Aisaiava mongo mendekli moashulnindrini lohna Sesoana. Mendah Kristusva lohnamoa, Aisaiava doara moamba wulluhvna, ona, si os sewonamba venavav Kristusmba.

Memba honseng suwem nosram sengalm. Noava tatam losang venamba, wo honsengra suwerava wohweisumblolona, osm Yawe Sesoam sembayang vene.

Sismba Sesoa Yutanindm wohtna, altaseng besina besal vinu kam. (Kisim Bek 27).

Memba Yesusna hellelnind indkumbi, ten nihra hev wonlohmana vevnam. No indhanahovrava, mongo 12pelara indhanamba lovahvna, os nengsmoa uv hemba, moalamangnind o aposel (Matiu 10:1-2).

Apelva Atamna ombol lohna, Keinna boasalal lohna. Keinmba Apelmba helvakomandhana. (Stat 4:1-8) Indhanariniva owalmba helvakomandhalmba, men honisna evena.

Aprahamba Israelnindna tomonal luhunna. Seilva nihilva henamba Apram maim sevra ovrivna, memba osm uvna, kuwul wulluhunv. Hengava Sesoa weihaloh vremnana, Apraham maimba, memba osm uvna, kuwul wulluhunv indkumbina.

Doara heva doa Sesoava Aprahamba waiishona, osva yetindiva si petha nemelmba vaohuthuvav. Yeoa pevna pethamoa wuleihalahaphorava, dom no petharam gao. Wo diva no petharava Sesoava hemba henga waiishovna, omnana, yetindiva si katindilm avav, heva heoa kamoa keknam undnahonam amnavra.

Apraham Saram vrana, heva os himba phal avna. Wo doa mundkola vewolvna. Heva os Sesoa hemba kolvrena, otollangla velmba, Isakm awona.

Isakva mendekli venamba, ongamba vrana, Repekam (Stat 25—27). Wo ombolsambla elohmanana, venaEsau eva Yakop. Yakopna nihilva mongova Israel, noinda Yutanindva eva osva nengsmoa uvna, Israelnind (Stat 28:13-15 / Rom 9:10).

Yakoppa dombtana sambla ongamba, vena Lea hevm eva Reselm, moasalalm. Wo osoa ongalna andranind unguvlirinisamblam dombtana, Bilham eva Silpam (Stat 29—35).

Yakopnamba ombolva 12pelara phomnana, wo nomba simbepolva phonamba, hemba pivva os nengsmoa uv, Israelnind, nomini ten 12pelara aratindi phonam. (Poaitamoa 7:4—8)

Mongova nomba Yakopna ombolva lohna, nihilva henamba Yuta. Noinda Israelnindna mongona nihilva luhunv, Yutanind. Sisva Devit king kuwulva no Yutatindirini lohna, wo eva sisnonoava Yesus Kristusva nomini lohnata.

Noinda pimba notindiva osva nengsmoa uv, Sesoana awothowolnind. Vei Apraham hev, vei Isak, vei Yakop, vei Devit, vei Maria, veiva, Yesus Kristus hev.

Hona moarava Yesusva os ona, kava vei, tanamolnam indhanarinielm lohv, eva tanamolnam Sesoalm lohv.

(Yeoa nunglivm Yawe eva Memba kata ka.)

Memba mongo petha.

Aronmba Yakopna bueindil lohna, Livaina ombol, wo Aronna boasalalva Moses lohna. Sesoava Aronmba kikih vrena, hevna sembayang andranindrinielm, os alvna hemba, pris. Omnana, yetindiangas honaoa andraoa kamoa vewuvmona veno.

Sembayang andranindna englamokolnind, os hemba nengsmoa uv, Livai.

Mosesiva Aroniva wonepholaha ephona hevna Israelnindmba Isipethariniva, Sesoana hevna moara. (Kisim Bek 12:31)

Seilnonoava Sesoava Atamsna vena pethanamba. Atamba osm uv, indhana.

Polva moalamangnindriniva os ona, Yesus Kristus os lohna, sismini Atamsna. (1 Korin 15:45) Manara, seilmini Atamba indkokla venamba, wo pimba indkumbimba noinda dalv. Heva os sismini Atamba pimba daheinna, wo noinda pimba undnamba av yunalmba, memba pimba hemba keknamba undnahonamba amnavpa.

Balva mongo Sesoa daspol, noi ten ungund sembayang velvohmanavnam Israelnindna pethara. Elsusva ungundva deisumbaisuv velvohvna Israelnindmba, Sesoanonoamba meis haravhueimnivnamba, Balm okulivna. Noinda Sesoava Israelnindmba nomba wusprunvna.

Balamba mongo moashulnindrini lohna. Wo nonamba Moapnindva daos ohovna Israelnindmongo, Moapnindna kuwulva wulluhunna, Balak. Wo Balakva Balamba omnana, yeoa Israelnindmoa kikpulna polothunu, osm heoa owolakovra daosmoa.

Balamba donkisra gavna monam, osm velm, heva os Sesoana ovsongolnindrini monam kelvhoamnana. Donki nonglana ovsongolnindrinimba, heva os Balamba hevpa owai, nonglanamoa. Hev phona, donkim helve, osm venavna, gao. Noinda donkiva indhanarinimsna moamba ishomnavna Balamba, yimba indkokla vei (Namba 22—24).

