1 Meke zama se Devita, “Tani sa vasina sapu kaqu koa sa Zelepade te Zihova sa Tamasa, meke gua tugo sa hope tadi pa Izireli pude vukivukihi va uququ.”

2 Ke tioko varigara ni Devita sari doduru tie karovodi pu koa somana koari na tie Izireli, meke koa rini si vizati sa si kaiqa pude na tie peqo patu meke nama ni sari na patu tana kinurina sa Zelepade. 3 Vala ni tugo sa sari kobi aeana pude tavete ni poka meke kaiqa tiṉitoṉa aeana pude tadi tukutukudi rina sasada, meke na boronizi sapu lopu boka ta gilana sa mamatadi. 4 Vala ni tugo Devita sari huda sida pu lopu boka ta nae ura na ari na tie pa Taea meke pa Saedoni na paleke va soku mae ni sari na dekuru huda sida. 5 Sina zama se Devita, “Sa Zelepade te Zihova sapu kaqu kuria sa tuqu se Solomone si kaqu tolavaena hola si asa, meke leleana hola pude ta gilana valeana koari na tie pa kasia popoa. Ba na tie vaqura si asa, meke lopu ele boka taveti sa sari na tinavete gugua arini, ke arau kaqu taveti sari na vina namanama hire.” Ke na gerigeri veko nia e Devita sa Zelepade sipu lopu ele mate si asa.

6 Meke tiokia sa se Solomone sa tuna meke tozi nia sa pude kuria sa Zelepade te Zihova sa Tamasa pa Izireli. 7 Zama se Devita koe Solomone, “Tuqu, pa buloqu koa sa hiniva pude kuria rau sa Zelepade pa vina lavatana sa pozana e Zihova, sa qua Tamasa.* 2 Samuela 7:1-16; 1 Koron 17:1-14 8 Ba tozi nau Zihova, ‘Somana pa soku vinaripera si goi meke va mate soku tie. Koa gua sapu soku ehara si ele va zolori goi gua ke lopu hiva nigo Arau pude kuria agoi sa Qua Zelepade. 9 Ba kaqu podoa goi si keke koburu koreo, meke sa koburu asa si kote na tie bule. Na binule pa vinaripera si kote ponia Arau. Ura sa pozana sa si kote e Solomone, meke kaqu ponia Arau sa binule pa Izireli pa nana totoso binaṉara. 10 Asa kaqu kuria sa Zelepade pude va lavatia sa Pozaqu. Kaqu na tuqu si asa, meke Arau si kaqu na tamana sa, meke kaqu va turua Arau sa nana binaṉara pa Izireli ninae rane ka rane.’ ”

11 Meke zama hola la se Devita, “Tuqu, kaqu koa turaṉigo e Zihova si goi, meke kaqu gorevura sa Nana vina tatara pude va boka igo pude kuria sa Zelepade te Zihova. 12 Mani poni igo e Zihova sa ginilae meke sa ginilagilana pude boka turaṉi goi sari pa Izireli pa kinopudi ri Nana tinarae. 13 Gua meke kote ta manae si goi pana kopu valeani goi sari doduru tinarae pu ele garunu ni e Zihova koe Mosese pude tadi pa Izireli. Mu koa va ṉiṉira meke varane. Mu lopu matagutu na malohoro si goi.* Zos 1:6-9 14 Ele noma hola sa vinoriti taqarau pude va namanama nia sa Zelepade te Zihova, hola nia ṉeta vuro made gogoto tina kilo qolo, meke hola nia toloṉavulu made vuro tina kilo siliva. Na boronizi meke aeana si soku hola lopu boka ta pada mamatadi, gua tugo sari na huda na patu. Ba kaqu vagi va tomo la tu si agoi. 15 Soku hola sari na mua tie tavetavete si agoi. Koadia sari na tie peqo patu, tavete biriki, meke na kamada, meke gua tugo sari na tie, pu lopu boka ta nae, pu tumatumaedi na bokabokadi pa tinavete lima 16 pa qolo, siliva, boronizi, meke na aeana. Ego podalae nia sa tinavete, mani koa turaṉigo e Zihova.”

17 Meke garuni tugo e Devita sari na koimata pa Izireli pude toka nia se Solomone. 18 Zama si asa, “Se Zihova sa mia Tamasa si koana koa gamu meke ele poni gamu Sa sa binule pa doduru vari kali mia. Va boka au Sa si arau meke va kilasi rau sari doduru tie pu koadi kekenu koasa pepeso hie, meke kamahire si koa si arini pa kinopu te Zihova meke sari Nana tinoni Izireli. 19 Ke mamu nabulu nia se Zihova, sa mia Tamasa, pa doduru bulomia na maqomaqo mia. Mi podalae kuria sa Zelepade te Zihova sa mia Tamasa, pude boka veko ia gamu pa Zelepade sa Bokese Vinariva Egoi te Zihova, meke gua tugo sari doduru likakalae tava madidi pu tavetavete ni ri na hiama koasa vinahesina sa pozana Zihova.”