1 ?Asa rehehiteni suk? Vahesa tei en kami amul amundemi keke tahos imok rehel rehoumon tisaen keke Ahi kilea vatie lat more envatien onen min ir hemariso mok. ✡ Rom 3:5-8 2 !Vuo, romukteinek! Veni navong romai ven Iesu, suval koa romat ral mini. Ka veni romat, tisaen rokurtei mun keihoen en moulien orer. Sakini, ronaltei ronamaen tisaen nahi houlu en moulien orer. ✡ 1Pit 4:1 3 Veni tahos mikilea keke navong avi baptaes en ir keke rovapil vituai vatal min Iesu Kristo, rokapil vituai ral min matien onen emun. ✡ Kal 3:27 4 Sakini, navong avi baptaes en ir en oai, suval koa arahin moulien matu orer ral mini ka rokapil vituai ral min matien onen. Mukonek, navong romea ran oai, suval koa romea ran matien ral min Kristo koa Ahi Tamer rali lati ran matien ral min mari keihoen onen. En sakien enek, Ahi san moulien hau min ir keke rokilea rovamoul eni. ✡ Kol 2:12

5 Kristo mat. Ka navong rokapil ral mini suval koa ir emun romat ral mini. Ka veni koanek anatin, anatin imok keke rokilea rovamoul en moulien hau vasuval koa kei moul eris. ✡ Plp 3:10-11 6 Ka tahos rokilea keke moulien matu orer, suval koa amuti kati ral min Kristo en aiveave onen. Anatin, matien enek vitan en keihoen ten tisaen en moulien hau orer keke rehervitei mun slev keil ten tisaen. ✡ Kal 5:24 7 Veni navong meatin keil umat, keil amaluv ran keihoen ten tisaen. ✡ 1Pit 4:1 8 Ka veni suval romat ral min Iesu, rokur anatin eni keke rehemoul emun hetal mini. 9 Ka rokilea keke Ahi sakin Kristo mea ran matien ka hermattei mun. Anatin, matien rovitei mun hetetamen en moulien onen. 10 Veni navong mat, lohlin keihoen ten tisaen en moulien onen ten lisenges, ka hermattei mun. Ka veni lohlin keihoen ten tisaen, kosa mul moul en keihoen onen Ahi ka mul kapil vituai ral mini. ✡ Hib 9:26-28; 1Pit 3:18; Kal 2:19 11 En vati sise enek, en usite ten tisaen, suval koa kami mimat ka tisaen rovitei mun hetetamen en moulien onami. Ka en usite onen Ahi, kami mimoul eris ral min Iesu Kristo ka mikur moulien hau keke mikilea mivousil kat asa koa Ahi en vat kami mivoumoni. ✡ 2Kor 5:15; 1Pit 2:24

12 Sakini, tisaen nahitei mun hetetamen en avemi vasakin kami mivalong kat asa en vati. ✡ Sen 4:7 13 Anatin, minamaentei mun hati usivemi keil anoum natisa. Ka mihesa vasi avemi min Ahi koa rali lat kami ran matien ka san moulien hau min kami. Anatin, mihesa vasi hati usivemi keil min Ahi keke mivoumon asa koa mal en meten. ✡ Rom 12:1; Efes 2:5; 5:14 14 Sakini, tisaen nahitei hetetamen en kami, veni mirmusiltei mun mengkatien keil onen Mosis, ka mimusil kat more envatien onen Ahi. ✡ 1Sion 3:6

15 ?Asa suk? ?Mal keke rehoumon tisaen, veni rormusiltei mun mengkatien keil ka Ahi mul rie lat more envatien onen min ir? !Vuo, hermukteinek! ✡ Rom 5:17,21 16 Veni mikilea keke navong misan kami min meatin tai keke mivalong kati vasuval slev onen, mimai mivi slev onen anatin. Sakini, navong milong kat tisaen, mimai mivi slev onen, koa keite teni vi matien. Ka navong milong kat Ahi, mimai mivi slev onen, koa keite teni vi maluen koa kei sani min ir. ✡ Sion 8:34; 2Pit 2:19 17 !Ka rehemasmas Ahi! Veni, mulamu, kami mivi slev keil ten tisaen. Ka kosa, ral min moulien vasi onami, milong kat anatinien koa mivotini en hihiseien keil koa mikuri. 18 Anatin, mimaluv ran viau ten tisaen, ka mimai mivi slev ten maluen. ✡ Sion 8:32 19 Nara usil tatavolien enek ten slev keil koa maes mivakuri veni mirie lati keke rendemien onami memerau veah en usite ten tounah keil ten demkatien. Mulamu, misa vasin hati usivemi keil min tisaen keke mivi slev keil teni, ka miva suk mimum tisa houlu vis houlu mok ral min avemi. En vati sakien enek, mihesa vasi hati usivemi keil min maluen keke mihehi slev keil teni, ka mihoumon tounah koa mal Ahi en vat kami mihoumoni hetal min keil keke mihemai mihehi votut en meten.

20 Navong mivi slev ten tisaen koa keih kat kami mivalong kati, mirkileatei keke mihelong kat maluen hemukave. 21 ?Ka mikur asa ran tounah keil mimumoni koa mimemou eni kosa? !Mikur matien koa vi keite ten tounah keil enek! ✡ Esek 16:61,63; Rom 7:5; 8:6,13 22 Ka kosa, Ahi sakin kami mimaluv ran tisaen, ka mimai mivi slev onen. Ka navong mivi slev onen Ahi, koanek tahos imok, veni mimai mivi meatin votut keil onen, ka keite teni vi moulien ten lisenges. ✡ 1Pit 1:9 23 Veni ui umen ten tisaen keil orer vi matien. Ka Ahi mul sa maen moulien ten lisenges suval sanien tai min koakeil vasi akapil vituai ral min Iesu Kristo, Asuv orer.✡ Rom 5:12,15