Balamba es eva Israelnindmba ata vinta, manara, Sesoava doa hemba doara awothowol vena. Balamba di mindnam und vevna, noinda himba Balakna moamba wohengvna.

Honamba moamba memba osm lohv, indakondamomba wulbukethav.

Memba kota-mendekli. Seilva nemetva Bapilonnindva wulnaongla phonamba, ehelvowolanamba Israelnindmongo, wo kuvhoawol vina hemba. Wo himba Israelnindmba ninginguavna hevna andranindilm, wo os wulavna hemba diva, venamba, 70pelara tahonmba luhunvna.

Yon moalamangnindrini pimba olhmonamba olhinv, os Sesoana ungundva si Bapilonnindmsna avav. (Poaitamoa 1718) Memba osm honamba, owaimomolva himba Sesoamba ningminivmoa.

Pitava wevsakoklam ishomnavna Sisakuwulnam Romnindnam, noinda himba Romkota os olhvna, Bapilon. Manara, himba Kristustindimba wohwangtumb gavnam yunalm (1 Pita 5:13).

Barakva mongo Israelnindna mendekli kuwul luhunna. He daosrava miva lohmana vinvna (Hetman 4—5).

Beava mongo sungeittata, heva os mongnindna pethara luhungu vinv, huiva PNGrava owai. Englavoskava henamba nuveskol vilunv tokol.

Bensaminmba Yakopna kalalnonoa lohna. Wo noinda mongnindva nomba Israelnindnamba os nengsmoa uv, Bensamintindi.

Memba Sesoana nemelmoa besal.

Memba moamba osm lohv, Sesoana deuv.

Avalva Devitmba lengna hona kembellava, wo sism Mariava Yesusmba lengna hona kembellava, manara, noinda himba Devit kuwultindirini lohna.

Memba tinen, himba besal teihnungna vilov.

Devitva Yesina kalal lohna, nomba Yutatindirini. Himba kuwul besal wulluhunna Israelnindmba, wo he kuvhoawol vinvna nomba owalna andramba, vei sisminim eva doaraminim (1 Samuel 16:11).

Himba Goliatmba honnamba lipiavna (1 Samuel 17). Devitva Sesoamangas undva vevna, noinda himba sangalva ovovrawol venavna, nonamba okolalmba. Pimba os ningthiv, Buk Song o Psalms. Sesoava moamba ovlahana, os Kristusva si lohvav Devittindirini, wo honamba os wohphona, ten Sesoa hev onam (Rom 1:3 / Poaitamoa 5:5).

Elaisava mongo Sesoana moashulnindrini. Himba Elaitana owalna vuhera lohmanana (2 King 2:118).

Elaitava mongova Sesoana moashulnindrini lohna. Himba mendekliandrava vevna, manara, Sesoana keknasowolva heindava ambo lotholohvna. Yesusva Yon Baptaismba olhmona olhinvna, ona, Elaitamsna himba lohna (Matiu 11:14).

Himba Yosepna kalal lohna. Plalva os lohv, Sesoa kamba otolva holvoraohv.

Memba moamba osm lohv, talna. Isakna ombolsambla elohna, vena Esau eva Yakop. Avalva dendina lengwolna hemba, yivaltowondva Esauva, boasalalva Yakop. Noinda Esau si vaohothovav aralna puwulva. Heva os ponm indkokla vovhoavnamba, hev omnana hevna boasalalm, inne kam vraho, daha ye aranapuwuloa vaohotho, kava owai. Osva himba nengnamoa nomba Sesoana moamba, temba awothowolnamba aralm eva yivaltowondalm.

Fikva movolva besal kethav. Noinda Yutanindva esvema endhavna, hlalm.

Giteonmba eva mongo kuwul luhunna Israelnindnamba. Himba Sesoam keknam undnahonam lohmanana, noinda himba Sesoamba osahmanavna, kam kolvro, daosm nonapopolm wulpholm. Wo doa Giteonmba hevna valgonindmba deisumbi vohavna daosramba. Diva ungundva pomsna olvna, heva os Israelnind hemba wohwangtumbna yunalm (Hetman 6—8).

Golva dina aval, wo besal enesmosal hevm. Noinda Sesoava Yutanindmba wohtna, manam manam vewol viu golnangas, nonam kam sembayangnam okuluvmona velm tempelduvrava.

Yon moalamangnindriniva pimba olhluhunvna golmba, nonamba himba pimba numhawol vevnamba, ovna, manimani sna nalohv senamba diva Sesoaindava murapetava.

(Yeoa nunglivm Lotm eva Sotom.)

Grikva mongo petha dihelvna, kotava mendekli lohna Atens. Griknindva manam manam nonoarangas avna, noinda mongnindva hemba wivewol ovolvohvna, wo osoa himba noinda Griknindna moamba nonorava avna.

Yesusna besal nemelmomba seilva Griknindna moana novol vewol vina tombairava.

Hakarva Sarana andranind unguvlirini ana, Saramba nomba Aprahamna ongalputowa avna. Saramba phal avna, noinda himba Apraham wuhhona, osva wou, wailiu Hakarmoa, memba pina wevsa. Wo os evena, Sara ten unnam, wo doa Hakarva otolm lengna Aprahamna, Ismaelm awona.

