3
Izesuni agulizalímo Moseni avilegeneive
1 Nenemú Ómasímini apazá vegená nigivénegita, okulumakú netá izá miliki alitave loko sele lo likimimó neneta, lekeza monó gele alévolé oaká nounitímini lole ale ve itó guguni gizo ameaká noi ve napa Izesuni ánigi hee liki ánigalo. 2 * Nam 12:7 Ómasímo ámina hoza alitive loko lo molotató áisi nene Mosé nene Ómasímini vegenala zuha gelekelé oketamó nenéminoko Ómasímo litokó minatíminoko Ómasímini hoza alévolé oko minoloko voko ale minamó. 3 Numuni geaká noi vémini agulizalímo genei numunímini agulizá avilegeaká noive. Ámináminoko Izesuni agulizalímo Moseni avilegeko lapanalagi neve. 4 Itó numuni ale utó moloaká nene vegenalita geaká netá nemóza, netá mukí ale utó moloaká ve nene Ómasi noive. 5 Itó Mosé eza Ómasímini numunigitana lilí iki mina vegenatoka minake Ómasímo litokó gelekelé hoza alévolé oko aleko minake, Ómasímo alika Izesukumú lo utó iti gakokumú gakola lo moloaká imó. 6 Lá oko minamóza, Kilistó eza nene gipalámo Ómasímini numunigitana mina vegenatoka gizapa noketake Ómasímo litokó hoza alévolé oko aleaká noive. Numuni nene lélisi nene noune. Itó nene hanuvamukopa, ale vavá oleta netakumú ageva oaká nouni netakumú gele gele mininake mulutegú lamaná nogilinake minoloko vitunimó nene Ómasímini numuni loló oko noune loko litunize.
Ómasímini mino gelekelé oakalagú vo holatuni gakó
7 * Age 95:7-11 Isilae vegenalite Ómasímini gakó gili ahuliake mino gelekelé oakalagú vi hilamakumú nene Sikalahulímo li gakóma monó gotolaú láa liki gizinamó nene gele minatunize:
Itína nene lekeza Ómasímini anó lupa gilinitamó nene,
8 mikasi gomopalaló Isilae vegenalite gínikaha iake
mesaha ake Ómasi gimivagú milamó nenéminiki likigika hize lí iko minamilo.
9 Avotike keza neneló melekeni 40 oko novigo
golivagi netá mukí loló oaká umó
nene ánigiaká amó nemóza, hokolizá i nimiake
giminegú miliaká amóma neve.
10 Neza nenemú mesaha okuke keza gamena gamena gopa napa kagatatunú giliaká niamó niaze,
itó není gapo ánigi vevesiki ánigisá amamóma neve loko lonoumóma neve.
11 Neza mesaha oketuke keza mino gelekelé oakánegú vi hilaminigave loko alévolé oko lo hukoko lumóma neve.
12 Nigivénegita, lekelitokatí makó likigika anupaki miniiki monó gili ahuliiki alévolé ve Ómasi lekemegesa amikatave liki gizapa iki minalo. 13-14 Leza ganá apí oko gele seketigí uni gakó nene ale gikitoko alinake anosaló anititunimó nene Kilistoni nasahilí izá moloko ale minuni vegená loló itunimó nenazo, gamena gamena itó gamenavatini ha neikoma golesa netalímini gimilegú moloká aleká oaká nenémo lekelitokatí ve makó apikulú alekoko Ómasimú agika hize lí okative liki, eza agata aliko eza agata aliko iki luhusatini ali alévolé iki minalo.
15 * Age 95:7-8 Nenemú monó gotolaú gakó makó lá oko nemó nene gele alitunize:
Lekeza itína Ómasímini anó lupa gilinitamó nene
Isilae vegená gínikaha iake mesaha amó
nenéminiki likigika hize lí iko lá amilo.
16 * Nam 14:1-35 Nene hí vegenalite Ómasímini anó lupa gili ahuliake pelesa ziaká amó neve. Mosé ale goí oketago Izipi mikasiukatí a vegenalite lá amóma neve. 17 Itó hí vegenakumú Ómasímo izapaló molokago melekeni 40 oko vimó neve. Nene golesa netá aliake mikasi gomopalaló hili gesá a vegenakumú nene nenémini imóma neve. 18 Itó hí vegenakumú mino gelekelé oakánegú vi hilaminigave loko alévolé oko lo hukoko loko limó neve. Nene gakola gili ahuliake pelesa ziaká a vegená Isilae vegenakumú nene limó neve. 19 Nenemú lá oko gelenoune. Keza Ómasimú gili alévolé amatímo mino gelekelé oaká apalaloka vi hilamamó neve.