Ⅰ Ke liti a, ode fɔtɔ banyanɛ a kĩ bɛlɛ tɔkɔɔpu evũkɔnɔ a kamɛ ɔmɔa ya nɛ yĩ sɛkɛ̃ ebi yĩ kĩ, “Ya, ntsa nɔ ayekĩ bɛvɛlɛ adɔpaani a kĩ ɛtɛ dĩ, kĩ edzi nɛ tɔwɔ pii akũ a sɔtɔ. Ⅱ Tite akũ fɔgã bɔa adɔpaa mɔ ye, ade ye adɔpaa kabɔa waĩ a wugɛla tite akũ bati a.”

Ⅲ Ode fɔtɔ ɔnyanɛ a kpã yĩ nɛ hũhũ kamɛ ɛnamɛna kɔsa kamɛ. Nɛ awã mmɔ́ otsole odi kĩ edzi nɛ ɔyaɛ kpa ngbã odi akũ. Bɛtsɛlɛ mbusuo buĩ kĩ basupa Baguma bite nɛ ɔyaɛ a akũ flee, ade edeĩ fɔlɔ evũkɔnɔ mɔ tɛlɛ ewua a. Ⅳ Otsole a do atadiɛ ngbã mɔ fɔwɔwa ntsɛkantsɛka, ade ɛhɛhɛ akũ mɔ sika ngbã fɔtsa, boe mɔ kɔya, mɔ fulitsa mɔ kɔya a. Ɛnɛɛ sika ngbã kɔɔpu kĩ eyi mɔ efĩĩ mɔ kɔwɛ̃ fɔtsa a kĩ ɛna etomɛna ye adɔpaa kabɔa kamɛ a nɛ awɛ. Ⅴ Bɛtsɛlɛ dĩ kĩ de kayɔkanyɛ bɛla bite nɛ ye nnyɛ kĩ,

Ⅵ Otsole a kĩ mmɔ́ a wuga Baguma bade a, mɔ bikĩ bidi adansiɛ nɛ Yesu katɛkado akũ sũ a babɔanɛ.

Kĩ mmɔ́ ye a, fɔkɛna yĩ wãwã paa. Ⅶ Ade ode fɔtɔ ɔnyanɛ a via yĩ kĩ, “Nde sũ fɔkɛna nɔ wãwã? Maabi nɔ kalɛ nɛ otsole a, mɔ ɔyaɛ a kĩ edeĩ fɔlɔ evũkɔnɔ mɔ tɛlɛ ewua, kĩ ye akũ edzi a fɔlɛtsa kɔlawa. Ⅷ Ɔyaɛ kpa a kĩ ɔmɔ́ a dzi nkpã tɔ̃ lɛmɛ finyaa eku. Yaanɛ eto lɛkɛ dzununuunu a kamɛ ɛyaatɛ̃ ɛnaa bɛwɔla ye. Fɔ́akɛna bati a kĩ bidzi nkpã nɛ tite akũ, kĩ bɛtátsɛlɛ be buĩ bido nɛ nkpã ovoli a kamɛ, kito anɛ kĩ bɛbɔa katinya a wãwã ntɛ bɛmɔ́ ɔyaɛ a, kitonɛkĩ ɛnyɛ oti kĩ edzi nkpã tɔ̃, finyaa ɛláa, lɛmɛ yaabuki ɛya.

Ⅸ “Fukĩĩ sĩ fɔkpa nyansã mɔ fɔtsa kayɔkanu mɔ nyansã. Fɔlɔ evũkɔnɔ a nyɛ kɔtɔbii evũkɔnɔ, awã kĩ otsole a adzi a. Ⅹ Fubuki fɔnyɛ fɔgã evũkɔnɔ, kĩ foe elo tɔ kɔkɔɛ, lɔmɔa anya akũ finyaa, ade de nkaɛ a táya tɔ̃. Ntɛ lɛya ni, kɛnɛ kĩ lɛnya akũ lɔkɔ lukũ odi. Ⅺ Ɔyaɛ kpa a kĩ edzi tɔ̃, lɛmɛ ebuki ɛláa a nyɛ lɛgã lɛlɛ̃de, kĩ lɛnyɛ fɔgã evũkɔnɔ a kamɛ ɔmɔa kĩ laanaa bɛwɔla de.

Ⅻ “Tɛlɛ ewua a kĩ ɔmɔ́ a nyɛ fɔgã ewua kĩ bɛtádo tɔ̃ fɔgã kanya awɛ, lɛmɛ bɛkpa be kɔbɛ̃ kĩ baanya fɔgã dɔũhuilɛ mɔa mɔ ɔyaɛ kpa a. ⅩⅢ Fɔgã ewua kĩĩ flee deĩ botaɛ mɔapɛ, ade baakɔa be kɔbɛ̃ mɔ otumi bɛkpa ɔyaɛ kpa a. ⅩⅣ Baanɔ kawũ mɔ Kavelibi a, lɛmɛ Kavelibi a aanya be akũ, kitonɛkĩ ye nyɛ balate flee Ɔlate, fɔgã flee Lɛgã. Bɛmɔ ye bade a kĩ ɛvɛ, ɛpau, mɔ bikĩ bitomɔ ye nɛ ɔnɔkɔali kamɛ a, aanya akũ mɔ ye.”

ⅩⅤ Ode fɔtɔ ɔnyanɛ a buki ebi yĩ kĩ, “Mui a kĩ ɔmɔ́ kĩ ɔdɔpaani a dzi nɛ be akũ a nyɛ ɔmaĩ nyɛ ɔmaĩ, fude nyɛ fude, batidziwa flee mɔ tide ahɔlɔ ahɔlɔ. ⅩⅥ Tɛlɛ ewua a kĩ ɔmɔ́ a mɔ ɔyaɛ kpa a aakesĩ ɔdɔpaani a. Baatɛ lɛtsa nyɛ lɛtsa nɛ ye awɛ bɛfɔ̃ edzi ɔdzɔ. Baaba ye sɛkɛna bido ye fi evio. ⅩⅦ Kitonɛkĩ Baguma lɛkɔa foe edo nɛ be tɔwɔlɛ kamɛ kĩ bɛkɛna nɛ nhiɛhiɛ a kĩ ɛkɛna eyi a akũ, fɔfɔ̃ bɛkɛna ɔmɔa bɛkɔa be kɔbɛ̃ bɛkpa ɔyaɛ kpa a ɛnya akũ, kɛnaawo lɔkɔ a kĩ Baguma fɔlɛtsa a ya nɛ foe kamɛ.

ⅩⅧ “Otsole a kĩ ɔmɔ́ a nyɛ ɔmatɔ kpale a kĩ yanya tite akũ fɔgã akũ a.”