Heva os Sesoava nomba otolmba os venavna, memba kana moarava owai. Heva os sism Saramba hevpa otolmba lengna, Isakm awona. Wo Sesoava nomba otolmba os venavna, memba kana moara pholana.

Memba Israelnindna moana, osm uv, pioa Sesoamoa okolalohra! Israelnindna moamba, pimba os ningthiv, Hiprumoa.

Hosana (Matiu 21:9) Memba mongawamoa, pioa Sesoamoa okulivra.

Hona tombaira Herotva sambla sambla os lovahv.

(1) Hona Herotva kuwul wulluhunna Yutanindnamba, nonamba Mariava Yesusmba lengvnamba. Nonoanindva Yesusm nonglalm ambvna, Herotm os osihminina, yimba nonora lohvma, hi Yesusva avalva lengliav? (Matiu 2:1-2 / Luk 1:5)

(2) Hona Herotva, nihilva henamba mongova Antipas, wo himba kuwul wulluhunvna Galili provinsnindnam, nonamba Yesusva diva Sesoana moamba ishomana vinvnamba. Himba Yon Baptaisna kuwulva os kovhoana diva buiduvrava (Mak 6:1429). Nonamba Yutanindna kuwulva Yesusmba waiishuvnamba, hona Herot Antipasina waiishuvnata (Luk 23:6-12).

(3) Hona Herotva, nihilva henamba mongova Akripa 1, himba val vewul vina Yesusnindmongova. Himba helvakomandhana Yemsmba moalamangnindrinimba, nomba Yonna etelmba (Aposel 12:1-23).

(4) Hona Herotva, nihilva henamba mongova Akripa 2, himba Pol moalamangnindrinina wetatmomba hellevna, nonamba Yutanindna kuwulva Polmba waiishuvnamba wetatmorava (Aposel 25:13—26 / 26:19, 27—32).

Honamba Herotva sambla samblava memba lovahvnamba, himba mongnind, Yutanindna meisungund, wo himba aknandhamana vevna Romduangmongova, noinda Romduangva hemba awowol vina, kuwulm ilvahinilm Yutanindnam.

Memba moamba Yonanamba, himba osm ovna, Aprahamtindirini kava lohv, ten noi doara Sesoam Yawem keknam undnahonam lohmanavnam. Israelnindva hevmba os nengsmoa uvna, kava Hiprunind, eva kana moamba Hiprumoa luhunv.

Yutanindva os vivna, otolva simba 8pelarava avalva waivevnamba, doa hutovpa kovhueimnivna, osm yimba memba Yutanindrininonoa. Manara, doara doa Sesoava Aprahamba ishomnana honamba osmba velmba.

Memba wit, witva brasna nihna.

Isakva Aprahamina Saraina ombol luhunna, Yakopna aral. Isakmba osm awuna, los ov.

Isippa mongo petha, noi di ten murapeta luhunvna Yutanindna pethara. Tahonmba mindnam pekhua vungeinna, nonamba Isipnindva hemba wulavnamba andranindilmba diva Isiprava. Wo doa Sesoava esvema vinvna Isipnindmba, wo os Yutanindva pulvona nominiva.

Yutanindna tomonalva doarava luhunna, Yakop. Sesoa hemba henga awona, Israel, memba osm uv, Sesoai hevm epishawolvna. Yakopna 12pelara ombolva lovahna, wo hemba os nengsmoa uvna, Israelnind, nihilva mongova, Yutanind.

Sismba himba Isipriniva vinamba, anganamba, ungundnamini muehvina Keinanpethava hevelm, nom wohengivna moam, Sesoa ten doara ishomnanam Apraham. Wo Keinan maimba sevra ovralmba wuleihivna, Israelm maim sevra ovrivna.

Ivpa Atamna ongal ana. Ivmba osm awona, indhanana indkumbina aval einv. Atamina Ivina towandva men, vei Kein, Apel eva Set.

Kamelva mendekli tata vilov. Nemetva Yutanindva daoh vrevna, osm vevna, noinam hevm angalm, eva kinm ianga velm.

Hena andrava numhowolalm luhunvna Israelnindm, moam nom ten Sesoa Mosesm vraohnam. Mindnamba himba Varisinindilm lovahvna, noinda himba Yesusmongova ahnam lovahwolvna.

Memba moamba os hilliv Hiprumonamba, kava doa lengei. Keinmba Atamina Ivina yivaltowond luhunna. Himba hevna boasalalmba Apelmba helvakomandhana. Noinda Sesoava hemba nihra suwesumbulna saihana, osm indhanamba nunglivrava, uvra, indkoklana lohv, heva os Sesoava hemba dandana vrev.

Keinanpethava noita, ten Sesoa doara ovrahonam Apraham. Yutanindva hengava os weihaloh vrivna, Israelnindna petha o Israel. Seilva ungund vaohuthuna, wo heva os Yutanindva Yosuanambara doa muehvina nomba pethava.

Honamba moamba osm lohv, pimba indkoklal avna Sesoana novrava, wo Yesusva doa pimba kilumb shoawol vena, osm ora lehra windel av.

