95
Rehehati lat isen Ahi ka rehelong kati
1 !Almai, rovamasmas Iahova!
Rehesau min Ahi hetal min sien veni kei mutut moulien orer ka mul lei kokoe en ir.
2 Rehemai vesesal veni hetal min masmasien,
ka rehesau mini hetal min souen keil ten sien.
3 Rehoumoni hemukonek veni Iahova, keihoen onen mariso,
ka kei vi asuv houlu koa vi hetetamen imok mulin ahi sav keil.
4 Out vasi en out netan amul en hen.
Anatin, kei mul losil kat huinev ten atan vina rokol mari vatihou keil nesa vis nesa mok.
5 Atas vi onen, veni kei varei mumoni.
Ka atan vasi keil vi osen veni hen keilu mumoni.
6 Almai, rovaha netan ka rehemalingling mini.
Anatin, rehetetengeiril en meten Iahova koa mumon ir.
7 Suval meatin tai koa mul losil kat revi sipsip keil osen,
kei vi Ahi orer ka mul losil kat revi ir koa rovi meatin keil onen.✡ Hib 3:7-11,15; 4:7
Kosa, mihelong revi asa koa Ahi viteni min kami vit,
8 “Minoumontei vatumi nakeih nasuval avu onami keil amumoni en out Meribah,
nasuval koa amumoni en avong enek en out volvol ten out Massah.* Navong maroro kat me-Isrel keil en out volvol, asel kutut kat Mosis avit hesakin oai hekistal avamuni munak Ahi mul veni. Ka navong Mosis muas mari ahat tai, Ahi sakin oai mue rani. Avise out enek en Meribah koa aneite teni vi ‘selkututien’ veni aselus kutut kat Mosis. Ka aling isen tamun vi Massah koa aneite teni vi ‘sakvisien’ veni asak vis Iahova navong avisi avit, “?Iahova mul ven ir vuo romultei?” (Eks 17:1-7; Nam 20:2-13)
9 Avu onami keil asak vis inau,
avaseini keke alei kilea tounah houlu tuai koa namumoni ven keil.
10 Sua hanumau elu (40), keil atisaso en metok,
veni tine mul soutin ranau ka e rovattei mun availea mengkatien keil onak.
11 Sakini, navuroh kat keil ka navat kati keke
asakras avaha en out koa nisakin keil avaseh revi eni.”✡ Nam 14:20-23; Dut 1:34-36; 12:9-10; Hib 4:3-5
*95:8: Navong maroro kat me-Isrel keil en out volvol, asel kutut kat Mosis avit hesakin oai hekistal avamuni munak Ahi mul veni. Ka navong Mosis muas mari ahat tai, Ahi sakin oai mue rani. Avise out enek en Meribah koa aneite teni vi ‘selkututien’ veni aselus kutut kat Mosis. Ka aling isen tamun vi Massah koa aneite teni vi ‘sakvisien’ veni asak vis Iahova navong avisi avit, “?Iahova mul ven ir vuo romultei?” (Eks 17:1-7; Nam 20:2-13)
✡95:11: Nam 14:20-23; Dut 1:34-36; 12:9-10; Hib 4:3-5