11
Longrasien onen me-Isrel keil sehen voiteh keke Ahi voutut meatin vasi keil
1 Navis ris kami navit, “?Mukave, anatin keke Ahi sesein meatin kati keil onen?” !Vuo, romukteinek! Veni inau varei navi koan Isrel, nakistal en ara onen Ebraham, ka naka en mari vatiamal onen Bensamin. ✡ Plp 3:5 2 Ahi roseseintei meatin kati keil onen koa kei lei kilea en avong telamu keke hetie lat keil avahi onen. Kami mikilea asa koa Ilaetsa viteni en Tus Votut navong sel kutut kat me-Isrel keil min Ahi vit, ✡ 1Saml 12:22; Sam 94:14 3 “O Iahova, keil amu vinvini provet keil vasi onom ka amu lin ahor ten sanien votut keil onom. !Inau sasok namoul, ka keil avit avouas inau mun mamat!” 1 King 19:10 4 ?Ka asa suk Ahi vit kesi mini? Kei vit, “Inau nakur koe meatin keil taosen oulu (7000) amoul veah koa arvatei netan min ahi Baal.” 1 King 19:18 5 Ka en vati sise enek, en avong kosa, Ahi rie lat meatin tei keil amules amusil more envatien onen keke avousil kati. ✡ Rom 9:27 6 Anatin, Ahi rie lat meatin keil onen musil more envatien onen, ka romusiltei asa koa amumoni. Veni munak Ahi rie lat meatin keil avahi onen musil asa koa amumoni, hermumontei mun housil more envatien onen. ✡ Kal 3:18
7 Sakini, rolesi keke houlu en me-Isrel keil alei kat sise keke akilea avamal en meten Ahi vaka ien, ka arvotintei. Vi vangi me-Isrel keil enges koa Ahi rie lat keil keke avahotini. Ka teisav en keil vasi, Ahi sakin ralinge mai vonhon en hisoen onen. ✡ Rom 9:31 8 Koanek suval asa koa Tus Votut viteni koa vit,
“Ahi sakin rendemien one matil,
ka rokol kosa, suval koa mete var ka ralinge vonhon.” Duteronomi 29:4; Aesea 29:10
9 Ka asuv houlu Deved viteni vit,
“Ahi, kisakin marmari anien keil one hemai hehi sakat koa hehuli kat keil.
Kisakin keil isavoi eni ka imot, ka kisa kesi min keil mahien koa asani min mesav keil.
10 Kisakin mete hevar keke asakras avalele,
ka kumon keil ilonge hetisa hesuval avi slev keil koa eisile mah lisenges ven umen keil takeih koa amumoni.” Sam keil 69:22-23✡ Sam 35:8
11 Navis kami eris navit, “?Mukave, navong me-Isrel keil amusavoi, keil umot vasi varei keke asakras avamea ris?” !Vuo, romukteinek! Ka veni keil amusavoi, Ahi va voutut koakeil arvitei Siu vasakin Siu keil avahi elu en keil. ✡ Umen 13:46; Dut 32:21; Rom 10:19 12 Ka tounah koa Siu keil amum tisa eni mumon sise keke meatin keil vasi ten out netan akilea avales tokolkatien onen Ahi. Anatin, longrasien one sakin koakeil arvitei Siu akilea avahilelau en tahosien onen Ahi. Ka munak koanek anatin, navong me-Isrel vasi keil koa Ahi rie lat keil imai ikur demkatien one, tokolkatien koa meatin vasi keil ikuri hemariso vis hemariso mok.
Ahi sakin koakeil arvitei Siu avahi meatin keil kati onen
13 Ka en avong etin ekek, ek vati maselus min kami koa mirvitei Siu. Ahi rie lat inau navi eiloheh tai onen vat min kami, ka namul nasi nau ven umen onak. 14 Vahesa asa koa namul namumoni ral min kami vasakin meatin kati keil onak avahi elu. Veni, hemukonek, vahesa tei en keil ihiles ka Ahi houtut moulien one. 15 Navong Ahi sesein me-Isrel keil, meatin keil houlu ten out netan koa armaltei en meten mulamu, kei mai lele tahos en keil. ?Ka hemukave suk navong Ahi hekur ris meatin kati keil onen? !Hesuval koakeil umatmat imoul eris ran matien!
16 Navong meatin viles pulaoa, ka, mulamu, mumon veret eni ka sani vi sanien votut min Ahi, veret koa kei houmoni hekatau, kei mun hehi votut.* En sakien enek, me-Isrel keil avi meatin votut onen Ahi veni avu keil one telamu avi meatin votut keil onen. Ka navong meatin tai ring koe vatiai tai vahi onen Ahi, angoite ka heite keil emun teni ihi onen.† En vati sakien enek, vati avu telamu onen Siu keil koa Ebraham, Ahi ring koe vi meatin kati onen. Sakini, koakeil akistal en ara onen emun avi meatin kati keil onen. ✡ Nam 15:17-21; Neh 10:37; Esek 44:30
17 Me-Isrel keil asuval angoite keil ten vati olip tai, ka Ahi kum vulvul tei en keil. Evus, va lei kat angoi olip sav keil ten eivorohus ka sosor en keil umai akur vulie. Sakini, kosa, kami koa mirvitei Siu, mimul mikur tokolkatien onen Ahi suval mivi me-Isrel keil kati. ✡ Efes 2:11-19 18 Sakini, minandem maentei Siu keil koa Ahi sesein keil ka kum vulvul keil suval avi angoite keil. ?Mimul mivasi kami vensa? Kami mivi angoite enges koa mirkatauntei vatte. Vatte keke mul kataun kami. ✡ Sion 4:22
19 Ka vahesa tai en kami hehiteni minau hehit, “Ka Ahi rie lati keke envatien onen mul en komai koa mirvitei Siu, veni kum vulvul en Siu keil koa along rasi vasakin ahho val keke vasosor en komai mevakur vulie.” 20 Koanek vi anatin. Ahi kum vulvul en keil veni arlingtei demkatien one en Kristo. Ka kami mimul en vatte enek veni miling demkatien onami mul ien. Ka minavuttei kami. Hetahos imok mihemetau ka mihelei kat revi kami. ✡ Rom 12:16 21 Veni munak Ahi kilea vakum vulvul en me-Isrel keil ran vatte koa avi angoite keil kati teni, hemaes keke hekum vulvul en kami mun.