Koramba doara lohvna nonamba Mosesna novrava. Koramba Mosesi Aronim unvna, yengasva vuhemba kekalvho evevravavmoa, kam ewulihamno, ka prisalmoa luhuni Israelnindnaoa. Heva os Sesoava onamoa, wo noinda pethava puvkonamba, wo doa Koratatanamba wohtolpena, dalalmba.

Kristus maimba memba alvpa, memba Griknindna moana, wo eva Hipruna moanamba os alv, Mesaia. Heva os plalva mongal lohv, indhanariniva nomba temba Sesoava kikih vrenamba, Sesoanindmba lopshalmba. Noinda pimba osva uv, Yesusva Kristusalm lohv.

Memba Romnindna wevsa doara luhunna, osva indhanariniva sahoklalnonoa lohvnamba, wo hemba sena wikleihivna lepethaltra, osm dahara. Devitva honamba nihsesoamomba ten ishona hevna Tombai Sangalmora (Buk Song / Psalms), Sapta 22. Sesoasongol Devitmba wuhho ovravna, nonapopol himba novol vewol vena.

Laionmba eva sahoklal ovovnata, indhanamba hovra hilhala viv. Wo noinda osva an eva hemba kevravav. Yakoppa hevna ombolmba Yutamba olhna, laion maim (Stat 49:8—9).

Yon moalamangnindrini Yesusm olhmonamba olhinvna, os himba laionmsna lohv Yutatindina (Poaitamoa 4:7 / 5:5). Memba osm, himba doa Setanmba wohkuvhoana, hevna indhanakoklanahonam.

Pita moalamangnindrini Setanm olhmonamba olhinvna, os himba lohmana vev, os laion ten tatam silelvm. (1 Pita 5:8)

Lepatva eva laionna nihna ovovnata mongnindna pethara, huiva owai PNGrava.

Livaiva Yakopna ombol lohna, mongo Yutanindna simbel. Sesoava Livaitindimba kikih vewol vena, hevna andraram. Noinda indkumbiva sembayang andranindilmba kekal vethana Livaitindiva.

Memba Sesoana lohohmoa, noi ten Sesoa Mosesm Sainai olora ovrahonam.

(Yeoa nunglivm Petiva lohohmoriniva.)

Honamba moamba osm lohv, Yesusva pimba lopshav, manara, pivva suwekembelmonara lovahv, plalva lovahv, pivva indkokla vina.

Lotva Aprahamna umbeindil lohna. Nonamba Aprahamba Urkembellini gavnamba Keinanpetharam, himba ella hevna umbeindilmba Lotmba waingana. Heva os Lotva alm vevna dom Sotom kembellam, ten indhanakokla avnam, manara, pethava hevm besalangas lohvna.

Doa sismba Sesoava suwenam tasowa pipahawolalm vevna Sotomnindm eva Gomoranindm, himba hevna ovsongolnindrini samblam unna, yeoa Lottatanamoa elapsho nominioa. Heva os Lotna ongalva nengavnang piprinna no kembellam, wo noinda hemba honalm nilhana (Stat 18-19).

Nonamba Israelnindva sahalpetharava lovahmana vilimbvnamba, Sesoava hemba di innemba dahwol vena, os ningthivna, mana. Mana osm uv Hipruna moanamba, mani dihi memba hevpa?

Himba Yosepna yivaltowond lohna. Plalva osm lohv, duus vevmoa.

Mastetva eva besal vilovta inne. Mastetkulva silel vilov, sahaikna nihna. Himba timba owai, heva os osonnamba himba kuvhoawol vev.

Memba vuhemba, noi ten Sesoa tihsongom noinda wolasiha vawovm, hukum vewolalm.

Melkisetekva mongo Sesoana sembayang andranindrini lohna doara.

Hona moara Yesusva hevmba ambara ovrana, osva kava Sesoa lohv. Manara, himba Sesoam ongavna, Sesoa hev ten hevm Mosesm ambara ovathamnanam (Kisim Bek 3:13-15).

(Yeoa nunglivm Yawe eva Arana ombol.)

Memba mongo Yutanindna deuvtata. (Yeoa nunglivm Sipsip.)

Yesus eva hevna moalamangnind mendekliandrava mindnam vewol vivna, indhanam kolvrowolalm, osm indkumbiva wiyera avra, osva honamba moamba Sesoanamini wonvruwul prov.

(Yeoa nunglivm Kristus.)

Memba moamba osm uv, tok promis, o kontrak.

Sesoava seilva Noatatanam awothowol vena, ona, kava yemba venglahav, pueumbva snamba si owai (Stat 6:18 / 9:1,9). Hengava hona pethamba pueumbnamba kava si indkokla vrevavmoa.

Sesoava seilva Apraham moamba waieuk vrena, omnana, kava si tanamolnam yemba venavav, vera, petham kovorahora, eva osoa yena vera, simbepolpev mindnam phora (Stat 17:1-8).

Wo osoa henga sism Sesoava Mosesm waieuk vrena, omnana, kava si tanamolnam Israelnindmba kolvrowol vevav, himba keknamba kana lohohmomba engitava (Kisim Bek 19:4—6 / 24:4—8). Wo heva os owai, manara, pimba indhanamba eva es Sesoana nengavnangmba engivav, noinda heva Kristusnanangas pimba wuvolva avav.

