2
1 Zama la guahe koari tasimu koreo, ‘Qua tinoni,’ meke koari tasimu vineki, ‘Sarini pu tataru ni Rau.’ ”
Izireli si gua sa Barikaleqe sapu Luara Palabatuna
2 Zama se Zihova koa sa butubutu Izireli, “Gegesia sa tinamia, uve gegesia,
ura lopu Qua barikaleqe si asa,
meke Arau si lopu nana palabatu.
Tozi nia pude va via pania pa isumatana sa dinoṉo barabarata
meke pa varikorapadi ri susuna sa, sa ene hoboro.
3 Pude lopu gua si kote la Arau meke va dodore ia
meke va dodoho ia, gugua pa rane sapu podo si asa;
kote tavete guni nia Arau sa popoa Izireli gua na qega,
va iliri la nia pa keke pepeso popana,
pude madi mate pa memeha.
4 Lopu kote vata dogoro nia Arau sa Qua tataru koari nana koburu,
sina na koburu pododi pa binarabarata.
5 Sa tinadia si ene hoboro
meke podo i sa pa hahanana variva kurekuredi.
Zama si asa, ‘Kote luli la i rau sari qua babaere,
arini pu poni au sa gequ ginani meke kolo,
qua poko vulu, qua lineni, qua oela, meke qua napo.’
6 Gua ke kote hukata nia hilibubuku Rau sa nana siraṉa;
kote bara vari likohae nia rau pude lopu gilania sa pae kote ene gua.
7 Kote hadu luli sa sari nana babaere ba lopu boka kamoi;
kote hata i sa ba lopu dogori.
Meke kote zama si asa,
‘Kote pule la qua koasa qua palabatu kekenuna,
ura leanaqu tu totosona asa hola nia sapu kamahire.’
8 Na lopu hite tumae nia sa sapu Arau mo sapu asa
sapu ponia huiti, vaeni vaqura, meke oela,
sapu poni va soku nia siliva na qolo
sapu tavetavete ni arini pa vinahesi Beolo.
9 Gua ke kote vagi pania Rau sa Qua huiti pana sagana sa,
meke Qua vaeni vaqura pana bogisi sa meke nama pude napoa.
Kote vagi pule nia Rau sa Qua poko vulu meke lineni,
sapu pokopoko ni sa pude lopu dodore.
10 Ke kamahire kote vata dogoro nia Rau sa tini dodohona tanisa pa mata dia ri nana babaere;
loke tie kote vagi pania si asa pa Limaqu Rau.
11 Kote va noso pani Rau sari doduru nana inevaṉa;
sari nana ṉati inevaṉa varigara nomadi,
gua tugo sari nana Sidara Vaqura, na Rane Sabati.
12 Kote huari Rau sari nana huda vaeni meke nana huda piqi,
sapu ari nana babaere tabarani koa sa, guni ni sa;
kote va hiqohiqo pani Rau,
na kurukuru pinomo mo kote gani i.
13 Kote va lipulipu ia Rau si asa koari na rane
sapu hoke va uququ va humaṉa lea la koe Beolo si asa;
koari na rane sapu va sari pule nia si asa koari na vikulu na patu ṉedala,
meke hata luli sa sari nana babaere,
ba Arau si muliṉi Nau sa,”
zama vura gua se Zihova.
Sa Tataru te Zihova La koari Nana Tinoni
14 “Gua ke kote la Arau meke hatihati vura nia;
kote turaṉa la nia Rau si asa pa qega
meke kote zama va lomolomoso ia.
15 Vasina kote vala pule ni Arau sari nana inuma vaeni,
meke sa Lolomo pa Akora* Sa ginuana sa Lolomo Akora si na Lolomo Tinasuna. Mi tiro la pa Zosua 7:24. si kote guni nia Rau na sasada la pa tinoa leana.
Vasina si kote kera si asa gugua koari na rane totoso vaqurana sa,
gugua koari na rane sapu vura taloa si asa pa Izipi.* Zos 7:24-26
16 Zama vura si Arau Zihova, pa rane asa,
kote poza Nau goi na ‘qua palabatu’;
lopu kote poza pule Nau ‘qua Beolo* Sa ginuana Beolo si Baṉara.’ agoi.
17 Kote va rizu pani Rau pa beruna sari pozana e Beolo;
lopu kaqu ta poza pule sari pozapoza arini.
18 Koasa rane asa si kote tavetia Rau si keke vinariva egoi tadirini
koari na kurukuru pinomo pa pezara meke sari kurukuru pa galegalearane
meke sari na kurukuru pu gotolo pa pepeso.
Na bokala meke na vedara meke na vinaripera
si kote va noso ia Rau koasa popoa,
pude doduru si kote koa pa binule.
19 Kote haba igo Rau pude na Qua ninae rane ka rane;
kote haba igo Rau pa tinoṉoto meke pa ṉinoṉo,
pa tataru loke kokoina meke pa tataru variharupi.
20 Kote haba igo Rau meke lopu kote luara pani pule Au goi,
meke kote tumae nia goi sapu Arau se Zihova.
21 Kote olaṉi Rau sari na vinaravara meke tozia sa galegalearane pude ruku,
kote ruku sari na lei meke va bobosia sa popoa pepeso;
22 meke sa popoa pepeso si kote va toqolia sa huiti,
na vaeni vaqura meke sa oela koa sa popoa Zezireli* Sa ginuana Zezireli si sa Tamasa si lelete..
23 Kote lete ia Rau si asa koasa popoa;* Rom 9:25; 1 Pit 2:10
kote vata dogoro nia Rau sa Qua tataru koa sa sapu Arau poza nia
‘Lopu Ta Tataruena’ koa Rau,
sapu pozani, ‘Lopu na Qua Tinoni’, kote zama si Arau,
‘Gamu si na Qua tinoni’;
meke kote zama si arini, ‘Agoi sa mami Tamasa,’ gua.”
*2:15 Sa ginuana sa Lolomo Akora si na Lolomo Tinasuna. Mi tiro la pa Zosua 7:24.
*2:16 Sa ginuana Beolo si Baṉara.
*2:22 Sa ginuana Zezireli si sa Tamasa si lelete.