1 Gakó imane goí oko iteko alévolé itive loko neza gagata aleko noluve. Lekeza vegená mukikumú voká voká liki Ómasiloka liki eza hize lé oketative liki keikumú Ómasi agepoka liki minatave loko nologetuve. 2 Itó lekeza legesó iki hulu iki monokú lamaná iki minikiko, vegená nenete nemú manamú giliko lamaná itive liki kugulizaki ve napamú itó mukí gizapa vegenakumú Ómasímo hize lé oketative liki numuna hoza alilo. 3 Nenémo lamaná inogo ive. Itó lugutó vizeaká Ómasi eza nenemú giligo etoaká noive. 4 Eza nene vegená mukitoka kugutó vizitove loko itó gakó gihila ali lá itave loko geleaká noive. 5 Ómasi hamokó noive, itó Ómasi leza vegenaki agata helega helega nouko ve hamokó Izesu Kilistó holutegú ve loló i ve nene 6 vegená mukitoka lihimate meina hizeko gologí oletatove loko minoko aleko imoláa nene ahulamó. Ómasímo nenémini itove loko ezáa mola gamena nene alitokago vegená mukitoka kugutó vizitove loko nogilimó nenémini avevezahaváa utó okago gelekune. 7  * 2 Tim 1:11 Ámina gakó lo utó oaká ve itó aposolo loló itane loko Ómasímo nelémo etó okago nouve. Zuta ve minamamolaloka gakó gihila gele alévolé oaká gakó mogona lainim-oketatane loko nelémo etó okave. Nene soza lamuve. Lamaná noluve.

8 Nenemú numutó namató monó gilina vegená keza kizapaló moloko itó lova leta lava leta nomitimó kigika gizopa lo miniko kigizani ali otiki numuna litave loko noluve. 9  * 1 Pit 3:3 Itó vená keza gineganéini ali lamaná iki luhiiki ali hita hita iki mihina itave loko noluve. Itó ve kumu hilitune liki gotóini zopova haitopaitó gonanalisi amitave. Gonanalisi netá golivagi itó luhoaká gó luhuvagi nene luhamitamó neve. 10 Monó gilina vená nenete etati lelegitó minatamómámini iki lamaná iki iki miliki itatímo gineganéini loló ino. 11 Vená keza legesó iki limiki miniki kagata gili vevesi miniki gakó gilitaze. 12 Vená neneta monó tisa lilí itamope itó ve kivilegeko gizapa oketatune litamope nenemú gele kemesá amuve. Monó litakú nene keza gakó lamiki legesó iki minataze. 13  * Apí 2:7 Lá itakumú nene Atani nene goí oko alémo utó okago Evani nene alika alémo utó imó. 14  * Apí 3:1-6 Itó Atani nene Satá gimivagú molamimó neve. Evani nene gimivagú molokago, gele ameake pelevesava ale utó ikumú noluve. 15 Lá okamóza, vená keza monó gili alévolé itamó itó vegená makó kigika kimitamó itó kigika gizopagi minatamó nenémini agikagú miní amiki némini manámini osá nene netá golesa okatune liki kugupe gizapa iki minatamó nene, izegipa nigetiko Ómasímo kugutó vizinogo ive.