48
Yakob noke babaꞌe-babatik fee Yusuf ana nala, Efraim ma Manase
1 Taa dook so bali, boe ma hataholi mai nafada Yusuf nae, ndia aman namahedi belak so. De ana noo ana nala dua sala, fo Manase ma Efraim, fo leu tilo sila bain Yakob. 2 Faik fo Yakob namanene Yusuf asa mai so, boe ma ana nakatataka aon fo nanggatuuk neu koi lain.
3 Boe ma, ana nafada Yusuf nae, “Ana Usu aa! Manetualain fo Ndia koasan ana seli ndia, fain Ana natudu mata-aon neu au neme nggolo Lus nai dae Kanaꞌan. Ana helu au neme ndia, 4 nae, ‘Dei fo Au tao o umbu-ana nala, boe lamanoꞌu, fo o numbu-saꞌdu mala, dadik hataholi nusak inahuuk. Dei fo Au fee nusak ia neu o numbu-sadu mala, fo dadik neu sila pusaka nala, losa daeinak babasan.’
5 Hatematak ia, o anam Efraim ma Manase ndia, sila hak leoiak: Au uni Masir, tehuu sila dua sala lai ele so. Mae leondiak boe oo, tehuu hatematak ia, au tao dua sala sama leo au ana heheling, leo Ruben ma Simeon. 6 Tehuu, mete ma o hambu anak bali, na ndia, o anam ndia leo. Au taa tao sila leo au anang. De, ela ala simbo sila pusakan, neme sila kaꞌa nala Efraim ma Manase mai leo. 7 Au tao leondiak, fo asaneꞌda o inam Rahel. Faik fo ita fali teme Mesapotamia mai, fo teni Kanaꞌan teu, tehuu inam mate bonggi lenggu neme dalak dekak no nggolo Efrata, nai dae Kanaꞌan. Faik ndia, au dale heꞌdi alan seli! Boe ma, au atoin neu dalak bifin, fo sangga neni nggolo Efrata neu.” (Nggolok ndia, hatematak ia, ala foin, nade Betlehem.)
8-10 Yakob* Susula Malalaok dedeꞌa Ibrani nae, “Israꞌel”. kokolak basa boe ma, ana botik matan, de nita Yusuf ana nala lai ndia. Ana namalasi so, ma ndia mata nala kelembuak so. Huu ndia, de ana natane Yusuf nae, “Wei! Ia, see ana nala ia?”
Boe ma, Yusuf nataa nae, “Ia ndia, ana kala fo Manetualain fee au nai Masir ia.”
Yakob ana kokolak nae, “Mete ma leondiak na, o mua sala deka-deka lo au dei, fo au hule-haladoi oke Manetualain fee sala babaꞌe-babatik.” Boe ma, Yusuf noo kakana kala sila, leu deka-deka lo Yakob, de ana holu ma idu sala. 11 Boe ma, ana kokolak no Yusuf nae, “Doo basa ia, kada au duduꞌa ae, au taa atonggo ua o so. Tehuu hatematak ia, Manetualain tao lena henin seli, losa au bei bisa ita o ana mala boe.”
12 Basa boe ma, Yusuf koꞌo heok ana nala leme Yakob† Susula Malalaok dedeꞌa Ibrani nae, “Yusuf koꞌo heok ana nala leme Yakob lunggulanggan lalaꞌdan mai.” mai, boe ma ana sendek lunggulanggan de matan losa dae, neu aman matan. 13 Basa boe ma, Yusuf foꞌa, de ana fee ana nala lambadeik deka-deka leu aman matan. Ana tao ana ulun, Manase, neu Yakob boboa konan, ma ana kaduan, Efraim, neu Yakob boboa kiin. 14 Tehuu, leꞌdoeik Yakob sangga lalaa liman, fo noke babaꞌe-babatik fee dua sala, boe ma ana lali lima konan de ana taon neu Efraim langgan, ma ana tao lima kiin neu kaꞌan Manase langgan lain. 15 Boe ma, ana hule-haladoi noke Manetualain fee babaꞌe-babatik neu Yusuf nae,
“O baꞌim Isak aman Abraham,
ma baꞌim Isak mesa kana ndia,
dua sala tungga lakandoo Manetualain hihiin.
