1 Yaka wekiwandiki ikana꞉ma꞉ hokeeki na pulu peleme tupa꞉ I̱ma꞉ doeki iki pa꞉ta꞉ laasome. Pate ma꞉nda꞉ epima꞉ hokeeki pia꞉ka꞉na꞉ta꞉ kota꞉ nika꞉ hau peaaso hata꞉ Apa꞉ pa꞉ta꞉ honke lawaasa꞉ some ma꞉nda꞉ hala꞉me. Ipikita꞉ tikitiki piki some Yesu Ketiso hala꞉me. 2 Kutupa Ketisota꞉ nika꞉ hoke hau paeyawala꞉ ekina꞉ tekee. Nika꞉ hoke hau homeke dia꞉ya꞉la꞉pate pa paeyao sikina꞉ hoke hau make loa꞉me.

3 Kutupa nikana꞉ma꞉ Koda꞉na꞉ pi ula꞉ ekimanu opua puma꞉ka꞉na꞉ta꞉ kota꞉ ipiki handoloma꞉me laa nika꞉ hone uluma꞉me. 4 Pate ma꞉nda꞉ma꞉ alo hata꞉ alota꞉ I̱ma꞉ta꞉ ipiki handolota alo kone ipika꞉ pi ula꞉ ekimanu na opua pia꞉ka꞉na꞉ta꞉ kota꞉ kutu pita꞉la꞉ someta꞉ yayapiki pi ala꞉ some make mo ota꞉ pi ala꞉ ekita꞉ ipiki pa꞉ta꞉ na ula꞉me. 5 Pate ma꞉nda꞉ epima꞉ Koda꞉na꞉ pi opua pua꞉tiki pita꞉la꞉ someta꞉ kota꞉ ipiki Koda꞉ pa꞉ta꞉ puki hala꞉la꞉ ekita꞉ ota꞉ anekema꞉ handaa ula꞉me. Nikita꞉ Koda꞉ ame̱le̱ ta꞉ma꞉ni poloma꞉me laa hone uluekema꞉ pea꞉pekeeki dupa. 6 Ma꞉nda꞉ epima꞉ Koda꞉ yaapo ta꞉ma꞉ni pea halome lea꞉ka꞉na꞉ta꞉ kota꞉ ipikita꞉ mo Yesu Ketisoma꞉ pieke tupa꞉ kone hao pelia꞉peke ya꞉la꞉me.

7 Yaka pukipiki yankeke tonuo. Iki pa꞉ta꞉ I̱ma꞉ do laaso pi ula꞉ ekita꞉ panakeeki dia꞉me. Mo kini pitolo hata꞉ hande amba꞉ wia haeme pi ula꞉eki konee. Koto amba꞉ pi ula꞉ ekita꞉ ika꞉ amba꞉ hande opeleme ekimanue. 8 Koto pa꞉la꞉pate I̱ma꞉ ame do laaso pi ula꞉ ekita꞉ panakeekie. Pa ekipeke ipika꞉ ota꞉ ekita꞉ Ketiso pa꞉ta꞉ make iki pa꞉ta꞉ make handoloma꞉me. Kota꞉ mo timba꞉ ala꞉ ekita꞉ amba꞉ lombei pita꞉la꞉me. Kutupa mo ota꞉ pa̱a̱ pa꞉la꞉ ekita꞉ amba꞉ pa̱a̱ pita꞉la꞉me.

9 Ma꞉nda꞉ epima꞉ ipikita꞉ mo pa̱a̱ pa꞉la꞉eki pa꞉ta꞉ halome alo kone ipika꞉ kame honditi pia꞉ka꞉na꞉ta꞉ kota꞉ ipikita꞉ ame do make timba꞉ leke pa꞉ta꞉ ha pelia hala꞉me. 10 Pate manda꞉ epima꞉ ipika꞉ kame pa꞉ta꞉ pukima꞉ homea꞉ka꞉na꞉ta꞉ kota꞉ ipikita꞉ mo pa̱a̱ pa꞉la꞉eki pa꞉ta꞉ hala꞉me. Koto ekina꞉ ipiki pa꞉ta꞉ta꞉ hoke hau pu tialo pa꞉la꞉ ekita꞉ ota꞉ ma꞉nda꞉ na ula꞉me. 11 Pate ma꞉nda꞉ epima꞉ ipika꞉ yankeke honditi pia꞉ka꞉na꞉ta꞉ ipikita꞉ timba꞉ leke pa꞉ta꞉ hala꞉me. Ipikita꞉ koto pa꞉ta꞉ pominolo hata꞉ timba꞉ la꞉la꞉ ekima꞉ leke holu peala꞉ ekiyalo hata꞉ta꞉ ipika꞉ pula꞉ pota꞉ta꞉ hone na ula꞉me.

