1 Avong sav tai, Samuel va ven Sol ka viteni mini vit, “Mulamu, Iahova sila nau matokol katuk keke kovamai kovahi asuv houlu onen meatin keil onen.✡ 1Saml 10:1 Sakini, kosa, kitaengonau mahit mesein asa koa en vati vahiteni minuk. 2 Iahova, Asuv Houlu ten out nesa, hesan mahien min me-Amelek keil veni avu one keil uvae ral min me-Isrel keil navong alokovein out Isip umai.✡ Eks 17:8-14; Dut 25:17-19 3 Miheha mihevae hetal min me-Amelek keil ka mihou lin tounah vasi keil one. Mihou vinvini meatin vasi keil: amo keil ka ahin keil, titiali keil ka tivava keil one emun. Mihou vinvini buluk, sipsip, kamel ka dongki keil ose. Mihouas keil vasi, miherling etai tounah hemoul.”

4 Sakini, Sol vise ruain meatin keil onen koa avinvin avaha avavae, ka umai out tas en taon ten out Telaim. Ka navong avuli meatin keil, avotini keke me-Isrel keil arokol handred taosen elu (200,000), ka me-Sudah keil arokol taosen halualim (10,000).

7 Navong Sol ka meatin keil onen uvae ral min me-Amelek keil, amu vinvini keil varei, en taon ten out Havila va rokol taon ten out Sur koa mul en hakot ten atan ten out Isip. 8 Keil amu vasi meatin keil, ka asuv houlu one koa isen Akak, avuli kati ka armuastei vamat, moul enges. 9 Anatin, Sol ka meatin keil onen armu vinitei asuv houlu Akak. Ka sipsip ka buluk keil koa ave tahos, ka titae keil emun koa ave musising, armu vinvinitei keil. Ka navong ales tounah tai koa tahos imok, alahi veni e rovattei avapuruni. Ka tounah keil koa alesi rotahostei vuo romaltei, amu rasilini.

10 Ka Iahova selus min Samuel vit, 11 “Nalonge tisa houlu keke namumon Sol mai vi asuv houlu, veni kei viles eisilin ranau ka romusiltei selusien keil onak.” Navong Samuel raengon tounah enek, longe tisa houlu ka mules vis min Iahova va vio … out mulan.

12 En visokon semau, Samuel va lei kat Sol. Navong mul semau mual en sise, raengoni keke Sol mul en taon ten out Karmel ka kei ling mari ahat tai vahi metai keke meatin keil indem kat keihoen onen en avong ten vaeen keil. Ka navong mul mual va, longe suk keke Sol va en out Kilkal. 13 Sakini, Samuel va en out Kilkal ka votin Sol ien. Ka navong Sol lesi, mai veni ka viteni mini vit, “!Samuel, Iahova hetokol katuk. Inau namum vasi tounah koa kei meng kat inau keke moumoni.”

14 Ka Samuel visi vit, “?Munak koanek anatin, vensa namul naraengon buluk keil amis ka sipsip keil uver?”

15 Sol vit kesi mini vit, “Meatin onak keil alah lati ran me-Amelek keil. Keil aling revi sipsip ka buluk keil koa ave tahos keke avasani min Iahova, Ahi onom. Ka teisav keil, memu lin keil.”

16 Samuel vul kati vit, “!Kito raeng! Ka inau nihit meseini minuk asa koa Iahova viteni minau en vongien.”

Ka Sol vit, “Tahos. Hiteni minau.”

17 Ka Samuel vit risi mini vit, “Avaseini keke, mulamu, kolei heisav enuk, kosa, komai kovi avat ten vatiamal keil vasi onen me-Isrel keil. Iahova keke rie latuk kumai kovi asuv houlu onen me-Isrel keil. 18 Ka kei silak kovoumon umen onen. Kei en vati keik kovou vasi meatin tisa keil ten out Amelek. Viteni minuk vit kilamun meatin keil onom miheha mihevae heha vio … mihou vinvini keil vasi. 19 ?Munak koanek anatin, vensa korlong kattei selusien onen? ?Vensa kokalah kolah ruain tounah vasi one koa tetahos? !En meten Iahova, asa koa komumoni tisa vareis!”

20 Ka Sol viteni mini vit, “Anatin eli, inau nalong kat selusien onen Iahova. Nuva suval koa viteni minau, namu vinvini meatin keil vasi ten out Amelek ka navuli kat asuv houlu Akak ka nakuri emai ekok. 21 Ka meatin keil onak armu vinvinitei sipsip ka buluk keil ose koa atahos. Keil e vati avalah keil vamai ekok, en taon ten out Kilkal, keke avasani min Iahova, Ahi onom.”

22 Ka Samuel viteni mini vit, “?Asa varei keke Iahova en vati mok? ?Longkatien vuo sanien keil? Munak rolong kat selusien keil onen, koanek tahos imok mulin buluk ka sipsip keil koa romuas keil, ka sanien votut sav keil koa rosani mini. 23 En meten, navong komul kosesein hiasuvien onen, tisaen enek suval tisaen ten lingling temat. Ka sakien ten vatkeih suval sakien koa uva netan min nana keil. Sakini, veni kosesein selusien onen Iahova, kei mun mul sesein losilkatien onom en me-Isrel keil.”

27 Navong Samuel selus evus, viles keke vaha. Ka Sol longe tisa houlu ka vuli kat eisin omon ka rali vasi.✡ 1Saml 28:17; 1Ki 11:30-31 28 Navong Samuel lesi, viteni min Sol vit, “Suval koa komumoni en eisin omak, kosa, Iahova rali vas losilkatien onom en me-Isrel keil va ranuk, ka hesani min tai en tumali keil koa kei lesi tahos imok mulik. 29 Iahova ten lisenges onen me-Isrel keil sakras vahiles rendemien onen. Anatin, kei rosuvaltei meatin keil koa amul aluvos ka amul aviles rendemien one.”

34 Sakini, Samuel va ris en out Ramah, ka asuv houlu Sol va ris va teim sen en out Kibea. 35 Ka avong enek va rokol keite ten moulien onen Samuel, rolestei mun Sol. Ka avong vasi, kei longe tisa houlu veni. Ka Iahova emun longe tisa houlu veni kei varei rie lat Sol vamai vahi asuv houlu onen me-Isrel keil.