Wo eunillamba Sesoava moamba pim ovlahinna, ona, himba nomba temba Yesus Kristusmba undnahonamba lovahthamnavrava, kava si hemba lopshavav (Matiu 26:28 / Rom 11:27 / 1 Korin 11:23—25 / 2 Korin 3:6 / Hipru 6:16—20).

Memba Yesusna andranind moashulnind 12pelara lovahvna.

Memba mongo Yutanindna ungund avna.

Memba Sesoana andranindva, ten Sesoava hevna doaramini moamba ovrahunnamba, gumai vovhoalmba vavawonam Yutanindram.

Mosesva Aronna boasalal lohna. Sesoava hevmba ambara vethamnana Mosesmba, os maim ona, suwe talahaprav tivtandasra sena, heva os owai, wohtavnamoa. Wo moalamang no suwemarini opiemnana, Moses, yeoa garava, kana Israelnindmoa wonpho Isiprinioa, himba kinmba mendekli vruwuv.

Mosesva Sesoana tombaimomba seilva 5pelara novol vewol vena. Sismba Yesusva hevmba numhana no tombaira, ten Moses 5pelara novol vewol venam, eva noi, ten Devit kuwulna tombai sangalmoa, eva moashulnindna tombaimom.

Manara, nonamba Yesusva men hui mendah andrava vungu vevna, hevna moalamangnindva honamba tombaimomba mendah novol vewol vinamoa, memba pimba osva ningthivpa, Besal Nemelmoa o Nupela Testamen.

Varisinindva Yesusmba os umnivna, kava Mosesna moamangas engiv, mongova owai.

Seilva doarava Yutanindna moashulnindva os uvna, nambai eunillam Kristusva si provav, pimba lopshalmba.

Wo heva os Yesusna moalamangnindva henga nomba moamba weihaloh vrina, os daipotam memba, nonamba pimba Kristusnindva hemba nengviluwuvpa, prolmba hengamba, indkumbim lesvhoawolalmba.

Nikolasva mongo gurudaspol doara lohna, wo monglava Kristusnindva hemba patvmonavna. Heva os himba doa owolokovvna.

Memba kotamendekli lohna Asiriapethara, Sesoava dom Yonamba wolaihangana hevna moashulnindrinimba, ongawolalmba hemba. Ninevanindva himba Israelnindna ungundalm einvna, heva os himba hevm weihaloh vewol vivna, wo Sesoava hemba indkokla vewol venamoa.

Memba moamba os hilliv Hiprumonamba, kolvrowol vev.

Yutanindva os ningvna, Sesoa si mongom moashulnindrinim homba petharamba wolaihapravav, wo himba si os moakus unvav, Kristusva doa murapeta prolm vev. Wo noinda Yutanindva osva olvohvna, pimba no moashulnindrinim aevulmanav.

Memba moamba os hilliv Hiprumonamba, lohmanangas vev. Manara, Keinva diva ambo lohmanangas vevna no petharava.

Olivpa movolva besal kethav. Movolva kelvwol viv, welelm, welva nomba beswonam hlav, eva osoa nihm selvowolalm obatram, eva osoa huhmohram. Yutanindva honna kelvwol vivna, englanamba owai.

Honamba indhanamba himba ambo nisandra viv kuwulna moara. Eva henashara himba poaitava lelga vevra?

Memba hon besal, diva mendekli lohmanav.

(Yeoa nunglivm Sesoana ovsongolnind.)

Himba mongo mendekli duang luhunvna Yutanindna. Himba Sisana keusingi andra vevna, nomba temba king kuwulva wuleinvnamba Romnindnamba.

Honamba moamba osm lohv, Sesoana novlomossis.

Honamba moamba osm lohv, kuwul mendekli, Isipnindna moana.

Hona moarava Yonmba moalamangnindrini indhanamba hona pethanindmba pusvund vena, ona, himba Sesoamba und vivmoa. Noinda Yesusva osva unna, yenamba arapevpa luhunv Setan (Yon 8:44).

Memba petiva besal hevm snal i, Sesoana hevna moara honamba petiva kueindina. Nom lohohmom hengam nengvhoalm, ten Sesoa Mosesm ovrahonam di Sainai olora.

(Yeoa nunglivm Lohohmoa.)

Memba pina Kristusnindna wevsa, pona poswol velmba.

Himba mongo ungevlirini monarini ambo avna. Heva os himba beswonam vewol vena Israelnindna nongalpethanindrini samblamba. Himba komawohana hemba hevna deuvra, manara, hev undva vrena, osva Israelnindna Sesoava, Sesoanonoa woheinv.

Romba mendekli kotava lohv Italipethara, kuwul mendekliva henamba os ningthivna Sisa. Nonamba Yesus Kristusmba lingvnamba, Romnindva daosva ohomana vevna, osva hindmongo, hindmongo, wo daosmba himba kuvhueivnamba, petham kanothongavna hevelm. Yutanindva eva di Romnind wulavnata, wo heva os himba engalpingalm vivnata Romnindmba.

(Yeoa nunglivm Sisa.)

