15
1 Na inolaṉa va mamamana si va noso binugoro,
ba sa zinama vari sigiti si variva bugoro.
2 Pa mea tanisa tie gilae si avoso lea sa tinumatumae,
ba totolo vura pa ṉuzu tanisa tie pekipeki si na zinama loke laedi.
3 Sari matana e Zihova si pa doduru vasina,
dogori Nana sari tie kaleadi meke leanadi.
4 Sa mea sapu va kamo sinalaṉa si na huda tinoa,
ba sa mea sapu sekesekei si va mate maqomaqo.
5 Na duviduvili si asa pu etulia sa tinarae tanisa tamana,
ba asa pu va egoi sari na ginegese si kote gilae.
6 Sa vetu tanisa tie toṉoto si koa ia na tinagotago ari laedi,
ba sari tinago tadi tie kaleadi si va kamo tinasuna.
7 Sari na beru tadi na tie gilae si va enea sa tinumatumae,
ba sari na bulo tadi na tie pekipeki si loketoṉa boka vari poni nia.
8 Zihova lopu qetu hokara ni sari vinukivukihi tadi tie kaleadi,
ba sa vinaravara tanisa tie ṉoṉo si qetu nia Sa.
9 Zihova kana i sari hahanana tadi tie kaleadi,
ba tataru ni Sa saripu lulia sa tinoṉoto.
10 Na zinama ṉiṉirana si kote ta vala koasa tie pu taluarae koasa tinoṉoto,
asa pu hako ta gegese si kote mate.
11 Minate meke sa popoa tadi na tie matedi si lopu paere koe Zihova,
ke sari doduru bulo tie si dogoro betoi mo Sa.
12 Na tie va karikari si lopu hiva nia sa ginegese,
lopu kote tata la i rini sari tie giligilana.
13 Pude qetuqetu sa bulo si komolo sa isumata,
ba sa bulo ta sigitina si va mate maqomaqo.
14 Sa bulo sapu dodogorae si hata tinumatumae,
ba sa ṉuzu tanisa duviduvili si henai sari zinama pekipeki.
15 Sari doduru rane tadi pu malaṉa si voriti pude boka,
ba sa bulo sapu qetuqetu si inevaṉa lamo.
16 Leana be tago vasina hite pa korapa pinamaṉana e Zihova,
hola nia sa tinagotago sapu koa ia kinolura.
17 Leana sa hena neka pa vasina koa ia tataru,
hola nia sa inevaṉa bulumakao pa korapa vinari kanai.
18 Na tie bubugoro haru si va gevugevuru vinari zamai,
ba sa tie nosona si va bule vinari tokei.
19 Sa siraṉa tanisa tie hakohako si tukua na hiqohiqo rakihi,
ba sa tie ṉoṉo si ene pa siraṉa kalalasana.
20 Na koburu gilaena si na qinetuqetu tanisa tamana,
ba sa tie pekipeki si hakohako nia sa tinana.
21 Na pinekipeki si na qinetuqetu tanisa tie pu lopu tumae balabala,
ba sa tie gilagilana si kopu nia sa siraṉa toṉotona,
22 Sari hiniva si lopu gorevura sina loke vinari tokae pa binalabala,
ba pana soku tie si roverove vari tokae si kote leana mo.
23 Leana pa tie sa olaṉa va gotogoto,
na arilaena sa zinama sapu goto pa nana totoso.
24 Sa siraṉa enea sa tie gilae si sage la pa tinoa,
pude kopu nia meke lopu gore la pa lovu si asa.
25 E Zihova huara gore nia sa vetu tanisa tie vahesi pule nia,
ba kopu nia Sa sa voloso tanisa nabonaboko.
26 E Zihova kana hola i sari binalabala tadi tie kaleadi,
ba sarini pu via bulodi si qetu ni Sa.
27 Na tie puhi si va kamo tinasuna koari nana tatamana,
ba asa pu kana ia sa tabara golomo si kote toa.
28 Sa bulona sa tie toṉoto si hoke balabala paki meke tiqe olaṉa,
ba sa meana sa tie kaleana si totolo vura ia na zinama hoboro.
29 E Zihova si seu hola koari tie kaleadi,
ba avosi Sa sari vinaravara tadi tie leadi.
30 Na dinoṉo sapu komokomolo si na qinetu pa bulo,
meke na inavoso leana si masiqara nia sa tini.
31 Asa pu va avoso koasa ginegese sapu variva toa,
si kote koa turaṉi sari na tie gilae.
32 Asa pu korona tava toṉoto si kilua sa nana tinoa,
ba asa pu va tabei sari na ginegese si vagi ginilagilana.
33 Sa pinamaṉana e Zihova si va tumatumae nia sa ginilagilana lohina koasa tie,
meke na vina pepekae si kekenu, mumudi sa vina lavata.