Melɛ̌ Mékɔ̄ɔ̄lē Mam ḿme mɛ́bɛnléd 5

Mwǎn-a-Ńdyɔŋ ḿ mbód mɔ́
akwɔ̌gnédé âdibe nhíbe ń kálag

1 Hɛ́ɛ ńnyíné nhíbe ń kálag á ekáá émbáá éche ane awě adiídé atii dé nkamlɛn. Ḿmê nhíbe ń kálag, bêntel mɔ́ bwěm áyə̄l pɛd ésyə̄ə̄l ébɛ, bényə̄g bédīb-pɛ mɔ́ ne eʼdibɛn saámbé.* 2 Dɔ́ɔ ńnyíné ángɛl e ngíne ehɔ́be ne ehɔ́b éche échə́gké aá, “Nzɛ́-módɛ́ akwǒgnédé âbóo eʼdibɛn boŋ ádībē-ʼɛ nhíbe ń kálag áte?” 3 Boŋ ké ádyōb, ké á nkǒŋsé kéʼɛ á mbwɔ́g e baásɛ̄, modmod eebédɛɛ́ awě ahɛléʼáá ḿmê nhíbe ń kálag adibe áte kéʼɛ ânɔn mɔ́ áte. 4 Menchií bwâmbwam áyə̄le nɛ́n bénkênyínné modmod awě akwǒgnédé âdibe ḿmê nhíbe ń kálag áte kéʼɛ ânɔn mɔ́ áte. 5 Dɔ́ɔ mod ambáá nhɔ́g álâŋgɛɛ́ mɛ aá, “Weéchyɛ̄ɛ̄ʼ. Nɔnéʼ, Ngii-e-nyamɛ awě abídé á túmbé e Juda, á mbyaa ḿme kə̂ŋ Dabidɛ atómé nzum áte. Ahɛle ahúd-tɛ ábɛ̂ eʼdibɛn saámbé, ádībē-ʼɛ ḿmê nhíbe ń kálag áte.”

6 Dɔ́ɔ ńnyíné Mwǎn-a-Ńdyɔŋ ḿ mbód atyéémé átîntê e atii dé nkamlɛn ne échê nyam éniin, bad bémbáá bélə́ŋnédé mɔ́. Ḿmê ńdyɔŋ ḿ mbód mémbɛ̄ nɛ́ɛ ḿme béwúú. Ménwōŋ meséb saámbé, ne mǐd saámbé. Ḿmê mǐd saámbé mɔ́ɔ médé eʼdəə́dəŋ éʼ Dyǒb saámbé ábe Dyǒb álómé nkǒŋsé áte ńsyə̄ə̄l. 7 Ane Mwǎn-a-Ńdyɔŋ ḿ mbód ankɛ̌ nhíbe ń kálag atéd á ekáá émbáá éche ane awě andií atii dé nkamlɛn. 8 Áde átédé nɛ̂ échê nyam éniin ne ábê bad bémbáá móom mébɛ ne béniin, bênkwɛ̌ ásē aʼsó wɛ́ɛ ane Mwǎn-a-Ńdyɔŋ ḿ mbód. Ábê bad bémbáá bɔ́ mod tɛ́ anwálé ńlendɛ ne kúmbe é gôl, elón eʼtwɛ́ áte. Ábê eʼtwɛ́ éʼdíi mekáne mé bad bé Dyǒb. 9 Bénkɔ̄n nkə́ŋgé mékɔ̄ɔ̄lē nɛ́n bán,

“Ekwǒgnédé âtéd nhíbe ń kálag,

ne âdibe eʼdibɛn ábe bêndibpé.

Ekwǒgnédé áyə̄le nɛ́n bénwūū wɛ,

ékɔdnéd-tɛ bad bé Dyǒb ḿmôŋ mekií.

Ebɛlé bétímé bad bé Dyǒb.

Bémbīd metúmbé ne metúmbé,

béhɔ́bé mehɔ́b nyaa ne nyaa,

bébíd meloŋ ne meloŋ,

bébɛ́-ʼɛ ndín é bad ésyə̄ə̄l.

10 Abɛlé syánē beprisɛ ábe bébɛnle ádɛd Dyǒb,

bɛ́kamlán-nɛ á nkǒŋsé.”

11 Dɔ́ɔ ńnɔ́né ámpē boŋ ńwōgē ehɔ́b éʼ ángɛl biíb, élə́ŋnédé ádê abwɔ́g dé atii dé nkamlɛn wɛ́ɛ échê nyam ne bad bémbáá bébédé. Échê ángɛl ébédé eʼkə́lé ne eʼkə́lé, eʼdun ne eʼdun. 12 Bénkɔ̄n ne ehɔ́b éche échə́gké bán,

“Mwǎn-a-Ńdyɔŋ ḿ mbód ḿme bénwūūʼɛ́

akwǒgnédé âkud ngíne, nhɔn, debyɛ́ɛ́, ngum,

edúbé, ehúmé ne mekɛnag.”

13 Dɔ́-ʼaá ńwógé nhəgtéd ńsyə̄ə̄l ḿme ńdé ádyōb ne á nkǒŋsé, á mbwɔ́g e baásɛ̄, á edíb é nkwɛ̌-te, bwěm ésyə̄ə̄l ábe éʼdé áwēd-te békɔ́ne bán,

“Mekɛnag, edúbé, ehúmé ne ngum

bébɛ̂ ne ane awě adiídé atii dé nkamlɛn,

bébɛ̂-ʼɛ ne Mwǎn-a-Ńdyɔŋ ḿ mbód, abɛ́ ne abɛ́.”

14 Échê nyam éniin éhɔ́béʼáá bán, “Ébɛ̂ nɛ̂.” Bad bémbáá-ʼɛ bênkwɛ̌ ásē bébagé-ʼɛ mɔ́ edúbé.

*5:1 Eʼdibɛn saámbé éʼbédɛ́ɛ eʼtwɛ́ ábe bépénnáá nhíbe ń kálag, mod awě adǐbpéʼáá-ʼɛ bɔ́ abédɛ́ɛ mod awe ene kunze êmbagnédté.