22 Sakini, mihendem vis usil tahosien ka vurohien onen Ahi. Veni kei mumoni keih en Siu keil koa umot tuai, ka kei mumoni tahos min kami koa mirvitei Siu. Ka kami mihel miheles tahosien onen munak mihehi anatin eni. Ka munak mirvitei mun anatin eni, kei hekum vulvul kami mun mihehaha. ✡ Sion 15:2,4; Hib 3:14 23 Ka munak Siu keil ihiles ka iling demkatien one en Kristo, Ahi kur keihoen vasosorin en keil eris aval en vulie kati. 24 Kami koa mirvitei Siu, mulamu mimul soutin ran Ahi ka kei kur revi kami mivi onen. Misuval angoi olip keil ten eivorohus koa kei sosorin en kami en vati olip koa kei mul lei kat revi en ah osen. Ka munak kei kilea voumon koanek en kami, hemaes eni keke hekur angoi olip keil kati ten vatte enek koa mul en ah osen ka hesosorin en keil eris en vulie kati.
Ahi en hemahis me-Isrel keil ka hekur ris keil ihi meatin keil onen
25 Tuak ka ahinkuli keil, ek vati mivailea en lingkatien suai tai koa Ahi mul vothot eni keke minahasitei kami minahit mivi meteisau imok. Ahi varei sakin houlu en me-Isrel keil tine keih. Ka tine hekeih hemukonek hetokol avong koakeil arvitei Siu imai iapil en meatin keil onen Ahi ka hevinvin en asa koa Ahi ling kati tuai. ✡ Rom 12:16; Luk 21:24; Sion 10:16 26 Ka hevus, Ahi houtut me-Isrel keil vasi hesuval koa viteni tuai en Tus Votut vit,
“Meatin ten mututien heka en out Saeon
27 “Ka numon hatkatien takeih onak hetal min meatin keil onak
28 Veni en vat kami mivalong more longlongien, Ahi mai vi vativieh en me-Isrel keil koa tine keih. Ka veni Ahi mul mundem usil avu telamu keil one, envatien onen mul veah en Siu keil. 29 Anatin, envatien onen mul veah en me-Isrel keil veni tounah tovuol kilea vahiles rendemien onen Ahi usil koakeil kei rie lat keil vuo usil koakeil vat kati vatokol kat keil.
30 Mulamu, kami koa mirvitei Siu keil milong ras Ahi. Ka kosa, Ahi rie lat enmahisien onen min kami veni Siu keil amul alonglong ras. 31 Sakini, longrasien one sakin enmahisien onen Ahi emai en moulien onami vatie lati keke kei en mul mahis ris keil. 32 Veni Ahi en vati vatie lati keke meatin vasi keil amul en sakat ten longrasien. Veni, hemukonek, kei kilea vatie lat enmahisien onen min keil vasi. ✡ Kal 3:22; 1Tim 2:4
33 !Navati lat isen Ahi! Kei vilelau en tahosien, meteisauen, ka ileilien. ?Isei kilea vailea vasin rendemien onen? Tahosien koa rie lati min meatin keil ka sakien keil koa kei mumoni min keil, rosakras rovailea vensa mumoni mukonek. ✡ Aes 45:15; 55:8 34 Koanek suval koa Tus Votut viteni vit,
“?Isei kilea en rendemien onen Iahova?
35 “?Isei kilea vasan sanien tai mini,
koa hesakin Ahi hesa kesi mini?” Siob 41:11
36 Veni tounah vasi keil koa amul aka ven Ahi, amul en hen, ka amul keke avahati lat isen.✡ 1Kor 8:6 Anatin, rehehati lat Ahi koa hetetamenien onen mul lises ka lisenges. Anatin.
✡11:2: 1Saml 12:22; Sam 94:14
✡11:10: Sam 35:8
✡11:11: Umen 13:46; Dut 32:21; Rom 10:19
*11:16: En sakien enek, me-Isrel keil avi meatin votut onen Ahi veni avu keil one telamu avi meatin votut keil onen.
†11:16: En vati sakien enek, vati avu telamu onen Siu keil koa Ebraham, Ahi ring koe vi meatin kati onen. Sakini, koakeil akistal en ara onen emun avi meatin kati keil onen.
✡11:16: Nam 15:17-21; Neh 10:37; Esek 44:30
✡11:25: Rom 12:16; Luk 21:24; Sion 10:16
✡11:26: Sam 14:7
✡11:27: Aes 27:9
✡11:34: Siob 15:8; Ser 23:18; 1Kor 2:16