84
Mbouŋ to yes to tilaagh ndug mala ve tinim Yerusalem pa suŋuuŋ tiina
Mbouŋ to yes Kora
1 O Yoova, yom ariaŋam kat ve uŋgin mbeb tisob.
You lolog pa rumai tiom kat. Nene poiawaat kat, ve inim inam to nepooŋ. Mbo 27:4
2 You nakausim naghaze le naneep ila sirsiir to rumai tiom lolo, ghoro poia.
Maaron, yom uneep matam iyaryaar irau sawa isob.
Tovenen lolog ve ŋgar tiou isob iŋaŋarua ghom, ve lolog poia kat, ve namboumbou payom. Mbo 42:1+, 63:1
3 Yoova, yom ariaŋam kat, ve uŋgin mbeb tisob.
Yom kinik tiou ve Maaron tiou.
Man to tineep ila sirsiir to rumai tiom lolo, lolodi poia kat.
Ve man gegegeu tireirei rumadi ila rumai tiom lolo, leso tineep tigharau artaal tiom, ve tipoop ndinatudi tonowe.
4 Yes to tinepneep ila rumai tiom lolo, poia tiom izaza todi, ve lolodi poia kat.
Tauto timboumbou, ve tipapait ghom.
5 Yes to tighamgham tapiridi ilat tiom, poia tiom izaza todi, ve lolodi poia kat.
Lolodi iyaryaaŋ tighaze le titaghon ataam to ila pa lolooz Zion, leso tisuŋ payom tonowe. Hib 11:13+
6 Sawa to tilaagh ila taan raapa to le ya maau, ya katindi bokbokia ila taan lolo ve tizaza.
Maaron igham uman izi pa taan tonowen, tauto ya ipot irau ndug.
7 Tovenen tamtoghon toni tapiridi ivotvot, ve tilaghlaagh titaghon ataam, le tila tivot Maaron nagho izi lolooz Zion.
8 O Yoova, yom Maaron ariaŋam kat, ve uŋgin mbeb tisob. Ulooŋ suŋuuŋ tiou tonene.
Maaron to Yakop, ughur taliŋam payou.
9 Maaron, suŋuuŋ tiei iŋarua ghom pa kinik tiei to yom taum usia.
Matam pani, ve ughur poia tiom iza toni.
Pasa, ye to inim sigeu payei.
10 Ighaze you naneep ila sirsiir to rumai tiom lolo pa ndag ee moghon kat,
nene igham ghou lolog poia ilib pa sawa ndiŋndiŋ ndiŋndiŋ to naneep izi ndug pida.
You lolog pa naneep toman ndiran samsamia ila ruum todi maau.
You naghaze le naneep ataam avo to Maaron tiou rumai toni, ghoro poia.
11 Maaron toit Yoova, ghazooŋa toni isul ghiit inimale ndag, ve ye inim sigeu pait.
Ye ighamgham poian ghiit, ve igham izaad ivot inim tiina.
Yes to laghooŋ todi deŋia ila mata, ye irau iŋguruut mbeb poia eta padi maau. Mbo 34:10
12 O Yoova, yom ariaŋam kat ve uŋgin mbeb tisob.
Yes to tinumeer ghom, poia tiom izaza todi, ve lolodi poia kat. Mbo 2:12