Romnindrininonoa (Aposel 16:37) (nem bilong man i stap rait long buk) Indhanariniva mongova Romnindrininonoava lohtava, polisika valgonindka hemba nisva bui vivavmoa lilnamba. Hemoa boasna wetatmora waiishuvra.

Tovolsangal diav. (Kolosi 2.15 / Evesus 4.8) (ol man i winim pait na i kam) Eva Romnindva tovolsangalva diaomana vevnata. Nonam vivna, daosram hev ten kekaiv vivnam, wo os ningiamb vevna domba deuvramba, owalm deuvnindm nongalalm.

Plalva men lohv, pivva pimba huiva ayiskos vevpa deuvrava, wo eva pivva Sesoana novrava lehrava vivmoata. Yesusnanangas pivva vi vovhueivav.

Memba mongo olo, no olorini Mosesva Sesoana moamba wulpiheinna.

Memba mongo petha murapeta Yutanindna petharava luhunvna. Simbehumunilva henamba Yutanind, heva os himba ongamba evrowolvna Yutanindna meisungundmongo. Noinda Yutanindva hemba muskva vinvna.

Himba daosnindna kuwul Yutanindnamba luhunna.

Himba mongo Yutanindna moashulnindrini luhunna. Himba Devitmba kuwulalmba awona Sesoana moara (1 Samuel 16:13).

Saptuva mongawa mingunam lohol vev. Sesoa hevelm kanothona no mingum, no mingum, osangas, osm Yutanindva sembayang vewuvmonavra. Noinda osva ningthivna, vah iaevulokomba. Daipotava pimba Kristusnindva vahva iaevulv minguramangas, sembayang venalm. Manara, Kristusva hengava phona minguram.

Honamba moamba osm lohv, kuwulna ongal. Sarava Aprahamna ongal ana. Seilva Sarai maim alvna, wo henga Sesoa Sara maimba awona. (Yeoa nunglivm Apraham.)

Honamba monglava indhanamba, himba Yutanind, himba nom Mosesna tombaimomba 5pelarinimangas wohengivna. Himba os ningvna, ovsongolnindva avmoa, wo eva indhanamindva hengava pulvovavmoa pokamariniva.

(Yeoa nunglivm Yutanindna kuwul.)

(Yeoa nunglivm Tempel)

Memba Sesoava noi, manam manam men hev venam.

Yutanindva Sesoana nihilmba alas ovna, sevra ovralmba, noinda osva uvna, mendekli. Nonamba Pitava Yesusmba mendekli maimba osva sevranamba, Yesusva indkvethavna hevpa. Manara, Pitava doa nonora lohvna, osva Yesusva Sesoa lohv (Matiu 16:16).

Sesoasongol (Stat 1:1 / Matiu 1:18) (spirit bilong God) Pimba os ningthiv, Sesoava mongasal einv, heva os undva samblamong, vei aral, vei ombol, vei meississongol. Meississongolva himba nihhui, heva os himba indhanana nihmera siheku vinv, nomba temba Yesustindilmba lovahvpa. Wo pivva manimani hevnapopol viv beswonamba.

Sesoana nemeltindi (Matiu 6:33) (kingdom bilong God) Englisnamba os pimba uv, kingdom of God. Memba pimba Kristusnind, wo Sesoana englisra pivva huiva av, wo eva si sewonamba senakembellava osta.

Sesoana ovsongolnind (Stat 3:24 / Matiu 1:20 / Luk 2:8-14) (ensel) Ovsongolnindva Sesoa vewol vena, hevm wonalm senakembellam. Himba nihhui ivtovol av, noinda pivva hemba nungeilvmoa, heva os Sesoava hemba wolanga vungu vev, andram viwul venalm.

Andrava mendekliva henamba luhunvpa, pim Sesoatindim kolvrowolalm. (Aposel 12:6-11 / Hipru 1:14) Mongnanamba Sesoava hemba wolapra vev, hevna moamba ishomnalm indhanarinim. (Matiu 2:13) Kuwulva sambla ahai eluhunv, Maikel hev mongova (Yut 9), eva osoa Gapriel mongova. (Luk 1:19)

Honamba moamba osm lohv Hiprumonamba, otolm holvoraohv.

Memba osm ov, Sesoana ungundrini. Manara, nonamba pimba Sesoanindva sahonamba vivpa, himba pimba wetat owol vev Sesoainda. Eva himba miva kuwulva wulluhunv tihsongonamba.

Memba mongmoa Yerusalemkota.

Sipsippa mongo Yutanindna deuvtata. Ambo himba ovovrakolal vilov, noinda osva indhanarini heva hemba deisumbi lohmana vev. Osva vev, ilm hlalm, eva pom hlalm.

Yutanindna wevsava os luhunna, himba sipsipmba khueivna, nihilmba wohweisumbulolovna altasengra, Sesoam sembayang vinilm. Doarava Sesoava hev wohtna, vewuvmona velmba Yutanindva. Ambo hevna indkoklam leslala vewolalm. Heva verava, Kristusva pimba kilumb showol vilprovra (Yon 1:29, 36 / Rom 3:21-26 / Hipru 9:28).

Meme Memeva eva mongo Yutanindna deuvtata. Yutanindva eva hemba nona sembayang velvohmanavnata.

