1 Di tooltool ke Kirisi yo tiyei urata ben di poranga nga, ngan kin tikamata di kuto maimai kidi nga ben di ngan tooltool dook mata ke be tiraua pang di a titoo betanga kidi le imot. Le kumata be tiyei nen nga, ngan o ke be di tooltool tiwete mur ye Maro, too ye patomonaingi kiidi, ngan tiap. 2 Nen le kumata be di kuto maimai kidi ngan di tooltool ke Kirisi lapau nga, ngan ke be lodi kau urata nen be nga di diedi a be nen ngan tiraua pang di a titoo betanga kidi tiap, ngan tiap. Bong be nen ngan di tooltool tina yo tiyei urata ben poranga nga, ngan tiyei urata dook mata yo be tilon di ye nga, yesoo di ngan tooltool ke Kirisi yo ke be lodi pang di mai san nga. Le betanga yo be kupatomonai di tooltool tina ye a kupamede di be titoo, ngan nen.

3 Kumata le be tool sa lono pang betanga tarantatu ke Tool Mai kiidi Yesu Kirisi a ipatomonai di ye dada dook mata le imot yo Maro lono be titoo, ngan tiap, inbe la ipatomonai di tooltool ye betanga yo moolmool tiap nga, 4 ngan tool in iyitmaka ya taunu ene ye leu, bong mala be lon galanga kasin pa ye so yo iwetewete ye, ngan pitiap yege. Le tool yo iyei nen i, in so ben matamatenge dook tiap la iken kutono lono i. Nen le iso pang bete sokoraingi pang di diene a iye di koodi parkap, inbe iye di diene tiparsu ye betanga. Ngan nen le iyei di tooltool a matadi gorengana ye so kidi tooltool kapala a lodi dook tiap pang di, inbe tiwete betanga yo ke kate malmal nga, inbe tipasa mur ye di diedi a tigarung di ye betanga, inbe lodi tar di diedi be tiyei dada dook tiap, 5 inbe kanakana ngan ole tiwetewete betanga yo ke kate malmal ngan pang di diedi kapala lapau. Ngan tiyei nen, yesoo di tooltool tina ngan kutodi le lodi dook tiap le lodi galanga ye so yo dook mata too dook tiap, ngan tiap. Bong di ngan lodi galanga ye betanga moolmool pitiap yege. Inbe lodi tar nen, kumata be tipatomonai di tooltool ye dada ke Maro nga, ngan ole tikap so alunu yo be ballingadi ye nga.

6 Bong kumata be tool atu itoo dada dook mata le imot yo Maro lono be tatoo nga, inbe ikamata so ki ya taunu yo ikap a iken ye, ngan le lon wete be so tina ngan iye le imot panga nga, ngan ole tool tani in ballingana ye so ke Maro. 7 Ngan awete nen, yesoo ye kene yo tinada tipasui idi a tasi tana ye in nga, ngan takaua so sa a tapa ye a tasi, ngan tiap. Ngan nanga, kumata le be tammata nga, ngan o ke be takaua so sa ke tana i a tapa ye a talo ngan tiap lapau. 8 Bong kumata be takap so ke kaningi inbe so ke lonloningi nga le takamata ngan iye idi koot nga, ngan ole lod ponana ye kaiye. 9 Ngan nen le di tooltool yo lodi be tikap pat le so matana matana a tigaua le alunu a be ballingadi ye nga, ngan ole touanga alunu la be pombe pang ye di nga, le ole ikap di a tilo dowo lono ke tool dook tiap dawa ben di asara yo lo titingi ye dowo nga. Ngan ye yo matadi pat le so matana matana ke tana a be ballingadi ye nga, le tiyei kapa a di tapdi tigarung di le tilledi dawa ben ookoo imere a idaudar du tiek lono nga. 10 Ngan ye yo awete pong nen nga, yesoo dada yo ke be di tooltool lodi mai san pang pat ke yimoongoo so ye i, in dada dook tiap yo matana matana nga, ngan punu igaua le imot a iken ye. Nen le di tooltool kapala yo matadi pat mata nga, ngan tiwala muridi pang lodi medana yo titaru pang Maro i, inbe di tapdi tigarung di a tisolo masngana mai dawa ben tool ikurumu ye pul a isolo masngana mai san i.