12  Yaka wekiwandikio. Mo Ketisona꞉ bikina꞉ ika꞉ hoke hauta꞉ amba꞉ paeyawala꞉ ekina꞉ I̱ma꞉ iki pa꞉ta꞉ do pi laasome. 13 Yaka apa꞉titio. Iki pa꞉ta꞉ do pi laaso ekita꞉ pa mo ota꞉ titina꞉ kini pea a꞉pa pa hao hala꞉ someta꞉ ikana꞉ma꞉ hone wilimi ekina꞉ loa꞉me. Panake haliweki iki pa꞉ta꞉ do pi laasome. Paa ekipeke ikana꞉ma꞉ta꞉ mo Hoke Temoko bepolaleme ekina꞉ loa꞉me.

14 Yaka wekiwandikio. Iki pa꞉ta꞉ do pi laaso ekita꞉ ikana꞉ma꞉ Apa꞉ Koda꞉ handa hone wilimi ekina꞉ loa꞉me. Yaka apa꞉titio. Iki pa꞉ta꞉ do pi laaso ekita꞉ pa mo ota꞉ titina꞉ kini pea a꞉pa paa hao hala꞉ someta꞉ ikana꞉ma꞉ hone wilimi ekina꞉ loa꞉me. Panake haliweki iki pa꞉ta꞉ do pi laaso ekita꞉ pa mo Koda꞉na꞉ pi iki pa꞉ta꞉ e pokolo haena꞉ iki honkopu hasememe. Kutupa ikana꞉ma꞉ta꞉ mo Hoke Temoko bepolaleme ekina꞉ loa꞉me.

15 Do kenkena꞉ hau o do kenkena꞉ ula꞉ alemanu pa꞉ta꞉ pukima꞉ na homa꞉peke. Ikana꞉ma꞉ do kenkena꞉ ula꞉ alemanu pa꞉ta꞉ pukima꞉ homemeka꞉na꞉ta꞉ kota꞉ Koda꞉ pa꞉ta꞉ pukima꞉ na homelememe. 16 Do kenkena꞉ ula꞉ ala꞉ta꞉ ala꞉ta꞉ paeyaota꞉ pa mo lopa hala꞉ lokena꞉ hone pa꞉la꞉ ekimanu make wanda꞉halina꞉ lekema꞉ handolo pukima꞉ homa꞉la꞉ hau make wanda꞉halima꞉ ta꞉na꞉ma꞉ homaa biki tieke wiaasa꞉ alemanu make koto ale paeyao siki homeke a꞉nda꞉ Apa꞉ pa꞉ta꞉ na a꞉pa꞉la꞉me. Koto hau paeyaona꞉ teketa꞉ do kenkena꞉ ekie. 17 Kutupa do kenke make do kenkena꞉ ula꞉ wanda꞉halina꞉ hone pa꞉la꞉ alemanu paeyao make koto alemanu paeyao sikita꞉ paeta꞉la꞉me. Pate ma꞉nda꞉ epima꞉ Koda꞉na꞉ hone pa꞉la꞉eki peaasa꞉ someta꞉ hoto paeyao da꞉ta hao halieke.

18 Yaka wekiwandikio. Paetolo nateta꞉ teke pa꞉ta꞉e. Mo Ketisona꞉ a꞉nda꞉ tunkiliki hali ipilieke laata꞉ iki pa꞉ta꞉ amba꞉ ta opuaeya꞉ handa꞉e. Koto ekina꞉ ameta꞉ mo Ketisona꞉ a꞉nda꞉ tunkiliki tapake wopu amba꞉ opolo epelememe. Koto ekina꞉ ameta꞉ paetolo nateta꞉ teke pa꞉ta꞉ ya꞉ka꞉ta꞉me laa nika꞉ hone uluma꞉me. 19 Koto wanda꞉halita꞉ ota꞉ nika꞉ homhomeke hone wia mombololoma꞉eki tukiki pa꞉ta꞉ epea꞉pate pa na apa꞉taememe. Koto ekina꞉ ikana꞉ma꞉ niki mina꞉pa꞉lalememe. Iki a꞉nda꞉ nika꞉ mombololoma꞉eki pa꞉ta꞉ apa꞉taemekena꞉ yoluta꞉ kota꞉ niki ame̱le̱ mandakena꞉ halo pimime. Pate ika꞉ pa mina꞉pa꞉laemeketa꞉ ota꞉ ma꞉nda꞉ hondo niki ame̱le̱ na apa꞉talemeeki peneme yaasememe.

