1 Au Paulu i ayei urata ke aposol. Ngan ye yo ayei urata ke aposol nga ye dada ke di tooltool, too tool sa la ipootau be ayei aposol nga tiap, bong ye Yesu Kirisi inbe Tamada Maro yo ipamaditi Yesu ye ni ke matenge i, in yaru la tikaua urata i pau i. 2 Le au i aye di diek kapala yo titara lodi medana pang Yesu nga, ngan amyawara rau naii pang ang di tooltool yo kagaua ye bareme ke Yesu a kayepe ye tana mai Galesia nga.

3 Nen le apatarau pang Tamada Maro iye Tool Mai kiidi Yesu Kirisi nen, be yaru lodi pang a tiyei dada dook mata pang, inbe tikaua lo silene kidi pang. 4 Inbe Kirisi tani in itoo Tamada Maro lono le ya taunu iraia tinini be igiri noonoo kiidi ye. Ngan ye yo a le iyei nen nga, ngan be nen a ipamulidi ye dada dook tiap yo nookoot di tooltool tiyei nga. 5 Nen le ole tayitmaka Maro ene a ilo ete a ikenen leu le taukan motingi. Moolmool.

6 Ai, au i atakrai yang ye yo le palbe leu, inbe kayege tool tani yo ikiu ang panga i. Ya in ikiu ang ye urata ke Kirisi, tool tani yo lono paidi a iyei urata dook mata paidi i, bong ang ngan kayege bingi dook mata ki, inbe kala be la katoo patomonaingi san mulu. 7 Bong awete pang nen, ni bingi dook mata sa mulu siap. Di tooltool kapala tikapye be tipalele bingi dook mata tani ke Kirisi i. Ngan nen le patomonaingi kidi igarung lomim. 8 Le kumata be am nga amwete pang ye patomonaingi san le gaongo ben bingi dook mata tani yo muku ngan amweta in tiap nga, ngan dook mata be Maro ikatte am du ye ei yo ikan le taukan motingi i. Le gaongo leu, kumata le bangabangana yo tiyepe ye malala ke Maro ngo sa be iwete pang ye patomonaingi san nga, ngan dook mata be Maro ikatte du ye ei tani, in lapau. 9 Ngan betanga i muku ngan amweta pang oo, inbe la nookoot nga aweta pang mulu nga. Nen le kumata tooltool sa be iwetewete pang ye patomonaingi san le dawa ben bingi dook mata yo muku ngan kakauu in tiap nga, ngan dook mata be Maro ikatte du ye ei yo ikan le taukan motingi i.

10 Ngan betanga yo nookoot awete nga, ngan awete be nen a di tooltool lodi dook mata pau ye tiap, bong be nen a Maro lono dook mata pau ye. Inbe au i akapye be ayei di tooltool a lodi ponana yau tiap lapau. Ngan kumata le be ayei di tooltool a be lodi ponana nga, ngan o ke be ayei kapraingi ke Kirisi tiap.

11 Ang di diek nga, ngan lok be lomim galanga nen, bingi dook mata yo muku ngan amweteweta pang i, in so ke tool sa la ipamaditi in tiap. 12 Inbe au i akauu ye tool siap. Inbe di tooltool sa la tipatomonai au ye, ngan tiap lapau. Bong Yesu Kirisi la ipaposi pau a le akauu i.

13 Le ang ngan o kalongo yo muku ngan atoo dada kidi Yuda ye sungunu kidi, nga oo. Ngan ye kene tani in akaua masngana pang di tooltool ke Maro yo tigaua ye bareme ke Yesu ngan a akapye be agarung di le imot. 14 Inbe amuku pang di tooltool kapala ke di Yuda yo di dadawak nga, le allos di. Inbe akodo le amede be atoo dada yo kidi sasa kiau nga le imot. 15 Bong ye kene yo tinak ipasui au ye tiao nga, ngan Maro lono pau a iyei dada dook mata pau le ipootau be ole ayei urata ki. Ngan le ye lal tani yo lon wete ye i, 16 motong la ipaposo Natunu pau nga, a be nen ngan awetewete pang di tooltool yo tipa ye rara kidi Yuda tiap nga ye bingi dook mata tani. Le ye kene yo ipaposo Natunu pau ye in nga, ngan le ala ye tool sa be la atoru a ipagalangau ye ngan tiap. 17 Inbe alo pang Yerusalem be lo akamata di tooltool yo tikaua urata ke aposol muku yau, ngan tiap. Bong pattu leu inbe ala pang tana mai ke Arabia, motong la amulu a ala pang malala mai Damaskas nga.

18 Le nga ayepe la Damaskas ngo le rai tol iman a ila, motong la alo pang Yerusalem be lo akamata Pita a amru awetewete nga. Ngan le amru amyepe ye ke sangaul be limi. 19 Le ye kene tani in mala be akamata touo aposol sa mulu siap, bong akamata Yemis yo Tool Mai taini i, in leu. 20 Le awete pang moolmool ye Maro matana nen; betanga yo awodo pang nga, ngan allungang ye tiap. 21 Ngan ayepe Yerusalem a imot, motong la ala apa ye malala yo iken ye tana ke Siria le Silisia nga. 22 Le ye kene tani in di tooltool yo tigaua ye bareme ke Yesu a tiyepe Yudia nga, ngan tikamata touo matak pitiap le nga lodi galanga yau tiap lapau. 23 Bong di tooltool tina ngan di tooltool kapala tiwete pang di yau leu. Tiyei ne, “Ai, tool tani yo muku ngan ikaua masngana pang di tooltool yo titara lodi medana pang Kirisi i, in la nookoot nga iwetewete bingi dook mata pang di tooltool be titara lodi medana ye i.” 24 Nen le di tooltool tina, ngan tilongo betanga ye so yo Maro iyei yau nga, le tina tiyitmaka Maro ene.