31
Suŋuuŋ to tamtoghon to inumeer Maaron, ve ighur tau ila Maaron nima
Mbouŋ to David
1 O Yoova, you nanumeer ghom ve nayooŋ ilat tiom.
Upul koiagŋa titatan ghou malep.
Pa vene, tigham ghou mayag. Ŋgar tiom deŋia. Tovenen ugham mulin ghou.
2 Ughur taliŋam pa suŋuuŋ tiou, ve rikia uul ghou!
Yom Volaaŋa tiou ariaŋa. Yom uponpoon ghou unumale raŋ to izala kat.
Ve unum ruum ariaŋa pa nayooŋ ila lolo. Leso mbeb eta iwaghamun ghou sob, ve naneep pooi.
3 Onoon kat. Yom Volaaŋa tiou ariaŋa. Yom uponpoon ghou unumale raŋ to izala kat. Ve unum ruum ariaŋa pa nayooŋ ila lolo.
Umuuŋ payou ve upatooŋ ataam payou, leso upaghazoŋan izam tiina ivot ighazooŋ.
4 Ughita liis to koiagŋa tighuri payou, ve upaghau ghou pani. Pasa, yom to unum inag to yoŋgaaŋ.
5 Yoova, yom Maaron to utataghon saveeŋ mbuaaŋ tiom.
Aazne, you naghur taug ilat nimam.
6 You nanumeer Yoova moghon.
Tovenen yes to tighurghur mbeb soroksorok tinim maaron padi ve timbesmbees padi, you naghur koi padi.
7 You tinig iza ve lolog poia payom. Pasa, lolom ineep tuŋia ila to tamtoghon tiom ve uluul di.
Sawa to lolog ipataŋan kat, ve ateg imbumbu, yom ughita pataŋani tiou ve uul ghou.
8 Yom upul ghou nala koiagŋa nimadi maau.
Yom upas ghou navot pa pataŋani tiou, ve ughur ghou naneep pooi ila ndug ghazooŋa.
9 Yoova, you mbesooŋa tiom. Lolom isamin ghou ve uul ghou lak!
Pasa aazne, pataŋani tiina igham ghou le lolog ipataŋan.
You nataŋ tiina le matag isarsar, ve tapirig isob kat.
10 Lolog ipataŋan kat ve nayakyak irau sawa isob.
Pataŋani tonene pale iŋgoor sawa tiou inim tuku.
Igham ghou nayamaan taug naghaze tapirig isob.
You nakoŋkoŋ kat le tuag tisob timareer.
11 Koiagŋa tisob tigham ŋalalaŋ payou.
Ve yes to tineep tigharau ghou ne paam, tipamogheran di payou.
Nditag lolodi pa tinim tigharau ghou maau.
Ve yes to tighita ghou izi ataam, timatughez ve tilaagh pa ataam dige ite. Mk 14:50
12 Tamtoghon matadi iŋgal ghou muul maau. Tighita ghou nanimale namaat wa.
You nanimale uur to ivavaal, ve tipiyaava ilale.
13 You nalooŋ ival tiina tikakamuun payou.
Koiagŋa tilup di, ve tikaal ataam pa tirab ghou namaat.
Tovenen pataŋani naol tiluvut ghou, le matughezaaŋ tiina igham ghou.
14 Eemoghon Yoova, you nanumeer ghom.
Tauto nasaav payom naghaze: “Yom moghon to Maaron tiou.”
15 Sawa to naneep izi taan, sa mbeb ma ŋgar to ighaze ivot payou, you naneep ila nimam.
Upas ghou ila koiagŋa nimadi,
ve upoon ghou pa yes to tighamgham lilin ghou.
16 You mbesooŋa tiom.
Lolom poia payou, ve ugham poian ghou.
Yom lolom ineep tuŋia ila to tamtoghon tiom ve uluul di. Tovenen ugham mulin ghou pa pataŋani tonene.
17 Yoova, you nataŋ roran ghom pa ulaaŋ.
Upul koiagŋa titatan ghou malep. Pa vene, tigham ghou mayag.
Utatan ndiran samsamia tonowen tapiridi, leso mayadi.
Ve upiyaav di tizila ndug to mateeŋa, leso neneeŋadi.
18 Upoon avodi. Pasa, yes ndiran to kaarom.
Tipapait taudi, ve tiveveleg tamtoghon deŋiadi, ve tipiyaav saveeŋ samsamia naol padi.
19 O Yoova, poia tiom, nene tiina le tiina kat.
Yes to timatughez payom, ve titaghon ataam tiom, yom ughur ledi mbeb popoia naol tisasaŋan di.
Yes to tinumeer ghom, ve tiyoŋyooŋ ilat tiom, yom pale ugham poian di ila ival tiina matadi. Mbo 23:5+
20 Yom uŋgooz di tila digem.
Tovenen koiadi to tikalkaal ataam pa tirab di timaat, irau tigham mbeb eta padi maau.
Yom uŋgin di tineep pooi ila nimam samba.
Tovenen saveeŋ samsamia to koiadi tipipiyaava padi, irau iwaghamun di maau.
21 You napait Yoova pa poia toni.
Pasa, lolo ineep tuŋia inim tiou, ve igham ŋgar poia kat payou.
Sawa to koiagŋa tiluvut ghou pa tigham malmal payou, ye iuul ghou.
22 Papazogi, you namatughez naghaze Yoova indiir ghou naghau pa mata wa.
Eemoghon maau. You nataŋ rorani pa iuul ghou, ve ilooŋ taŋiiz tiou, ve igham mulin ghou pa pataŋani tiou.
23 Yam tamtoghon to Yoova to lolomim ineep tuŋia ila toni ve ataghon ataam toni, aghur lolomim pani kat.
Yes to titaghon aliŋa, ye pale iŋgin di tineep pooi.
Eemoghon yes to tipapait taudi ve tivelegi, ye pale ighur atia padi, ve iyat katin ŋgar todi tonowen.
24 Tovenen yam to anumeer Yoova ve aghurghur matamim pani, amatughez malep.
Apariaaŋ taumim, ve ayoon ariaŋa!