Sisa maimba owao ovrav Romnindva osm, mendekli king kuwul kana luhunv. Yesusna novrava Romnindva annindm annindm os daos ohomana vevna, wo hengas einvna kuwulva.

Nonamba avalva Yesusmba lengvnamba, Sisa Aukustus mendekliva kuwulva einvna (Luk 2:1).

(Yeoa nunglivm Rom.)

Solomonmba Devitna ombol lohna. Himba aralna vuhera kuwulalmba hengava luhunvna. Wo Sesoava hemba esvema dembrahona, osva vena, di eva nowol. Himba nona vena tempelduvpa nemelva diva Yerusalemdava.

Sotomkembella Lotva avhoana, Aprahamna umbeindilva. Wo eva Gomorava murapeta ambo lohvnata.

(Yeoa nunglivm Lot.)

Memba mongova pethava lohna wanplombra Metiterenianda.

Memba vuhemba, noi Sesoa ten hukum vewol vawovm indhanakoklam noinda.

Honamba moamba osm olhwolv, Sesoa unna, ka vena, manam manam doa tumbvena, eva si manam manam wohkik vera.

Memba kota lohna Spenpethara wanpethalla nohalm. Hevm hivema lohvna, Yutanindna petharava.

Memba Yutanindna mongahvhoralm mendekli sembayangduvpa luhunv. Himba doara luhunna Yerusalemkotara. Di sembayangnind himba Sesoam sembayangelm atonglalvohmanavna. Andranind di deuvtatam weisumblolovna, andranindva nomba os nengsmoa uv, pris. Katekisva himba eva di indhanamba numhowol vewuvna tempelpulmera.

Memba tihva mongo Yutanindna mendeklitihva doara lohawol lohvna, Yutanindva tempeltihva vivnamba, henga ningminivnamba, nom doaraminim, temba seilmba eindhumunva tempelmba pusvinamba, wo henga saivona, sembayang vewuvnam.

Hona moarava Yon moalamangnindrini hevm opusvundthovna, heva os hevna nihilva novol venamoa.

Tihsongova himba Setanna owal, himba pimba monakoklaram weiha suvwolm viv. Heva os pivva nonora lovahv, osva Sesoava doa hemba tolpiapahana. Kristusva vena honamba heva krusenana.

Seilva himba Sesoana ovsongolnind avna hevindava. Heva os Setan hemba kangal ipihana hevnahonam. Noinda pimba hemba osva nengsmoa uv, tihsongo.

Himba suwekembellam olongov. Heva os hev umnina Kristusm, ata ye lilnam kam dom wolanga vevav. Noinda mendah nambaiva prunvmoa, kamba domba (Matiu 8:2829).

(Yeoa nunglivm Mel endalhui.)

Nonamba Yonna moalamangnindrinina novrava, tombaiva himba novol vewol vina tombaitokolla. Wo dind vewol vivna, mulmba tinana henga sithawol vivna. Osm ata homeis mongo indhanarini pevhoarava, nonglavm.

Memba sanda teteihnungna.

Topina plalva sambla.

(1) (1 Pita 5:4) (nambawan prais tru) Memba osm, yimba doa Setanmba kuvhoana, Sesoana vuhera phona.

(2) (Poaitamoa 14:14) (hat gol) Memba osm, yimba kuwulmsna lohv keknamangas.

Memba osm, indhanariniva Sesoana tombaimomba nengvra, os tanamolnam, kaoa engvra keknam.

Honamba moamba osm lohv Hiprumonamba, tendorinina nihrini.

Himba sembayangnind, nomba doaraminimomba Mosesnamba pathaluhunvna heinda. Himba Yesusmba hevna undnahonam lovahthamnavnamoa.

Memba vuhemba, noi indhanasongo noinda ten avm, nengviluwuvm nom, mendeklina lesvhoawolalm.

Wainmba eva besal vilovta wesel. Wainmovpa bes vewol vev os i. Polva kelvwol viv, wainelm. Englanamba kelvwol vivnamoa, heva os monglana wolpalakand vewol viv di hevnavhorangas.

Memba mongo wanplomb liv hovra, vena Isippetham piana, eva Israelpetham piana.

Nonamba Mosesva wongavnamba Israelnindmba Isipriniva, himba hevna alana vitiwalwolna hona wanplombmba. Wo vena, pok wohpho, os wohwonphona. Wo valgonindva Isipnindnamba sis opilkilihamnavna, wo henanam wan provna, hemba os wohmera vena, dalalm.

Witva brasnanihna ovona, nonam plawamba viv bretalmba.

Honamba moamba osm lohv, munngulval kevrav, Hipruna moana. Yakoppa himba Isakna ombol lohna.

Memba Sesoana nihilnonoa. Seilva nemetva Sesoava Mosesmba ishomnana, osva kanamba nihilnonoava Yawe lohv. Hipruna moanamba memba osm uv, memba kata ka, kava wohav osangas yunalm yunalm.

Mongnanamba Yesusva hevna nihilmba os sevra ovravna, memba kata ka. Noinda pimba osva nonora lovahv, himba Sesoa lohv (Yon 8:24,28,58 / 18:5—6).