Manetualain boe oo, nakaboi au neme au muli-solung mai losa hatematak ia.
16 Ana nakamboꞌik au neme basa soe mata-mata kala mai.‡ Susula dedeꞌa Ibrani nae, “Au oke fo Manetualain atan neme nusa soꞌdak mai, mboꞌi heni au neme basa soe mata-mata kala mai.” Tehuu, hambu hataholi malelak nae, Manetualain natudu Mata-aon, neu faik fo Ana pake ndia atan neme nusa soꞌdak, fo nakamboꞌik Yakob, neme soe mata-mata kala. Mete neu Tutui laꞌeneu Sososan 16:7; 21:17; 22:11,15.
De au boe oo, oke fo Ana fee babaꞌe-babatik neu kakana kala ia, ma sila numbu-sadu nala.
Boe ma, mete ma ala hule-haladoi neu Manetualain,
na, ala seseik nakandondoo henin baꞌi Abraham, baꞌi Isak ma au naꞌdeng.
Fo ela sila numbu-sadu nala, boe lamanoꞌu,
fo dadik hataholi nusak inahuuk, nai daebafok ia.”
17 Tehuu, faik fo nita aman ana tao ndia liman konan ndia, neu fadik Efraim langgan, boe ma ana toꞌu nala aman liman ndia, de ana lalin neu kaꞌak Manase langgan. 18 Ana nafada aman nae, “Ama aa! Boso tao leondiak, huu ndia ndia, fadik Efraim. Ndia taa uluk. Ama musi tao lima konam neu kaꞌak Manase langgan, huu ana uluk hak ndia.”
19 Tehuu aman Yakob taa nau. Boe ma, ana nae, “Ana nggo ei! Memak au bubuluk. Huu dei9 fo Manase dadik ana seli, ma ndia numbu-saꞌdu nala, boe lamanoꞌu, losa ala dadik hataholi nusa inahuuk. Tehuu faꞌdin Efraim ndia, dei fo ana seli lena heni kaꞌan. Ma ndia numbu-sadu nala, dei fo makadotok nalan seli losa ala dadik hataholi nusak noꞌuk, ma ana seli.”
20 Basa boe ma, nafada kakanak kadua kala sila, nae, “Mete ma, hataholi Israꞌel asa loke Manetualain babaꞌe-babatik neu hataholi, na, ala seseik ei dua nggei nadem boe, lae, ‘Ela leobee na, Manetualain fee o babaꞌe-babatik, sama leo Ana fee babaꞌe-babatik neu Efraim ma Manase.’ ”
No leondiak, Yakob seseik fadik Efraim naden, nakahuluk neme kaan Manase naden mai.
21 Basa boe ma, Yakob nafada Yusuf, nae, “Ana nggo ei! Taa dook so huu au mate. Tehuu dei fo Manetualain fali nala ei, boe ma Ana noo falik ei, mini ei bei-baꞌi mala nusan neu. 22 Tehuu hatematak ia, au fee o, lena heni au fee o kaꞌa-faꞌdi mala. Huu au fee akadaik o letek manai Kanaꞌan, fo makahulun au haꞌi alan neme hataholi Amori la mai, neu faik fo au atati ua sala.”
*48:8-10 Susula Malalaok dedeꞌa Ibrani nae, “Israꞌel”.
†48:12 Susula Malalaok dedeꞌa Ibrani nae, “Yusuf koꞌo heok ana nala leme Yakob lunggulanggan lalaꞌdan mai.”
‡48:16 Susula dedeꞌa Ibrani nae, “Au oke fo Manetualain atan neme nusa soꞌdak mai, mboꞌi heni au neme basa soe mata-mata kala mai.” Tehuu, hambu hataholi malelak nae, Manetualain natudu Mata-aon, neu faik fo Ana pake ndia atan neme nusa soꞌdak, fo nakamboꞌik Yakob, neme soe mata-mata kala. Mete neu Tutui laꞌeneu Sososan 16:7; 21:17; 22:11,15.