1 Krais Jisasr yawihneruharn king tohhato ndar bbinysof thofm yakitohrahrm. Ndnettn Bro Nkifrari noheh yimami yima nfri nyinget yimaroh kotkfot yakitohruha yima Krais Jisasr, nd hus yimafhu nyingam-pno na kfo mifwann. 2 Bro Nkifrarhu mrokfot wakfo ptha hanyswant. Dborioh yihar o yiha bebr, mrokfot kfo pthakfot. Yimam tamoh nefm newum kfo nyinga fnahnihato tfit hifa yima yuhurpno tfit kfo yirmoh mro-kfom hekfot. 3 Kto, nd Kristenroh toh yuharoh kfo yirmoh mrokfom nhai wom tfit wanyruhatmm. Myafhonirahmm. Rroh yimbhindangm tfit tohetohrahm mrokfo fura bofuraroh wany yakitoh-neftn. Nd mrokforoh wanyneftpno, ndhtet mrokfom haruhet tisam yak bugarahmt. Yak bugahato rom pthayuk mrokfomn rroh yimbhindangm tohetohrahmm mrokfo wanyneft. 4 Nd Bro Nkifrarhu tu yafothet mrokfot myafhonirahmt. Myafhonihato tfit nd rom wanyuk nkifra tndh mrokfo yuhamn hikrahm. 5 To ni Timotin, tu dborioh duka yima yuhurpno tohhato ninhu toh nmbuham yak hta bohta marnyahato tohkfot. Tamoh tamoh krhopam niewum ni tohhato titakfot. Hingrneft yafho thu duha. Hingrna yakitoh hanykfot. Ni tu Bro Nkifrarhu hingrna yima mifn tohhato nd Bro Nkifrarhu gutniuskfot kfo pthakfot.

6 Nane nhai wom tohrhota. Na bi noh yibonwa. Nanhu kkut yohniraht Bro Nkifrar wain bupam ofakfot yahuka kanjo. Asot bi nanhu tfkhathu htanyhato yinyeft. 7 Nd na tonemo resiskfot bi tone hnamoyantn bi makkfot myakmoyantn bi nanhu rim rhu wita yihayer. Bro Nkifrarhu duka yima yuhurpar toh hnamoya. Nhai marimoya finji naruha. 8 Nanhu yima rifhur nhai wom wusswenetr htikahrr Bro Nkifrar. Be hti wuthewurr. Be praiskfothu yaknefrpayet bi. Yimam resishato praiskfot yekwa kanjo nmoh Nungothet Jisasr nd praiskfot hirahra. Turn kot yakitohruha yiha nd praiskfot hirahra. To nhaf nhai be nanrpaya nd praiskfot yakrhota. Nhai. Jisasrhu nia yihar rhu garihato rhu duka darwon hasiwa yimampno rpat nd praiskfot yak hanyrahnom.

9 Wom fitoh yihotamn afo bmbri nanpno wanietwa. 10 Demasr bi frtrohmora. Ndar bbinysofthu dukefr yakmotrr taun Tesalonaikako bi yimor. Kresensr, ror bi Galesia profinsko bi yimor. Taitusr, ror nhaf Dalmesia distrikko bi yimor. 11 Lukrpar asha nanpno tohwor. Ndnettn ni nianeft, Makr wayaknetwa. Nanhu hingrnefm rorn kakitohnho hakutra. 12 Tikikusr ror bi kfo tkrurafmotanr Efesusko yimor.

13 Yo ni niewane, taun Troasn nanhu yuke sakethat Karpusrhu kunysn htanymoyant. Htikahnt wayaknahitwona. Yo bukm rpat wayaknetwanm. Nd sifsif thaye hingrnet bukm mirahn ammo mifa yaknaneft. Nd bukmn bro dukeft arhutwat.

14 Brase hingrnewa wuskam hingrnewa yima Aleksander, wom fasoh neft namotra nanhu yima yuhur nhai marnyakahra. Nhai mrokfom. Ror namo neft kto Nungothet Jisasr htirahrr. 15 Timoti, ni mirahn nd yimar ka wonfoher. Nom pthiwa mrokfom to fitoh fitoh yimamn kfo wok bawokwamm? To nd yima yimam.

16 Na tohwonmo barkof kotkfot nhai wom fitoh yimar nanhu kotkfot tohnhormora. Fakrme troh bugamoma. Bro Nkifrar kanga mirahr nd yimam finji anayanm. 17 Jisas Kraisrn toh tkafmora na nd kotkfot tohmohat. Rorn bbuka rifhur hnamourr. Nd bbuka rifhur hiyaf hanymoatra na tohhato Bro Nkifrarhu mrokfot kfo pthamoyant. Kfo pthamotant nd Romr tohyuk yima tangim wanymomt. Ka Jisas Kraisr atoh tkaf duha yira, ka bi laionroh yatimn yihom kfe bdgrmoya. 18 Jisasr Kraisr na inji toh tkafmo kanjo na tamoh krhopam yakneft, na toh raforahra. Na be rorhu tirmn rhu hanyhato be tfit ror tohukatohwa kmi hefenr rihawitarahra. Ndnetnomn nom be rorhu yufarpat yiha yiha kfo yuta yindhor nohnikfot. To be inji.

19 Nanhu kfo yindhorkfot Prisila Akwila sawohfi yo Onesiforusrhu yon tuhanm, rompno wakfohitwona. 20 Erastusr yuhre taun Korinko afo tohwor. Trofimusre dbohnetrn taun Miletus htanymoyanr. 21 Bmbri wom fitoh yuhamn bi wanietwa bi ndar yihamn. Awi knga hatohrahn to finji nieruhanm bro gonng wormrpno sinyayuk wifor bum? Yubulusr, Pundensr, Linusr, Klodiat, yo asha tohwa wom Kristenm niko dukahato kfo yindhorkfot htefiwumt nikompno.

22 Bro Nkifrar atoh natwihtwart ninhu yafothat yo rorhu yuhuwafeft be ninn arhu hanyswat.