(Yeoa nunglivm Arana ombol eva Memba kata ka.)

Yeremaiava mongo Sesoana doaramini moashulnindrini lohna.

Memba Yutanindna mendekli kota luhunv. Hengava weihaloh vrivpa, os alv Sion (Poaitamoa 14:1).

Memba moamba osm uv, lopshalnindrini.

Israelnindna wevsava os luhunvna, yivaltowond kuwulva wulluhunvna. Esauva indkokla vena, himba hevna boasalalmba oresvhona yivaltowondalm.

Yonamba mongo Sesoana moashulnindrini lohna doara.

Memba kembel lohvna Israelnindna pethara wanpethalla.

Himba Yakopina Reselina yivaltowond luhunna. Yosepna boasalal mongasal lohna, nihilva Bensamin.

Yosuava Mosesna vuherava hengava luhunna Israelnindna kuwulalm. Sahalpetharini wonphonamba, Keinanpetharam wongavna, dom ten Sesoa os unnam, yimba si pevm wohvaohuthuvav.

Wo doa Yosuava kukunvna pethava nomba Yakopna simbepolmba, temba 12pelarava phonamba, hindtindim, hindtindim, hindtindim. Lehra vethanamba, venamba, Livaitindiangas lovahvna himba pethahuiva, manara, himba Sesoana sembayang andranindilm avna. Noinda owalva ambo hemba dahwol vivna.

Memba mongo pomba liv Israelnindna pethara, Keinanpethara.

Yuta mongo Yakopna ombol lohna. Yakopna ombolva 12pelara phona, wo indakonda himba pethava akokomong vena hevmba diva Keinanpetharava nominiva, nonamba Sesoava temba wonpronamba Isippethariniva. Sesoava doa doara unna, wo kuwulva nom moam wohengivna, nonamba pethamba akokomong vinvnamba.

Yutatindi mongnahalmba pethava vaohuthuna, os alvna, Yutia, wo Yerusalem kotava di lohvna no provinsra. Wo sismba nomba moamba Yuta ambo os hilvnisna mongawatilm Yakopna 12pelara towandal, hevtindinahonam.

Devit king kuwulva luhunna no Yutatindiriniva, wo eva Yesus Kristusva no Devittindirini lohna, manara, avalva Yutatindirini einna.

Yutanindnamba men luhunv nambaiva mendekliva innetihriniva.

(1) Mendekli tihva lohv, nonamba Sesoana tempelduvpa hengava vilivhueinvnamba diva Yerusalemrava. Os ambo weihaloh vriv, mendeklitih woklakambarini. Hona woklamonamba ambo Yesus hevm olhmonamba olhvna, kava woklamsna luhunv pethanindmba. (Yon 9:5)

(2) Pasova Tih Memba tihva noi hevm mendeklinonoa. Nom nengvhoalm hengam, ten Sesoa muehnam Israelnindm henga. Nonam Sesoana ovsongolnindrini Isipnindna yivaltowondm kokopinvnam, Yutanindnamba kuelwolkoho vinvna. Noinda osva ningthivna, mendekli tihva kuelwolkohorini.

(3) Tihva Roti Yishuirini. Nonamba Yutanindva Isipriniva pulvovnamba, eva henanam ata rotiva tevwol vinta yisnahonamba, owai. Manara, lelnam phopianam hev Isiprini Sesoana moara. Wo noinda hlavna nomba rotiva yishuiva, no henga nengvhueivnam, ten hev pulvovnam Isiprini. Honamba nonam velvohv, Pasovatih mendekli vivm.

(4) Tihva Memba Lilmbduvrini. Hona nambainamba Yutanindva und lothopralohvna, noinda doa andrava engla poswulna, doa innemba vralm vevna osoriniva. Himba lilmbduvrava nom lehalvohvna, ten doara simbehumunil aevulinnam di sahalpethara, nonamba Isipriniva monamba ambvnamba.

(5) Pentikos Tih Honanamba Yutanindva doa indkvithivna, noinda doa witva vravna osoriniva nihilangas. Nom henga nengvhoalvohvna, ten Sesoa hena lohohmom vrahunnam hevna simbehumunilm Sainai olora. Heva os daipotava pivva Kristusnindva nom nengvhoalvohv, ten Sesoasongol holvopinnam, Kristustindim pilivhoawolalm (Aposel 2:4).

Yon pimba ishunv, osva mindnam Yutanindna kuwulva himba Yesusmba wusapramana vinivna. Manara, Yesusva henamba indkoklamba velokusa vinvna.

Monglava nomba kuwulva himba Varisinindilm lovahvna, monglava himba sembayang andranindilm lovahvna, os nengsmoa uv, pris, monglava himba katekis o gurugama lovahvna.

Monglava himba Satusilm lovahvna, eva monglava himba polisimsna lovahvna, henoi ten tempelduvm kekalvho vrelvohvnam.

Nonamba kuwulkuwulva kusovnamba mundilnahonamba, hemba os seviluv, Sanhedrin (kaunsil) (Matiu 26:57—59 / Mak 14:53—55 / 15:1 / Aposel 4:1 / 23:1-8).

(Yeoa nunglivm Satusi / Varisi / Katekis / Gurugama / Pris.)