Angig Ginof Pol Tesalonaika Sios Elim Ginofe Ningihiani
Ohuna buk enaig esog
Tesalonaika eba Masedonia na nalig kimbig. Mahim Pol Filipai kimbigim wahianam so Tesalonaika gam ikanaba afa ena nai yi siosna gafugagim fukwasana enag kimbigim (Aposel 17). Afa Ju el enam nangunim mahim el numb Polna mo higinim pahlukunamba afa Kristen el opukonaba eso Polim onigig amtakwalig finibi. Eso Pol Tesalonaikam wahianam afa Korin gam ikanam gafnaba. Eso heafna mungo gafugag wa nai Timoti, bonam ehem sihina og, mang mang so Tesalonaika nai Kristen elim pugug. Afa mahim Pol Timotina lahlag mo higinam eso Pol Timoti afa Sailas ohuna bukba ginofini Tesalonaikanai Kristenim kifutig goni. Afa ohuna buk wa Pol sifakaleg ehengelni olug onigig mi afa lahlag nihem mi so Tesalonaika Kristen el eso esini. Afa enaig eseg Kristen el mas numwehe anwanafig mo Krais ahanaig bo safef. Afa ehengel membeg og ka numwehe anwanafi. El so wahag afa Krais mas piske bog mo, so ehengel gaba higeg nofkikena gagba fi? Afa Krais so mangigna so bo fe? Pol ehengelni sahigim enaig sihifeni og, so na lahlag nihem pahlukui afa numwehe nisagohi Ainiyag eba piske bof.
1
1 Afa ka Pol ohuna ginof nem Tesalonaikanai sios elim ginofenig. Afa Timoti i Sailas i gaba ka mungwal auguiaba eso ka ohuna moba nem ginofenig. Afa God bigelni Humuan nai yi afa Ainiyag Sisas Krais nai yi el ne feg.
Eso ma olug efihlag fenam afa God ismunagim nem kwaganif.
Pol siosna olug onigigim sifakaleni
2 Afa kagel nengel nai yi Godum lahlag onig. Afa mahim ka Godum osihinibi kagel nengelni unehlagim suwigigim eso kagel Godum sahnig. 3 Afa God bigelni Humuan ati anwanafeg kagel mas etetig mo nengelni nihem so na esig. Afa neana gafugag so na eseg enag neana olug onigigim wagfug, afa ne elim membenigim eso ne hugna gafugafeg kwaganigim, afa ne olug onigig Ainiyag Sisas Krais nai yi so na luwafiba eba mas ne wahiai. 4 Afa kana nilite ka anwanafeg God nem membenig afa nem hugwefu hwati heafna. 5 Afa Godna lahlag mo ka nem obugonug enag mang mo bihig mo eba kigmogna afa Godna Sungwagni afa nengel numwehe anwanafig eso ka sihig eba inim nemug. Afa nengel kagelni auguiagim ati anwanafig mahim big enanai yi auguiafenaba afa mang ka esig eba nengelim kwaganig. 6 Afa nengel kagelim afa Ainiyagim ne nangugum so na gwenaig esig. Eba inim, el nem kinig faig afa mahim ne Godna mo higigba eso Godna Sungwag so nem sifakalig faig eso ne enag mom fig. 7 Afa ma nimbe enaig mina wagfuibi eso Godna el Masedonia nai afa Akaia nai enaig esogog, “Kagel gaba ka so gwenaig esi.” 8 Afa Ainiyagna mo nengelni mengig wa nai pugunam eso fufni moag nihif. Afa nengelni Godum olug onigigna mo eso mas Masedonia mi afa Akaia mi kimbig wa mungo fe amo eba mungwali kimbig ati enam higig afa bigel ahanaig ese ehengelim sihigoni mo. 9 Afa ehengel hefum enaig sihifig mahim ka nengelni kimbig gam ambugonaba ne kam lahlafeni afa ahanaig ne esegim eso ne nimbasam pahluhug afa ne enam masig fatigim afa onigig wahigifenam eso ne Godna gafugag el feg afa eheba inim God afa ehe nofkenaga. 10 Afa ne nengena gofiba eso heafna Leg heven wa nai bof. Afa enag Leg Sisas wahanaba eso God ehem ilafona. Afa autunai wa God elim hugna olug kakagenif afa Sisas bigim kwaganig eso bigim mas amtakwale aiti.
THIS IS TEST VERSION 2011-07-25.
Please report any problems with this translation. Thank you!
Dispela buk i stap redi long sekim tasol. Sapos yu lukim sampela asua, plis toksave long mipela. Tenk yu!