1 Avati keil muli, ka avong ten ous evus, sakini vi avong kati koa asuv houlu keil uva ral min meatin tavaeen keil one keke avavae. Sakini, Deved sila Soab, koa vi houlu en meatin keil tavaeen ten out Isrel, ral min avat keil onen, ka meatin vasi keil tavaeen emun one keke avavae vatal min me-Amon keil. Ka meatin keil onen Deved amu rasilin me-Amon keil ka akarahit taon one ten out Raba. Ka Deved rovatei, kei ro nges en out Serusalem.✡ 1Kron 20:1

2 Avong tai, en taviai, Deved va matil. Ka navong kei mea ris, mual retoun nesa en teim sen en out tasehien tai. Ka en out enek nesa, lele vita en eim sav tai ka les ahin tai koa mul mukul. Kei lesi keke ahin enek tahos vis tahos imok. 3 Sakini, kei sila meatin onen tai vaha vahotini keke ahin enek onen sei. Ka votini keke ahin enek, isen Batsiba. Kei vi natnahin Eliam ka retalihe kur Uraea koa vi koan Hit tai. 4 Deved sila eiloheh tei onen keke avakur ahin enek vamai veni. Navong Batsiba mai veni, kei kuri ka matil ral mini. (Ka navong Batsiba emai, kei mukul motein kei tuai ran mesaien koa onen ahin keil musil sakien matu onen me-Isrel keil.) Evus, ahin enek va ris teim sen. 5 Katau suk, ahin enek lei kilea keke avati onen li. Sakini san selusien va min asuv houlu Deved.

6 Navong Deved longe keke Batsiba meas, kei san selusien va min Soab, houlu onen meatin tavaeen keil onen vit, “Kisila Uraea, koan Hit, hemai ris venau.” Sakini, Soab sila va veni. 7 Navong Uraea kistal, asuv houlu Deved visi usil Soab ka meatin keil tavaeen onen, ka vaeen mul va mukave. 8 Evus, kei viteni min Uraea vit, “Tahos. Ha seh mau en teim som.” Ka Uraea va, ka Deved san sanien tai musili vaha en teim sen. 9 Ka navong Uraea va, rovatei teim sen. Kei va ka matil vesesal en vali metareh ten eim onen asuv houlu ral min meatin taleikokoeien keil onen Deved. 10 Navong Deved raengoni keke Uraea rovatei en teim sen, va visi vit, “Kovuol ran teim som tuetin ?Ka kosa komai ris, vensa korvatei teim?”

11 Uraea vit kesi mini vit, “!Asuv, nasakras! Kosa, me-Isrel keil ka me-Sudah keil amules en votevav keil ome. Ka Bokis ten Hatkatien Takeih onen Ahi mules matil en eim tavolin tai enges. Avat onak, Soab, ral min avat tavaeen sav keil onom, keil amules amatil hae en mesaiuai. Sakini, romaltei keke inau maha teim, maanian vatahos, mamun hati uaen ka mamatil vatal ahin onak. !Navat kati keih minuk keke nasakras moumoni!”

12 Sakini, Deved viteni mini vit, “Kito avong tai ris, ka visuvong esuk, inau nisilak kiha ris.” Sakini, Uraea ro nges Serusalem avong koanek evus, ka avong sav teni emun. 13 Deved sisil eni vamai vaanian vatal mini en vongien enek, ka mumon kei munmun vini kei. Ka en vongien enek emun, Uraea rovatei teim. Va matil en out koa kei matil ien mulamu ral min meatin taleikokoeien keil onen Deved.

14 En visokon, Deved mutis leta tai ka sani min Uraea vakuri vasa lati min Soab. 15 En leta onen, kei mutis selusien enek vit, “Kiling Uraea heha helamu en meatin tavaeen keil en out koa vaeen keih vis keih imok. Ka navong amul uvae, kihis meatin sav keil keke ilokovein Uraea hevae kei sasen keke vativieh keil u vini hemat.” 16 Sakini, navong Soab mul karahit taon ten out Ramah, sila Uraea va en out koa kilea vativieh keil one akeih amul ien. 17 Ka navong meatin keil tavaeen onen me-Amon keil amea ran taon enek keke avavae vatal min meatin tavaeen keil onen Soab, keil amu vini meatin tei keil tavaeen onen Deved, ka Uraea, koan Hit, kei mun mat.

26 Navong Batsiba longe keke meatin onen amuasi mat, longe tisa houlu ka murang veni. 27 Ka navong avong keil tatangien koa avi oulu (7) muli va, Deved sisil eni. Sakini mai en teim sen asuv houlu ka Deved kuri vi ahin onen. Katau, kei kur ehon tai onen Deved. Ka Iahova rositei en asa koa Deved mumoni.