamedau le atara lok le atu yang nen, o ke be katoo dada sa mulu tiap. Inbe sei tool yo be igarung lomim nen i, in ole Maro iyemenaii. 11 Ang di diek nga, di tooltool kapala tiwete nen be awetewete pang di tooltool be tikoro tinidi. Bong awete nen tiap, ngan la le di Yuda tigarungau nga. Ngan kumata awete be di tooltool tikoro tinidi nga, ngan betanga yo ke kai palasingi ke Kirisi i, in o ke be iyei di tooltool le katedi malmal pau mulu tiap. 12 Au i lok mai san nen be di tooltool yo tigarung lomim nen nga, ngan tikodo le timede mata ye dada yo ke koranga tinidi i. Bong be nen nga, ngan di tapdi tikoro tinidi a tigarung di le dook tiap yege.

13 Ngan nanga ang di diek nga, ang ngan Maro ikiu ang be kayei poranga mulu pang dada yo ke ger, nga tiap. Le be nen ngan kin lomim tar be ang tapmim ole katoo lomim ye soo so yo be kayei nga be. Bong katoo dada yo be lomim pang di diemim mai san inbe kayei ben poranga pang di a kalon di ye i. 14 Ngan ger tina le imot ke di Yuda nga, ngan punu igaua le imot a iken ye ger ataleu naii: “Lom pang di diem mai san dawa ben yo ong taum lom pong mai san nga.”✡ Urata ke Paroranga So 19:18 15 Nen le kakawai yang dook leu. Yesoo, kumata le be kayei ben di asara gok a kapassak le ang tapmim kapattoko nga, ngan ole kagarungang a kallemim le imot.

16 Nga ole awete pang nen, kin le kamalum pang Maro Amunu Silene a be nen ngan ipassongang ye panga kiang. Ngan la o ke be katoo dada dook tiap yo lomim kaua urata ye be kayei, ngan tiap nga. 17 Nen le soo dada dook tiap ke noonoo yo idi tooltool lodo be tayei nga, ngan irautoo soo dada dook mata yo Maro Amunu Silene lono be tayei nga. Inbe soo dada dook mata yo Maro Amunu Silene lono be tayei nga, ngan irautoo soo dada dook tiap ke noonoo yo lodo be tayei nga. Ngan yaru le ru nga tiyei ben koi, le soo so yo lomim be kayei nga, ngan o ke be kayei tiap. 18 Bong kumata le be Maro Amunu Silene ipassongang ye panga kiang a be katoo nga, ngan o ke be kayepe ye dada yo ke ger ngan parmana mulu tiap.

19 Le ang ngan lomim galanga ye dada dook tiap ke noonoo yo di tooltool lodi be tiyei ngan oo. Ngan dada tina ngan nen: dada ke bauk, inbe dada yo giri leu ye Maro matana nga, inbe dada ben kidi gaunu yo tiyei nga, 20 inbe dada ke sungunu pang maro yo doko nga, inbe dada ke pidipidi, inbe dada ke be tiye di diedi tiyei koi, inbe dada ke passakungu, inbe dada ke matadi gorengana ye so kidi diedi, inbe dada ke kate malmal, inbe dada ke be lodi pang di tapdi leu, inbe dada ke be tiye di diedi tigauagaua tiap a la tiyepe kidi kidi, 21 inbe dada ke be matadi yoonoonoo, inbe dada ke yinungu ran medana a kutodi moo ye, inbe dada ke be di tooltool tigaua be tiyin ran medana a tiyei dada dook tiap pang di diedi, inbe dada matana matana kapala yo nen nga. Ngan muku ngan awete pang ye oo, inbe la nookoot nga awete pang ye mulu nga. Di tooltool yo tiyei dada nen nga, ngan o ke be tilo tigaua ye di tooltool yo Maro be matan kala di ngan tiap.

22 Bong be Maro Amunu Silene ipassongo di tooltool ye panga kidi nga, ngan ole tiyei dada yo nen nga: lodi pang di diede mai san, inbe lodi ponana ye yepongo kidi, inbe tiyepe ye lo silene, inbe titoko too katedi le katedi malmal tarai pang di tooltool tiap, inbe tilon di tooltool, inbe tiyei dada dook mata leu, inbe titoo betanga kidi dook mata, 23 inbe tiyepe moonoombe dook, inbe tikaptut di dook ye yepongo kidi. Ngan ger tina ngan sa ke be igunkala dada yo nen nga tiap. 24 Le di tooltool yo ke Yesu Kirisi nga, ngan di ngan ben tiraumata dada dook tiap ke noonoo yo iken lodi nga, ngan le ipa ye urata dook tiap ki tina, ngan a tipatoto lo kai palasingi kaini le imata oo. 25 Nen le idi nga Maro Amunu Silene la ikaua yepongo dook mata paidi i. Le be nen ngan ole tatoo Maro Amunu Silene a ipassongidi ye panga kiidi. 26 Inbe kin le idi taudu tayitmak ede be, inbe tasokkara di diede lodi ye patokongo be, inbe matada gorengana ye so kidi diede kapala be lapau.