64
Tamtoghon eez ighason Maaron pa ipoona pa koia
Mbouŋ to David
1 O Maaron, you nataŋ roran ghom naghaze uul ghou.
Ulooŋ taŋiiz tiou tonene, ve upoon ghou pa koiagŋa.
Pasa, yes tigham ghou namatughez kat.
2 Ndiran samsamia tilup di, ve tikalkaal ataam pa tiwaghamun ghou.
Upaghau ghou padi: Pa vene, tiwaghamun ghou.
3 Saveeŋ to tipiyaava payou ne, poia maau.
Yamadi, nene inimale buza to tipoti le mata kat.
Saveeŋ to tiŋgalŋgali payou ne, inimale pane natu to tipeli pa mbeb lili.
4 Yes tiyoŋyooŋ, ve tisasaŋan yes to ledi sosor maau.
Ve sawa to tila tivot, ghoro rikia ve tivaneg di.
Pasa, yes timatughez pa mbeb eta maau.
5 Yes tipapazaagh taudi pa ghamuuŋ ŋgar samia.
Ve tiwasavon di pa sa ndug to pale tiŋgooz liis todi pani, leso tisavag tamtoghon.
Ve tisaav tighaze: “Ŋgar to taghaze taghami, sei pale iwatagi?”
6 Yes tikaal ataam pa ŋgar samia to tighaze tighami, ve tipait taudi tighaze: “Yei niraua kat pa ŋgar. Tovenen ŋgar to nighaze nighami, nene pale ighur.”
Oyai, iit tamtoghon, taŋgooz ŋgar samsamia naol ila lolood!
7 Eemoghon Maaron pale ivaneg di pa pane natu toni.
Pale rikia moghon ve iwaghamun di.
8 Saveeŋ samsamia to ivotvot ila avodi, nene pale imuul pa taudi ve iwaghamun di.
Ŋgar to Maaron ighaze igham padi, tamtoghon pale tighita, ve tililiit dabadi ve tiveleg di.
9 Ŋgar to Maaron igham padi, nene pale igham tamtoghon tisob timatughez, ve tigham ŋgar tiina pani, ve tisavia varu.
10 Tovenen ndiran deŋiadi pale lolodi poia pa Yoova, ve tiyooŋ ila toni.
Yes to ŋgar deŋia ineep tuŋia ila lolodi, pale tinidi iza, ve tipaiti.