90
God da Wawaya kiiravidiye
God yana bagibagi tomoyina Mosis, touna mmko parina igirumi.
1 Yawe God, kimta bi kimta nunudigha na
tam na ware yama bare.
2 Tam rorowainagha na God waghata
bi muriye da koya kuyaberadi
da muriye na kubura kuyabera.
3 Wawaya kwawonedi bo, “Koveramagha konidobodobo magha!”
Na kwawamiridi da saveramagha sidobodobo, mema sipiikana.
4 Mata kamomve, na bodu 1,000 na ware gabudara tanagha naboni,
toudi ware raghani tupona nubabasu kamone.
5 Wawaya yadi yawa kwabori yaininagha
ware raghanina mimeu yakovina naboni.
Touda ware rei didibare yagogo yageena naboni.
6 Didibare na reina matayina da yagogo yapora
bi ravidiye na yivivi da yarabobo.
7 Noko naboni da yam nuwapughu ghamana yiberomii.
Raghanina nuwanuwam yapughu toumii biiyadi,
na parapa kanagharena kirakiiyem.
8 Bi yama bera berodi tupadi kwakitakita
bi kiimatipo da yama berona kayikowoyidi,
bi gegha da tupadi kwakitadi.
9 Raghanina yawayawiimii kamakamake na nuwanuwam yapughu toumii biiyadi,
da yama yawa kwabori yaiyainedi,
mayimayiyina raghanina wawaya yiyawiigurina naboni.
10 Toumii kamake da bodu 70 naboni
bi meboda wawaya viya maragasidi na
samake da bodu 80 naboni,
bi gegha da nuwapoya peyaridi kabanana,
na raghani yanagho yaininagha da karabobo.
11 Getana iiyabo parapa iyakakovi da yam nuwapughu maragasina metagha;
meboda yam nuwapughu kayakowa yapori,
na parapa kayakumararayem.
12 Kiyevevemii da yama yawa makena gabudarina yana guri kanakovi,
da toumii noghota miisena tam gwabimma kanakabi.
13 Yawe God kuveramagha da kuninuwanuwaghanemii!
Genuwanuwam inapughumake toumii biiyadina!
14 Yam nuwamonikama didibara patepatena kibonuvimii,
da yama make yawana kamone nuwamiimiiseye kanatawora.
15 Bodu peyaridi nuwapoya kuveremii kiiravine,
na kata raghani gurina nuwamiise kuveremii!
Yama kabikwarakwara kabitavetaveyana,
bi bodu miisedi kuveremii!
16 Toumii yam wiitamariyana, yam bagibagi yana maragata kiyevevemii.
Yam badobado da maragata metagha na natunatumii kiyevevedi!
17 Yawe tamna yama God, kinuwanuwaghanemii
bi awaki bagibagidi kaberabera na
kubera da sinuwagha wiimasi,
bi awaki bagibagidi kaberabera na
kubera da sinuwagha wiimasi.