1 Kanan Hosea nadah ibbanan iIsrael di “Dakayun ibbak an iIsrael, ibangngad yun mangun-unud nah AP-APU an Dios yu ta hiya ya abuy dayawon yu. Hay liwat yuy gimmapuh nadadagan yu. 2 Ibangngad yun mangun-unud ke hiya ne kanan yuh dasal yuy ‘AP-APU, pakawanam anhan di liwat mi. Ya abuluton dakami bo anhan ta dayawon dakan hidiyey kinali mi. 3 Adi kabaelan di tindalun di Assyrian mangihwang ke dakami! Kinali adimi pundinolan dida. Ya adi kami mundinol nadah kabayun miusal hi gubat. Ya adi kami mo mumbagah baddang nadah dios an kinapya min kanan miy dios mi. Te abuna ka an APU DIOS miy hummok nadah mahmok an tatagum.’ ”

4 Kanan APU DIOS mipanggep nadah iIsrael di “Ahik ibangngad nadan tataguk ke ha-on. Takon di nalgonalgom di numpaeyan da ot eda mundayaw hi udum an dios ya bangngadok didat pakappinhodok bo didan adik mo bobboh-olan dida. 5 Ahiyak umat nah udan an mananum nah lutan makamagga. Ta dida an tataguk ya mialig da nah makakkaphod an palawer. Ya umat da nah kaiw an sedar ad Lebanon an ipae nad dallom di lutay lamut na 6 ya himmahappang. Ahi makakkaphod di ang-ang nan umat nah kaiw an oliban makalluwab. Ya makaphod dan umat da nadah makabbanglun sedar ad Lebanon. 7 Ahida mo uppe bo pun-amlongan di pumpaptok kun dida, umat nah tagun maan-anlan munhidhiddum nah ongal an kaiw. Ahida bo umat nah pinumhod an inliyak an dakol di maani. Ya umat da nah makabbungan grapes. Ta mundingngol dan umat da nah makaphod an mainum ad Lebanon. 8 Dakayun tataguk an iIsrael, daan mo anhan ta iwalong yu nadan dios an kinapyan di tagu! Ha-oy an DIOS di manumang hi dasal yu ya ipaptok dakayun ha-on. Mialigak nah makahappang ya makabbungan kaiw te ha-oy ya abuy kalpuwan am-in di kiphodan yu.”

9 Deket nanomnoman kayu ya nalaing kayu ya maawatan yu datuwen intudok ku ta iha-ad yuh nomnom yu ta datuwey aton yu. Niptok am-in di pangat APU DIOS. Hanadan maphod an tataguy mangun-unud nadah tuguna, mu nadan mangohen tatagu ya adida hangudon datuwen ituguna, ta hidiye nan makastigu da.