العهد الجديد باللهجة الجزائرية مَتَّى 1

إِنْجِيلُ مَتَّى

إنجيل مَتّى نَكتَب للمَسيحِيّين اللي آصَلهُم يْهودي واللي يَعَّرفو مْليح كْتوب العَهَد القْديم. مَتّى يَجبَد بَزّاف هاد الكْتوب ويْوَرّي باللي يَسوع هُوَ اللي يْحَقَّق الشي اللي تْقال فيهُم. كي كْتَب مَتّى هاد الإنجيل، كانو المَسيحِيّين اللي آصَلهُم يْهود تْحاوزو من دْيار الصْلاة مْتاع اليْهود ووَلاّو يَتلايمو بيناتهُم ويَستَقبلو حَتّى اللي ماشي يْهود.

مَتّى شايَف يَسوع هُوَ السِيَّد اللي يَقدَر يْقول ويامَر بالشي اللي يامَر بيه الله. هاد السِيَّد هُوَ المَسيح اللي كانو اليْهود يَستَنّاو فيه وجا يْوَرّي كيفاش لازَم يَنفَهمو فْرايَض العَهَد القْديم.

لَم مَتّى كْلام يَسوع في خَمس خُطبات: 1. خُطبة مَعروفة بخُطبة الجْبَل (5‏-7): دار فيها يَسوع قانون يْعيشو عليه التابعين مْتاعو. هاد القانون يْخُص العَلاقة بين بْنادَم وبْنادَم والعَلاقة بين بْنادَم والله. 2. خُطبة فالفَصل 10: يامَر ويَنصَح اللي يْروحو يْبَشّرو بالإنجيل. 3. خُطبة فالفَصل 13: يَحكي حْكايات باش يْبَيَّن كيفاش تْكون الحالة كي يْكون الله سَلطان. 4. خُطبة فالفَصل 18: يْبَيَّن كيفاش لازَم تْكون العَلاقة بين الخاوة المَسيحِيّين. 5. خُطبة فالفُصول 24 و25: تْقول كيفاش لازَم للتابعين يَستَنّاو نُصرة الله الأَخرانِيّة. قْبَل وبَعد هاد الخُطبات، كايَن حْكايات يْوَرّيو كيفاش كان يَسوع يَشفي المَرضى، يْوَكَّل الغاشي، يْحكي حْكايات يْفَطّنو الناس ويْناقَش شْيوخ اليْهود.

فالبَدية مْتاع الإنجيل، يَحكي مَتّى كيفاش زاد وكيفاش كْبَر يَسوع. في آخَر الإنجيل، سَلطان اليْهود يَتَّحكَم عليه بالموت ويَتسَمَّر في صْليب، بَصَّح الله يَحييه من الموت ويَضهَر للتابعين مْتاعو ويَطلَب منهُم يْبَشّرو بالإِنجيل لكامَل شْعوب الأَرض.

قْبَل ما يْزيد، تْسَمّا يَسوع عَمّانويل، يَعني "الله معانا". إنجيل مَتّى يَخلاص بهاد الوَعد من يَسوع: "وأَنا راني معاكُم كُل يوم حَتّى لآخَر الزْمان". يَسوع هُو حْضور الله في وَسط بْني آدَم.

سْلالة يَسوع المَسيح

1 كْتاب آصَل يَسوع المَسيح بَن داوَد بَن إبراهيم. 2 إبراهيم جاب إسحاق وإِسحاق جاب يَعقوب ويَعقوب جاب يَهودا وخاوتو، 3 يَهودا جاب فارَص وزارَح من تامار وفارَص جاب حَصرون وحَصرون جاب أَرام، 4 أَرام جاب عَمّيناداب وعَمّيناداب جاب نَحشون ونَحشون جاب سَلمون، 5 سَلمون جاب بوعَز من راحاب وبوعَز جاب عوبيد من راعوت وعوبيد جاب يَسّى، 6 يَسّى جاب السَلطان داوَد والسَلطان داوَد جاب سُلَيمان من مَرت أورِيّا، 7 سُلَيمان جاب رَحَبعام ورَحَبعام جاب أَبِيّا وأَبِيّا جاب آسا، 8 آسا جاب يَهوشافاط ويَهوشافاط جاب يورام ويورام جاب عُزيّا، 9 عُزيّا جاب يوتام ويوتام جاب أَحاز وأَحاز جاب حِزقيّا، 10 حِزقيّا جاب مَنَسّى ومَنَسّى جاب آمون وآمون جاب يوشَيّا، 11 يوشَيّا جاب يَكُنيا وخاوتو في وَقت النَفية لبابَل*. 12 بَعد النَفية لبابَل، جاب يَكُنيا شَأَلتِئيل وشَأَلتِئيل جاب زَرُبّابَل، 13 زَرُبّابَل جاب أَبيهود وأَبيهود جاب أَلياقيم وأَلياقيم جاب عازور، 14 عازور جاب صادوق وصادوق جاب أَخيم وأَخيم جاب أَليود، 15 أَليود جاب أَليعازَر وأَليعازَر جاب مَتّان ومَتّان جاب يَعقوب، 16 يَعقوب جاب يوسَف راجل مَريَم اللي وَلدَت يَسوع اللي يَتسَمّا المَسيح. 17 كايَن رْبَعطاشَن جيل من إِبراهيم لداوَد ورْبَعطاشَن جيل من داوَد للنَفية لبابَل، ورْبَعطاشَن جيل من النَفية لبابَل للمَسيح.

زْيادة يَسوع المَسيح

18 زْيادة يَسوع المَسيح هَكدا كانَت: مَريَم يَمّاه كانَت مخَطوبة ليوسَف. قْبَل ما يْعيشو كيف كيف، لْقات روحها بالجوف بالروح القُدّوس، 19 وكان راجَلها يوسَف راجَل صالَح وما حَبش يَفضَحها، هِمّالا حَب يْبَطَّل معاها فالسَر. 20 وكي كان يْخَمَّم في هاد الشي، هاو وين مْلاك من الرَب ضْهَرلو فالمْنام وقاللو: "يا يوسَف بَن داوَد، ما تْخافْش تاخُد مَريَم مَرتَك خاطَر اللي راهي رافدة بيه الجوف من الروح القُدّوس، 21 رايحة تْزَيَّد وْلَد وأَنتَ تْسَمّيه يَسوع، خاطَر هُوَ اللي يْسَلَّك شَعبو من دْنوبهُم". 22 هاد الشي كامَل صْرا باش يْتَم كْلام الرَب اللي قالو النَبي: 23 "هايلِك العاتَق تَرفَد الجوف وتْزَيَّد وْلَد ويْسَمّيوَه "عَمّانوئيل""، اللي مَعنَاه "الله مْعانا"".

24 كي فْطَن يوسَف من الرْقاد، دار كيما قاللو مْلاك الرَب وأَدّا معاه مَرتو، 25 بَصَّح ما دْخَلش عليها حَتّى زَيّدَت وْلَد وسَمّاه يَسوع.

*1:11 النَفية لبابَل في عام 721 ق.م. ستعمرو الآشوريين السامرة عاصمة المملكة الشمالية (إسرائيل) ونفاو سكانها لبابل وسكنو ناس براوية فيها وفي عام 586 ق.م. ستعمر نبوخد نصر سلطان الكلدانيين أورشليم عاصمة المملكة الجنوبية (يهودا) وهد معبد سليمان ونفا سكانها لبابل.