1-6 Ei hataholi kamasuꞌi kala! Pasa ndiꞌidoo mala fo mamanene neulalau! Ei mbeda ela hataholi mana tao ues mbilu mbuse fee ei, nggadi nala so. Hatematak ia, sila mbuse titin nala, ala langgou lafada ei masapepeko nala. Neu ko Manetualain Manai Lain Seli ndia, pasa ndiꞌidoon neu hataholi mana tao ue-ledi sala sila, toꞌa-ta nala.✡ Tui Seluk laꞌeneu Dala Sodak 24:14-15

Ei tamasuꞌik kala ia, kada tao malole neu ei ao-ina heheli mala, ma kada masoda no namahokok. Hatematak ia, ei leo sapi maꞌao ia, fo nahehele tatin. Ei huku ma tao misa hataholi malole la, fo tala bisa lasalaꞌe lala ao nala lai ei mata mala.

Hataholi kamasuꞌi kala ei! Ei mulai mamatani makaleleu leo! Neu ko doidoso mata-mata kala, saꞌe laꞌe ei ia so. Ei hata-heto mala, sangga lakalulutuk heni sala. Ma ei baloꞌa malole mala, anadae laꞌa heni sala. Ei lilo mbila-lilo fula mala, beli ta kasa so. Ma neu ko lilo mbila-lilo fula kala sila, laꞌa lasafali ei, sama leo haꞌi naꞌa heni ai tuuk ia. Talobee, de daebafok sangga basan so, tehuu ei bei mambue makaduduluk hata-heto mana mopo kala sila? Ei hata mala neu ko dadik buti, lae, ei ta bubuluk bee ndia mabeli nai Manetualain matan!✡ Mateos 6:19

7 Tolanoo nggalei! Ei musi nggale loak mahani Lamatuak fafali main. Mete kada hataholi mana tao ue daek. Ala lahani sila dae nala buna-boa nala, no nggaleloak. Uda sososak mai, boe ma sele-nggali. Basa ndia, na, nahani uda bali, fo tao sesele kala ala moli no malole. Doo-doo boe ma, labuna-boa. Nandaa no fain boe ma ala neu ketu-kolu sesele kala buna-boa nala. 8 Ei boe oo, musi nggaleloak leondiak. Tao matetea namahehelek, huu ta dook so, te Lamatuak mai ndia so!

9 Tolanoo nggalei! Boso makanunumbuk esa no esa. Mete ma kada makanunumbuk makandoo, na, neu ko Manetualain huku o! Mete leo, huu Toulasi Mana Maketu Dedeꞌak manai lain ele, nambadeik nai ei mata mala so.

10 Tolanoo nggalei! Tungga natutuduk neme Manetualain mana kokola nala mai. Mae ala hambu totoꞌak mata-mata kala, tehuu lakatataka lakandoo. 11 Mete ma hambu hataholi nakatataka nai totoꞌak, na, ita soꞌuk hataholi ndia naden. Natutuduk leo baꞌi Ayub. Ana hambu totoꞌak mata-mata kala, tehuu nakatataka nalan. Boe ma Manetualain dalen kasian neu ndia, de Ana heti basan dadik malole neu Ayub. Manetualain tao leondiak, na huu Ndia dalen malole, ma henuk no susuek.✡ Ayub 1:21-22; 2:10; Sosoda Koa-kio kala 103:8; Yakobis 1:2-3, 12

12 Tolanoo nggalei! Dedeꞌak inahuuk nala seli, na boso masoo kala. Mete ma ei mae mataa mae, “hei”, na, kada mataa mae, “hei”. Ma mete ma ei mae mataa mae, “ta”, na, kada mataa mae, “ta”. Leondiak, na, dai ndia so! Boso mala lena-lenak no masoo kala seseik hataholi mana matek nade nala. Nakalenak bali masook “no Manetualain naden” mana masodak nai lalai. Sumba-soo mata-mata kala sila, na, sosoan ta. Boso losak Manetualain huku o, huu o sumba-soom ndia.✡ Mateos 5:34-37

13 Mete ma esa neme ei mai, hambu totoꞌak, na, malolenak ana hule-haladoi. Ma mete ma esa neme ei mai namahoko, na, malolenak ana soda koa-kio neu Lamatuak. 14 Mete ma esa neme ei mai namahedi, na, malolenak moke mala lasi salani kala fo ala lame mina neu hataholi kamahedik ndia, ma hule-haladoi minik Lamatuak naden, suek Lamatuak tao nahain.✡ Markus 6:13 15 Ma mete ma ei hule-haladoi fee hataholi kamahedik ma mamahele tebe-tebe neu Lamatuak, na, neu ko Lamatuak tao nahai hataholi ndia. Ma mete ma hataholi ndia tao salak so, na, neu ko Lamatuak koka heni ndia sala nala. 16 Mete ma hambu luma leme ei mai tao salak, na, ei musi manaku esa no esa sala nala. No leondiak, na, ei basa nggei hule-haladoi esa fee esa, fo ei dadik malole.

Hataholi fo dalen malalaok, na ndia huhule-haladoin henuk no koasa, de bisa neni buna-boa malole. 17 Haꞌi natutuduk neme baꞌi Elia mai. Ndia ndia, hataholi basa faik, leo ita boe. Tehuu faik fo ana hule-haladoi noke fo boso uda bali, boe ma uda tana mai tutik, losa teuk telu seselik.✡ 1 Mane-mane kala 17:1; 18:1 18 Basa boe ma, ana hule-haladoi seluk, noke uda mai, de uda mai. Naꞌu ma ai la, ala momodo. Ma osi la, ala fee buna-boa nala bali.✡ 1 Mane-mane kala 18:42-45

19 Tolanoo nggalei! Mete ma hambu luma nai ei, mulai tao salak, fo ana laꞌo ela hata fo ndoos, na, malolenak tolanook esa tulu-fali nalan fo ana tungga falik Lamatuak dala ndoon. 20 Masanenedak neulalau! Mete ma ei fali mala hataholi mana tao salak, fo ana fali neni Lamatuak neu, ma ta tao salak so bali, na, ei ndia tao mala hataholi ndia nasoda so, suek ana nasoda nakandoo no Lamatuak. No leondiak, na, Lamatuak koka heni ndia sala makadoto nala so.✡ Dedeꞌa Lasik 10:12; 1 Petrus 4:8

Leondiak leo!