20 Kutu pimipate pa ya wekiwandikio. Ikita꞉ mo hande Ketisoma꞉ kua꞉neala꞉ Holi Sipitidi amba꞉ koto miniki halememe. Koto ekina꞉ iki paeyaoma꞉ta꞉ mo ota꞉ ekita꞉ hone wilimime. 21 I̱ma꞉ iki pa꞉ta꞉ tameiya꞉ laaso ekita꞉ pa ikana꞉ma꞉ mo ota꞉eki hone na wilimiki yeke dia꞉ya꞉la꞉pate pa mo hone wilimiki handa pueme. Kutupa make mo yayapikieki ma꞉nda꞉ta꞉ mo ota꞉eki pa꞉ta꞉ na ipula꞉me laata꞉ hone ika꞉ wilimiki pua꞉me.

22 Koto ekina꞉ mo yayapiki pi ala꞉ someta꞉ epi ya꞉ka꞉ta꞉pe. Pa ma꞉nda꞉ epima꞉ Yesuta꞉ mo Ketiso dia꞉me ala꞉ some lataa. Dupiki someta꞉ Ketisona꞉ a꞉nda꞉ tunkiliki somee. Ipikana꞉ma꞉ta꞉ Ateke make Eiyeke make hoki wala꞉la꞉me. 23 Ma꞉nda꞉ epima꞉ a꞉nda꞉ mo Eiyeke hoki walea꞉ka꞉na꞉ta꞉ kota꞉ Ateke make hoki wala꞉la꞉me. Ma꞉nda꞉ epima꞉ Eiyeke a꞉nda꞉ pukima꞉ homea꞉ka꞉na꞉ta꞉ kota꞉ Ateke make pukima꞉ homa꞉la꞉me.

24 Koto ekina꞉ hone wopu witolo hata꞉ mo hande titina꞉ kini pitolo hata꞉ opimi pi ika꞉ puki pa꞉ta꞉ mondu hapa꞉peke. Ikana꞉ma꞉ a꞉nda꞉ koto opimi pi pa u haemeka꞉na꞉ta꞉ kota꞉ ikita꞉ mo Eiyeke pita꞉ ipika꞉ Ateke yaapo ame̱le̱ hoto paeyao ta꞉ma꞉ni pea halimikie. 25 Kotota꞉ mo hande Ketisoma꞉ niki pa꞉ta꞉ kulueke laa pi la꞉ wia꞉ ekita꞉ Da꞉ta꞉la꞉eki lataa.

26 I̱ma꞉ta꞉ do laaso ekita꞉ mo iki makealuekema꞉ taapeleme wanda꞉halina꞉eki iki pa꞉ta꞉ do laaso handa꞉e. 27 Koto pa꞉la꞉pate iki pa꞉ta꞉ta꞉ Ketisoma꞉ ipika꞉ Sipitidi amba꞉ ka꞉la꞉me. Koto ekina꞉ ipika꞉ Sipitidi iki pa꞉ta꞉ a꞉nda꞉ pita꞉ pelia haena꞉ta꞉ iki wala꞉peke some ma꞉nda꞉ta꞉ weiya꞉peke na ya꞉la꞉me. Pa ekipeke mo Sipitidima꞉ta꞉ iki pa꞉ta꞉ hau paeyao walieke. Kutupa ipikana꞉ma꞉ wala꞉la꞉ ekita꞉ yayapikieki dia꞉ya꞉la꞉pate ota꞉ekie. Koto ekina꞉ kota꞉ mo Sipitidima꞉ wala꞉la꞉eki opua pitolo hata꞉ make Ketiso pa꞉ta꞉ ta꞉ma꞉ni pu pelia hapeke ya꞉la꞉me.

28 Ota꞉e. Yaka wekiwandikio. Ipiki yaapo ta꞉ma꞉ni pea hapee. Pa ekipeke ipiki opolo epea꞉ka꞉na꞉ta꞉ nikita꞉ honkopu haasa꞉ ekima꞉ tumbulu pa꞉la꞉ tupa꞉ loa꞉me. Kutupa koto mo ipilia꞉ natena꞉ta꞉ ipiki handolo hata꞉ yaala꞉ma꞉ na homolo polome tupa꞉ loa꞉me. 29 Ketisota꞉ tikitiki pa꞉la꞉me laata꞉ ika꞉ hone wilimime. Kota꞉ ma꞉nda꞉ epi ameda tikitiki piki hau pu haya꞉ka꞉na꞉ta꞉ Koda꞉na꞉ wekiwandikie laata꞉ ika꞉ hone witolo pelememe.