11 Bong Timoti, ong in tool ke Maro, le kuwala murim a kuyepe manga mooloo ye dada dook tiap yo nen nga. Inbe kutoo dada dook mata yo noonoonoo ke Maro nga, inbe kutoo dada dook mata le imot yo lono be tatoo nga, inbe kutara lom le imede panga, inbe lom pang di diem kapala mai san, inbe kukodo le tutube a kusolo urata moonoo yo be pombe pang yong nga, inbe kuyepe le lom pusbe dook mata. 12 Nen le kutara lom le imede pang Kirisi a be nen ngan kupatoko ye patokongo yo dook mata i. Le kuparama lom medana yo kutaru i, ngan ole kuyepe ye yepongo dook mata yo iken le taukan motingi i. Yesoo bong, kulkulunu ngan Maro ikiu ong be kouo yepongo dook mata tani, in ye kene yo lo kukodo dama ke di tooltool, inbe kuwete lom a kupaposo lom medana yo kutaru pang Maro in nga.

13 Timoti, ye Maro yo itar so nga le imot a tiyepe mauredi, in matana, inbe ye Yesu Kirisi yo lo ikodo dama ke Pontius Pailot a iwete betanga moolmool a ya taunu ipaposi panga, in matana nga, ngan awete betanga medana pong nen, 14 betanga ke Maro yo kop koot nga, ngan kin kuparama le imede a kutoo dook le imot, ngan o ke be tool sa iwete pong ye tiap. Nen le kukodo le kumede ye betanga tani le lo ye lal yo be Tool Mai kiidi Yesu Kirisi imulu a isi pombe mallangana ye i. 15 Ngan ye kene tani in ole Maro iwanga Yesu a isi ye lal tani yo itaru panga i. Le Maro yo iyei urata dook mata pang di tooltool le tiyitmak ene i, in ya taleu la iyei kuto mai i. Ya in kuto mai ke di kuto maimai kapala yo matadi kala tana maimai nga. Inbe ya in iyei Tool Mai pang di tooltool maimai kapala, ngan lapau. 16 Inbe Maro ya taleu, in taukan matenge, inbe ya in iyepe ye sul loloana somai le ke be di tooltool tila potai ye tiap. Nen le tool sa ikamata toua pitiao, inbe tool sa ke be ikamata tiap lapau. Le be nen ngan tayitmaka ene inbe tayei ne, “Maro, gurana kiong mai san ke be di tooltool tipayitong ye le ikenen leu.” Moolmool.

17 Au lok be kuwete pang di tooltool ke Kirisi yo ballingadi ye so ke tana i nga, ngan kin tiyitmak di be. Inbe kin titara lodi le atu ye so kidi ke tana i nga be ole ilon di ye yepongo kidi, ngan be. Yesoo, so tina yo ngan ole iken le mos tiap, inbe ilene palbe leu. Bong be nen ngan titara lodi le atu pang Maro yo ilonidi mai san a ikap so le imot paidi a be lod ponana ye i. 18 Inbe kuwete pang di tooltool tina yo ballingadi ngan be tiyei dada yo dook mata ngan le alunu pang di tooltool. Le kuwete pang di a tiyei ben tool ke maroro a tipoto so kidi tina, lo ngan be tikap kapala pang di diedi. 19 Kumata le be tiyei nen nga, ngan ben tigaua balingi pang di tapdi a be ilon di ye yepongo kidi yo pang dama ni i. Le ole tikaua yepongo dook mata moolmool yo iken le taukan motingi i.

20 Timoti, kin matam kala urata tani yo Maro ikauu pong i, in dook. Inbe ole kuwala murim pang betanga sokorai yo itoo dada dook mata yo Maro lono be tatoo tiap nga. Inbe kuwala murim pang di tooltool yo tikapye be tirautoo patomonaingi kiidi ye betanga yo tiwete ngan tillung be itoo dada dook mata ke lo galanga nga, ngan lapau. 21 Ngan yo a le awete nen nga, yesoo di tooltool kapala titara lodi ye betanga kidi. Ngan tiyei dada nen le tiwala muridi pang lodi medana yo titaru pang Maro i.

Maro lono pang a iyei dada dook mata pang ang le imot.