1 Bro Nkifrar hti yuhuwafhato hemornom nd gutnius ptha nuhasyuk hingrneft. Ndnetnomn nhai hingrna noh hingrna nohkahnomt nd hingrnefthu hingrnaneft. 2 Bi mong trohmonomm nd fasoh yimtnayet yimtnayet nefm yimam kafrohhato niwam. Bro Nkifrar nom htitwornom, nom nhai yihato yimam kfo nheh bonhehhato Bro Nkifrarhu mrokfom tfit kfo kekut bokekutkahnomm. Nhai. Nom kfo hik marnya bomarnyahato kangnom yimam nom hingrniwa hingrneft htihato yak nhtaruhamtn duka mirahm, asom armn tu hingrneft hingrnewumt. 3 Yimam ndar nom kfo pthiwa mrokfot wanyhato nhai yakkahmt mrokfo yimbu yuhat, ndm bi hel yuhat bi tohetmn nhai mrokfo yimbu yuhat yakkahmt. 4 Ndar bbinysoft tndhrn yima yuhum hta kurhiwatrm, nhai Bro Nkifrarhu mrokfot hikkahmt. Nd tndhrn dborioh gutniuskfothu nukeft toh rafiwatrt nhai nukeft tanukakahtm rroh yima yuhum. Ndnetmn nhai Kraisr hti mikahm, arr tu Bro Nkifrar yak nhombranamo yimayer.

5 Nom ndar mrokfot kfo ptha htfaswat nhai nmoh mrokfotn nom tunom dukahato mrokfom kfo pthakah-nom. Nhai. Nom kfo kangnom, “Jisas Kraisr nmoh Broyer. Nom rorhu mrokfom hikwanomn kmi kmi kfo ptha htfaswanomn, nom kmi kmikmoh hingrna yimayenom.” 6 Bingot Bro Nkifrar kfo memor, “Yifung tayuk nukeft amfnahtwat.” To be ror kfomo yuhatn nukeft tanuka wuthamott yifungt. Nom gutnius mrokfot tafi wany juha, to inji tunmoh fasoh fasoh nefroh yifungtn tohmonom. Kto gutnius mrokfot mar nukeft kanjo niamott nom wanyhato hikmotnomt nd fasoh nefm thu trohmomnom, nukeft niahato yifungt tanuka hikefiwa kanjo. Nom nukeft tohhato nd Bro Nkifrarhu yuhuwafefti bbukeft hti duka tungu-newunomt. Kraisr nmoh yima yuhumn htahato rorhu gutnius kakitoh kihwonomt.

7 Nom, nom be nd gutniuskfothu yakitohyuk yima furayenom. Bupam nyungombre hmbrita roh tambon kanjohot roh furayenom. To nd gutniuskfot nom yakitohwohat, nhai be tunmoh nanyjarpampno nd gutniuskfot yakitohkahnomt. Nhai. Bro Nkifrarhu nanyjarpampno kakitohwonomt. 8 Krhopam mano mano niewum. To nom nhai bi riyoh yibuknakkahnom. Wonk wonk nefm yak yibukkakna thombat, nhai duka kinyaki hasokahnom. 9 Yimam yek-wamnom faso faso kak bebwomnom, to nhai. Bro Nkifrar nhai frtrohkahrnom. Yimam tataknihato tat kasuhwomnom, to nhai. Tfit sinya tohwonom. 10-11 Yiha yiha Jisasr yakmo krhopam kanjo inji kekwonom krhopam. Jisasrhu gutnius mrokfothu pthaneftpno nom tohwa yiham be nohyuk tkitt toh-wonom. Ndnettn nd Jisasr tohmo toh yuham tfit nompno yimam tfit htitmt Jisasr tohmo toheft. 12 Nom nd nohyuk tkitt tohwatnom niko gutnius mrokfot wanukakomn hifa rhu nmbuhat yakhato toh nkifranirahko.

13 Bro Nkifrarhu rfa borngthu mrokfot kfo kangt, “Na bi Bro Nkifrarhu mrokfom wany yakiohato hikmoyann mrokfom kfo pthamoyanm.” Nom to inji. Nom Jisasrhu gutnius mrokfom wany yakiohato hikwanomn gutnius mrokfom kfo pthewunomm. 14 Nom bi tunom tawisafwonom. Bro Nungothet Jisasr nohetr, Bro Nkifrar kasinyamorr, nom to inji kanjo Bro Nkifrar kasin-yarahrnom. Kasinyaruhatrnom Jisasr-pno mrifinyrahnom. Tfit nikomi nom rpat Bro Nkifrar yakniruharnom turpno brbo yak htarahrnom. 15 Na nd bi kfo tndhhne krhoparoh mrokfom yak hnamoam to niko gutnius mrokfot yakmo yuhat yihato nom nd krhopam fak hnamonom. To be arihat be bi Bro Nkifrar bok met yindarim yuhuwaf-watrm Bro Nkifrar kfo yindhorwomr. Inji newatm Bro Nkifrar bro yindhor nmbuhat kahukmr.

16 Nd Bro Nkifrar hingrnamo dborioh hingrneft mdukakhato nom nhai hingrna noh hingrna nohkahnomt hingrneft. Nhai. Briyaha thatiprpam bi yohni hanitm tfit yiro yima rifhumio hatohwa yafotham, rom nhai. Rom yihof href yihof href bbuka ssfonefm hta huta hasiwatrm bbuka ssfonefm be inji korh hasiwum. 17 Ndar nom ariha yak hasiwa krhopenm nom nhai ndmn yukatohkahnom. Hifa to ndmn tfit tu toh nkifraniyet dborioh rhu nmbuhat htarahmnom hefenr. 18 Ndnetnomn nmoh dukefm nd hefenr rhuyuk dborioh rhu nmbuhatn nmoh dukefm kitm. Nhai nd nom yekwa krhopamn yukatohkahnom. Nd krhopam rom be inji ariharpa rhunirahm, nd hefenr rhuyuk dborioh rhu nmbuhat rot rhu nkifranirahnomt.